Ezequiel 37 - Kashibo-Kakataibo Biblia

Diosan Ezequiel namákësa okían xo ëskikë kama bukukiankë isnun ismia bana

¹ Nukën ꞌIbu Diosan aín mëkën ꞌënu nankësa okin ꞌaia ka aín kushin chikínbiankin buántankëxun, me sapan anua xo ëskikë ꞌaisamaira bukukiankë anu ꞌë bëbamiakëxa.

² Usa ꞌain ka Diosan me sapan anua xo ëskikë ꞌikë, anuax kuaínbëkini nikin xo ꞌaímai ëskikë ꞌaisamaira a isnun ꞌë ismiakëxa.

³ Usa ꞌain ka ësokin ꞌë kakëxa: ¿Min sinánkëx kara ënë xokama amiribishi unitëkënti ꞌik? Kixun kakëxun kana ꞌën kakën: ꞌËn ꞌIbu minshi kamina unan.

⁴ Ësokin kakëxun ka Diosan ꞌë kakëxa: ꞌËn anë ñuikin kamina ënë xokama uni kakësokin kati ꞌain: Xo ëskikëkaman kamina ësai ka Nukën ꞌIbu kiaxa kuati ꞌain.

⁵ Nukën ꞌIbun ka ësokin mitsu kaia: ꞌËn kana amiribishimi mitsux uni ꞌitëkënun mi uin ꞌinánti ꞌain, usakin ꞌakëx kamina uni ꞌitëkënkanti ꞌain.

⁶ Usakin ꞌimikëx kamina punuñu ꞌianan, namitëkëni bëxitan maputi uni ꞌitëkënia anun tsóti suñu mi ꞌinánti aín, usokin ꞌakëx kamina amiribishi tsótëkënti ꞌain. Usakin ꞌakëxun kamina mitsun, ax ka Nukën ꞌIbu Dios ꞌikë kixun ꞌunánti ꞌain.

⁷ ꞌËn kana unin xokama a Diosan usakin kanun kakësabiokin kakën. Usakin xokama a kakinbi kana achúshi ñu munuma kushi banai ꞌikësai ꞌia kuakën, usai ꞌikëbë ka xokama ax bëtsibë bëtsibë biranani timë́akëxa.

⁸ Usai timëtia atun punu iruanan, aín namikama ꞌia aín bëxitan mapuia kana isakën. ꞌAínbi ka anúan tsóti aín uinñuma pain ꞌiakëxa.

⁹ Usa ꞌain ka Diosan ꞌë kakëxa: ꞌËn anën kamina suñu xo unikëkama kati ꞌain: Ësai ka Dios kiaxa: Au bari urukë amiax umainun, amia bari kuabúkë amiaxribi umainun ain tsipúmiax umainun, aín rëbumiaxribi ka anuan ñua unikama uinti suñu uti ꞌikën.

¹⁰ Usa ꞌain kana ꞌëx Diosan usai ꞌinun kakësabi oi ꞌiakën, usai ꞌëx kikëbëshi utankëx ka anun uni tsóti suñu ax utankëx atunu ꞌiruakëxa, ꞌirukëbë ka uni ꞌikësai nirukankëxa. Atux ka ꞌitsaira suntárukama iskësa ꞌiakëxa.

¹¹ Usa ꞌain ka Diosan ꞌë kakëxa: Israel unikama ax ka ënë xokamasaribi ꞌikën. Usa ꞌaish ka atux ësai ki nitsia: Nun xokamax ka ꞌitsaira paëia, usa ꞌain kananuna nukamax uisa ñu upibi kainima nëtë́kësa ꞌain.

¹² Asábi ka usa ꞌain kamina ꞌën anë ñuikin atu kati ꞌain: Ësai ka Dios kiaxa: ꞌËn unikama anumi mitsux bamakësa ꞌaish bukukë me anua kana mitsu chikínti ꞌain, usakin ꞌaxun kana Israel unikaman menubi mitsu buántëkënti ꞌain.

¹³ ꞌImainun kamina uisaran kara anuax tëmëranun maían ꞌixun akësokin mitsu chikini anun ꞌën unikama ꞌixun, ꞌëx kana Dios ꞌai kixun ꞌunánti ꞌain.

¹⁴ Usa ꞌain kamina ꞌën mitsu anun tsóti uin ꞌinánkë amiribishi tsótëkëkanti aín; usakin ꞌatankëxun kana mitsun menubi tsónun mitsu ꞌimiti ꞌain. Usakin ꞌakëxun kamina ꞌëx Dios ꞌixun kana ꞌëx kikësabiokin an kixun ꞌunánkanti ꞌain. ꞌËx mitsun ꞌIbu asérabi ꞌaish kana ësai kin.

