Eclesiastés 11 - Kashibo-Kakataibo Biblia

Uisa ñu karamina inúti ꞌai kixun ꞌunánimabi kamina upíokin sinani të́ti ꞌain

¹ Mix bakan nikin nuntin ñu marui tëmërai nikë ꞌixun kamina mix; usai ꞌi tëkë anun karamina ñuñu ꞌi kixun ꞌunánti ꞌain.

² Mix kuríkiñu ꞌianan ñuñu ꞌixun kamina min ishi nankinma bëtsinu bëtsinu nanti ꞌain, usokëx ka min nankë ax këñúkëbëbi amanumi nankë ax mix ꞌatima ñu inúkëbëbi min nankë ñukama ax bëtsinu ꞌiti ꞌikën.

³ Nëtë kuin tunan kuatsinkë ax ka menu ꞌuí ꞌibúnuxa ꞌikë ꞌikën. ꞌIanan ka i aín tsipumiu ki bëukutia ꞌikatsi aín rëbumi ki bëukutia, ax uimiu kara bëukuaxa anubi rakatia.

⁴ Uix kara ñu mëëimabi uisa ñu kara inuti ꞌikë kixun sinánishi tsótia, ax ka anun ñu ꞌapáxun ain bimi biti nëtëkama inútamainun ñu mëëimabi tsótishi sinania.

⁵ ꞌIanan ka uínbi uimiu kara suñu bëkia kixun ꞌunanima, ꞌimainun ka uisari kara tuá aín titan puku ꞌukëmëu ꞌiruia kixun ꞌunanima, usaribi okin ka unin Dios kamabi ñu an unio an kara uisokin ñu ꞌaia kixun ꞌunanima.

⁶ Min ñu ënxë ꞌapákin kamina ñantámashi ꞌati ꞌain, ꞌapunkin kamina xupinbukëbëtanribi ꞌapáti ꞌain, ꞌaínbi ka uin kara bari kuabuti ñantabukëbëtan ꞌaia an ka aín ñu bëru ꞌapákin këñuima, usa ꞌaínbi ka uínbi ꞌunanima uinu ꞌikë ax pain kara upiti bimiti ꞌikë, a pain ꞌapákë ax ꞌima kara tsiankin ꞌapákë ax ꞌiti ꞌikën, a pain ꞌapákë an ꞌakëbëtanma kara tsiankin ꞌapákë an upíokin tuati ꞌikën, ꞌakima kara ꞌaisamaira ꞌitánun a rabë́xunbi tuati ꞌikë kixun ka ꞌunanima.