Éxodo 11 - Kashibo-Kakataibo Biblia

Unin rëkuë́n bëchikë ꞌimainun ñuinakaman rëkuë́n tuákama këñuti kia ñuikë bana

¹ Nukën ꞌIbun ka Moisés kakëxa: —ꞌAínbi kana amiribishi bëtsi ñu ꞌatëkënin faraón ꞌimainun egipcio unikaman isnun. Usa okëxun iskin ka mitsu kuantanun xuti ꞌikën, mitsúxbi kuantanun xukinma ka anbi mitsu ënuax kuantanun chikínti ꞌikën.

² ꞌAínbi kamina Israel unibu bëbu ꞌimainun, xanukama ësokin kati ꞌain, a ꞌurama ꞌikë unikama ꞌimainun xanukama ain ñu ñukanun kamina kati ꞌain, kuri ꞌakë ñu ꞌimainun manë uxua ꞌakë ñukama ꞌinanuan ñukánun kamina kati ꞌain.

³ Nukën ꞌIbun ka egipcio unikama Israel unibu nuibairanun sinánmiakëxa. Usa omainun ka faraón an ñu ꞌaxunkë unikamaribi Moisés ain bana tankin cha ꞌimiakëxa, usomainun ka Egiptonu ꞌikë unikamaribi ami rakuë́akëxa.

⁴ Ashikin ka Moisésnën aín xubunuxun ꞌapu faraón kakëxa: —Ësai ka Nukën ꞌIbu kiaxa: Ënë ñantan imë́ naëx, kana kamabi Egipto menu kuainakëti ꞌain,

⁵ usai ꞌikëbë ka faraónën rëkuë́n bëchikë axa aín papasaribi ꞌapu ꞌiti a ꞌimainun egipcio unikaman rëkuë́n bëchikëkama axribi këñuti ꞌikën, ꞌimainun ka an ñu ꞌaxunkë xanu ꞌain rëkuë́n tuá an ñu rëni tëkë aín tuakamaxribi këñuti ꞌikën. ꞌImainun ka kamabi ñuinakan rëkuë́n tuákamaribi këñuti ꞌikën.

⁶ Usaia ꞌikëbë ka kamabi Egipto menuax, uni rarumati sharati inti ꞌikën, uinsaranbia anun usai ꞌiama anun ka usai ꞌitëkëntima oi ꞌiti ꞌikën.

⁷ ꞌImainun ka mitsunmi uisakin kara Nukën ꞌIbun egipcio unikama bëtan sënë́ma inun Israel unikama ꞌimia kixun ꞌunánun achúshi kamunanbi uni ꞌanan ñuina israel unikaman ꞌarakakë ñuina abi banotima ꞌikën.

⁸ Usai ꞌikëbë ka an mi ñu ꞌaxunkë min unikama ënu uti ꞌikën, usa aín ka rantinpuruni tsóbukin aín ꞌapu ꞌakësokin ꞌë ñukákanti ꞌikën: Ënuax kuankin, kamina min unikama buánti ꞌain. ꞌUsakin ꞌë ꞌakëma ꞌaish kana kuantima pan ꞌain. Usakin katankëx ka Moisés faraónën xubunuax nishkë ꞌaish chikíakëxa.

⁹ Chikíkiani kuankë ꞌikë ka Nukën ꞌIbun Moisés kakëxa: —ꞌApu faraónën ka mitsun kakëxunbi kuaisama tanti ꞌikën, usai ꞌikëbëtan kana ꞌën ꞌaisamaira atun iskëma ñu Egipto menu ꞌati ꞌain.

¹⁰ Usakian kakëxun ka Moisés ꞌimainun Aarónën ꞌapu faraónën ismainunbi an iskëma ñu ꞌakëxa, ꞌaínbi ka Nukën ꞌIbun usaía ꞌinun ꞌimikë ꞌixun ꞌain nuitu iruarakin faraónën Egipto menu ꞌikë Israel unikama kuantanun xuama ꞌikën.