Génesis 39 - Kashibo-Kakataibo Biblia

José ꞌimainun Potifarnën xanu ꞌia

¹ An ñu marukë unikaman ka José marubiankin Egipto kakë menu buánkëxa. Buánxun ka egipcio uni achúshi Potifar kakë a ismaelita unibunën maruakëxa. Potifar ax ka ꞌapu aín suntárunën kushi capitán ꞌimainun an bërúankë aín kushiribi ꞌiakëxa.

² Usai an ñu mëëmikë uni egipcio uni, aín xubunu ꞌia ka Nukën ꞌIbun José ꞌitsaira bërúankin ꞌakiankëxa.

³ ꞌAkinkëxuan upíokin Josénën ñu mëía ka a ñu mëxunkë unin, aín ꞌIbun ka Josébë ꞌixun ꞌakinia kixun. Usa ꞌain ka Josénën mëëkë ñukamax upí ꞌiakëxa.

⁴ Usa ꞌikë ka José ax ka uni upí ꞌikë kixun an unikama bërúanti ꞌimainun an ꞌain xubunu ꞌikë kamabi ñu bërúanun kixun ami ëankëxa.

⁵ Anúan Potifarnën José aín xubu ꞌimainun aín ñukama bërúanun ënkë nëtëkaman ka Nukën ꞌIbun Potifarmi upíokin sinánkin ꞌakiankëxa aín xubu ꞌimainun aín ñu ꞌapákë kamabi upí ꞌinun.

⁶ Usakin ami ënkëxuan Josénën aín ñukama bëruánkëbë ka Potifar aín ñukama sinánkinma an bërúanxunkë anu ꞌain, aín piti ꞌatishi isakëxa. Usaia ꞌimainun ka José aín bëmanamiax upíira uni ꞌiakëxa,

⁷ usa iskin ka basikëbëtan anua tëkë uni ꞌain xanun upí ꞌikë iskin kuëëankëxa, kuëënkin ka achúshi nëtën Potifarnën xanun kakëxa: —ꞌËbë kamina ꞌiti ꞌain kixun.

⁸ Kakëxunbi ka kuëënkima Josénën ësokin kakëxa: —Ka kuat, min bënën ka kamabi aín ñukama ꞌëmi ëanxa, usa ꞌain ka ꞌëx ënu ꞌain, aín ñukamami sinántima ꞌikën.

⁹ Ënë xubunu ka ꞌësaribi uni ꞌaíma ꞌikën; usa ꞌain ka ꞌën ñu mëëxunkë unin a ñu kamina ꞌatima ꞌain kixun kakëma ꞌikën, mix kamina ꞌain xanu ꞌain; ¿usa ꞌain karana ꞌëx ꞌatima ñuira ꞌai Nukën ꞌIbu Diosmi ꞌuchati ꞌain?

¹⁰ Kamabi nëtën ubíokin anun kuëënkin abë ꞌinun kanan a rapasua ꞌinun kakëxunbi ka Josénën kuaisama tankëxa.

¹¹ ꞌAínbi ka achúshi nëtën José xubunu ꞌikë ñu mëëti ꞌai anua uixi ꞌaíma ꞌain atsíankëxa,

¹² ꞌaínbi ka atsíniabi xanuxun aín chupa bikin kakëxa: —ꞌËbë kamina ꞌiti ꞌain kixun. Usakin kakian aín chupan bikëx ratuti abákiani chikíkin ka aín chupa xanun mëkënubi ëbuiankëxa.

¹³ Usai ꞌikin timabiani chikíkin aín mëkënubi aín chupa ëbiani chikíkëbëtan ka

¹⁴ aín xubunu ꞌikë an ñu mëëxunkë unikama kuënkë́nkin kakëxa: —Ka kuat, ꞌën bënën ka ënë hebreo uni achúshi ñu mëënun kixun bëaxa usa ꞌaíshbi ka bërí ꞌëmi kuaitisatania. Usa ꞌaish ka ꞌëx mëu ꞌain ꞌëbë ꞌikatsikiax atsíanxa atsínkin bikëx kana ꞌëx munuma kuënkëan,

¹⁵ usai ꞌëx munuma kuënkënia küati ratuti chikiti abákin, ka aín chupa ꞌënu ëbianxa.

¹⁶ Usai ꞌitankëxun ka Josénën chupa upíokin nankëxa, an ñumëmikë ꞌain bënë aín xubunu ꞌutamainun.

¹⁷ Usaia ꞌikë basimashi ka xubunu aín bënë bëbakëxa, bëbaia ka aín xanun ami manánkin kakëxa: —Hebreo uni achúshimi ñu mëënun bëkë ax ka ꞌëx anu ꞌikënu ꞌëbë ꞌikatsikiax atsíanxa,

¹⁸ atsínkëbë ꞌëx munuma kuënkënia küati ratuti chikíkin ka aín chupa ënu ëbiani abáxa.

¹⁹ Ësokin ka min ñu mëëmikë unin ꞌë ꞌaia, ësokian aín xanun kakëxun kuati ka Josénën ñu mëëxunkë uni asérabi usai ikëxa sinani ꞌitsaira ami nishakëxa,

²⁰ usai xuamati ami nishkin ka José sipuati binun kixun aín suntárukama kakëxa, kakëxun bixun ka anua ꞌapun uni sipuakë anu sipuakëxa.

²¹ Usakin José sipuakë ꞌaínbi ka Nukën ꞌIbu abë ꞌixun bërúankin ꞌakiankëxa, ꞌakinkëx ka upí nuituñu ꞌiakëxa, usa ꞌikë ka an sipu bërúankë aín kushi an ꞌunánkëxa,

²² usa ꞌunánxun ka José abëa sipunu ꞌikë unikama bërúanun kixun anëakëxa. Anëkëxun ka Josénën kamabi ñu anu ꞌikë a ꞌanun ñunuakëxa,

²³ usakin ꞌamainun an sipu bërúankë aín kushi an Josénën ꞌakë ñukama isama ꞌikën, usakin ka Nukën ꞌIbun ꞌakinkëxun aín ñu mëëtikama upíokin ꞌakëxa.