Judá menu ꞌikë unikama ꞌimainun Israel unikama timë́tëkëan ñuikë bana

¹⁵ Nukën ꞌIbu Diosan ka ësokin ꞌë kakëxa:

¹⁶ I tukakë aín paná bixun kamina anu kuënëoti ꞌain: Judá ꞌimainun abëa ꞌikë Israel unikamaꞌ. Usakin ꞌatankëxun kamina bëtsi i tukakë aín panáribi bitankëxun anu kuënëoti ꞌain: José a Efraínsa ꞌinun ꞌanan kamina, Israel unikama raíri aribi anu kuënëoti ꞌain.

¹⁷ Usakin ꞌakinshi kamina achúshisaishi ꞌitánun bëtsimi bikin min mëkënan tuinti ꞌain.

¹⁸ Uínsaran kara min aintsikaman uisai kikë kara ax ꞌikë kixun mi ñukati ꞌikën: Anun kamina uisai kikë kara ax ꞌikë kixun ñuixunti ꞌainꞌ,

¹⁹ ñuixunkin kamina ësakin kati ꞌain: Ësai ka Dios kiaxa: ꞌËn kana Josénan ꞌikëbia an bikëx Efraínën mëkënu ꞌikë i tukakë a biti ꞌain, ꞌimainun kana bëtsi ñaká abëa ꞌikë Israel unikama atunanribi biti ꞌain, bitankëxun kana a ikama Judánu ꞌikë i akëñun achúshishi ꞌitanun ꞌën mëkënu timëti ꞌain, kixun kamina kati ꞌain.

²⁰ Usa ꞌain kamina mi tuinkë ꞌi rabë́ anumi kuënëokë a atun istisabi ꞌitanun min mëkënu tuinti ꞌain.

²¹ Usakin ꞌatankëxun kamina atu kati ꞌain: Ësai ka Dios kiaxa: ꞌËnbi kana Israel unikama anua ꞌikë ëma kamanuabi bëtëkënti ꞌain; bëkin kana me kamanuabi timëbëtsinkin atun menubi bëtëkënti ꞌain.

²² Usakin ꞌakin kana atúxa achúshi ëmaishi ënë menu ꞌia, Israel me kamanu tsótibi achúshi ꞌapuñushi ꞌinun ꞌimiti ꞌain. Usai tsóti ka amiribishi rabë́ ëma ꞌinun ꞌitëkëni ënanantëkëni, rabë́ ꞌapuñu ꞌitëkëntima ꞌikën.

²³ Usai ꞌika amiribishi ñu ꞌatima ꞌatëkënkin bëtsi dioskama rabitëkëanan bëtsi ñukama ꞌairibi ꞌuchatëkëntima ꞌikën. ꞌËn kana ꞌën kuëënkëma ꞌatima ñukama ꞌai ꞌëmi ꞌuchakëkama a tërënxunti ꞌain. Usa ꞌain kana atúxa ꞌën uni ꞌimainun ꞌëx atun Dios ꞌiti ꞌain.

²⁴ ꞌËn uni David aín rëbúnki achúshinëx ka ꞌapu ꞌianan, an atu bërúankë uni achúshishi ꞌiti ꞌikën, usa ꞌixun ka an Diosan bana kikësabiokin ꞌati ꞌikën.

²⁵ Usokin ꞌai ka ꞌën uni Jacob ꞌinan me anua aín chaitiokëkamaxribi anu tsóa me anuribi tsókanti ꞌikën. A menu ka xënibua ꞌaínbi atu ꞌimainun atun bakë bëchikëkamaribi ꞌimainun atun rëbúnkikamaribi tsóti ꞌikën; usai ꞌimainun ka ꞌën uni David aín rëbúnkinëx xënibua ꞌaínbi atun ꞌapu ꞌiti ꞌikën.

²⁶ Usa ꞌain kana atubëtan achúshi ñu ꞌupitax atux bukuti a kupí ꞌati ꞌain. Ax ka xënibua ꞌaínbia ꞌiti achúshi ñu ꞌën mëníokin ꞌakë ꞌiti ꞌikën. Usakin ꞌakin kana aín ꞌaintsikama ꞌuakamë ꞌëonun ꞌimianan, xënibua ꞌaínbia atu nëbëtsi anuxun ꞌë rabiti xubu upíira ꞌanun ꞌamiti ꞌain.

²⁷ Usai ꞌëx atubë ꞌi atun Dios ꞌimainun, ka atúxribi ꞌën unikama ꞌiti ꞌikën.

²⁸ Uínsaran kara anuxun ꞌë rabiti xubu upíira ax xënibua ꞌaínbi atu nëbëtsi ꞌitiokin ꞌakë ꞌiti ꞌikën, anun ka bëtsi menu ꞌikë unikaman ꞌunánti ꞌikën, ꞌën kana Israel unikama ꞌën ñu upíira ꞌakësokin kaisakën kixun.