Deuteronomio 33 - Kashibo-Kakataibo Biblia

Ashikin Moisésnën Israel unikama upíokin sinánxunkin ká bana

¹ Anúan ñuti nëtë ꞌurama ꞌain ka aín uni ꞌiti Diosan kaískë ꞌixun Moisésnën upíokin sinánxunkin Israel unikama

² ënë banakama ësokin kakëxa: Nukën ꞌIbun ka aín bashi Sinaí kakë anuxunbi Seír kakë me anu bukukëbi nu pë́kakëxa. Pë́kaquin ka aín kushin barin urukin pë́kabëtsinkësokin aín bashi Parán kakë anuxunbia aín kushin pëkakë ax Meribá-Cadés anubi sënë́ankëxa; usai ukin ka unían aín mëkënan tuínxun ñu bëkësa obëtsinkin ax kushiira ꞌixun a tanti aín bana bëakëxa.

³ Nukën ꞌIbun ka aín unikama nuibatia, nuibanan ka uikaman kara aín bana kikësabiokin ꞌaia a bërúaia. Bërúanan ka uin kara a rabianan an kakë banakama kikësabiokin ꞌaia a ꞌakinia.

⁴ Moisésnën ka nukama a tanti Diosan bana Jacobnën rëbúnkikama ꞌinánkëxa,

⁵ ꞌinánkin ka anua Israelkaman kushibu timë́kë anuxun atun ꞌapu ꞌixun, israel unikama ñakaitsi ñakaitsi timë́kë akamaribi ꞌinánkëxa.

⁶ Rubén ñui ka ësai kiakëxa: ¡Rubénën rëbúnkikamax ka ñuima tsóti ꞌikën! ¡Aín aintsikama ꞌitsama ꞌaínbi kiax ka Moisés kiakëxa!

⁷ Usa ꞌain ka Judá ñui ësairibi kiakëxa: ꞌËn ꞌIbu aín bana kuakin kamina Judá aín aintsi kamakëñunbi; ami nishkë unikamama ꞌaia usa ꞌain min kushinbi ꞌakinti aín.

⁸ Usa ꞌain ka Moisés Leví ñui ësai kiakëxa: Minan ka Tumim ꞌimainun Urim ax ꞌikën ꞌën ꞌIbu; min kamina levitakamanribi min kikësa okin ꞌaia ꞌinan, atu kamina Masá kakë me anuxun tankën, tankin kamina anuxunmi min unikama ꞌumpax ꞌinan Meribá kakë anuxun ñukákën,

⁹ atun ka minmi ká banakama kikësabiokin asérabi ꞌaia ꞌanan ka achúshi ñu min atubëtan ꞌa ax kikësokinbi ꞌaia: Usakin ꞌai atux aín papa ꞌimainun aín tita ñui uinsaranbi kana atu iskëma ꞌai kiax kia; kianan ka aín xukë́nkamakëñun aín chirabakëkama: Ñuiribi atu kana ꞌunánima kia, kianan ka aín bakë bëchikë bëbu ꞌimainun xanukamaribi: ñui uin bëchikë kara atux ꞌikë kana ꞌunanima kiax kia.

¹⁰ Aín ñu mëëtinëx ka Jacobnën rëbúnki Israel unikama a tanti bana kikësabiokin ꞌanun ꞌunánmiti ꞌikën; ꞌimainun ka anuxun a rabikin ñuina xaroti xubusa okin ꞌakë anuxun ꞌaímai këñutia chimapusa ꞌitánun anuxun ñuina xaroti ꞌakë anuxun ñuina xaroia.

¹¹ Usa aín kamina mix atun ꞌIbu ꞌixun upíokin sinánxuni, atun ñu mëëxunkëx chuámarua tani kuëënti ꞌain. ꞌIanan kamina ax atumi nishkë unikama ꞌanun ꞌamianan amiribishia atubë ꞌakananun ꞌamitima ꞌain, kixun ka Moisésnën Dios kakëxa.

¹² Usa aín ka Benjamín ñui ësai kiakëxa: Nukën ꞌIbun nuibakë uni ax ka upitax tsotia; usa ꞌikë ka Diosan ënkinma abi mitsu ꞌakinti ꞌikën. ¡Usokin an ꞌakinkëx ka upitax bukuti ꞌikën!

¹³ Ësairibi ka Josénën bakë bëchikë rabë́ ñui kiakëxa: Nukën ꞌIbun ka anua tsóti me anua upíokin sinánxukin, ꞌuí ꞌibúkin chabókë axa me ꞌukëmëu kuani ꞌumpax upíira i baka ꞌianan xëxá upíira atunu ꞌinun ꞌimiti ꞌikën,

¹⁴ ꞌimikëbëtan ka atun kamabi baritia ñu ꞌapákëxa upíirabu ꞌinun, Diosan ꞌimikëx tuaia bianan anun biti ꞌuxë ꞌikëbëtan pëkëtia biti ꞌikën,

¹⁵ ꞌimainun kana ꞌën me sapan aín bashi bërámabi këñutima oi unia, anu ꞌapákëxa ꞌaisamaira ꞌinun tuaia atun biti kuëënin,

¹⁶ usa ꞌain ka ain menu ꞌapákëxun a piti ñun ꞌaisamaira ꞌitánun upíokin tuati ꞌikën, ꞌimainun ka axa tsi rëkirukësari i pëñanakëkënu mërakin aín unikama ꞌakinun ꞌë ká anbi ka aín xukë́nkama kaiskima José aín xukë́antun ꞌapu ꞌiti kaisakëxa.

¹⁷ Ax ka a paian aín titan tuákë vaca bënë upíira bërí ꞌikën, usa ꞌaish ka vaca bënë raëkëma kushiira ꞌixuan, aín manchanën uni ꞌakësaribi okin abë ꞌakanankin kamabi menua unikama abë ꞌakanankin ꞌati ꞌikën. Usaribi ka Efraínën aintsikama ꞌaisamaira ꞌiti ꞌikën; ꞌimainun ka Manasésnën aintsikamaribi ꞌaisamaira ꞌaish tupuntisamaira ꞌiti ꞌikën.

¹⁸ Ësairibi ka Zabulón ꞌimainun Isacar ñui Moisés kiakëxa: Zabulónën rëbúnkikamax ka bëtsi menu aín ñu maruti kama buani kuëënti ꞌikën, ꞌimainun ka Isacarnën rëbúnki kamaxribi, xubusa okin ꞌakë chupanu ꞌixun an ꞌarakakë ñuinakama bërúai ꞌiti ꞌikën.

¹⁹ Usa ꞌixun ka kamabi menu ꞌikë ꞌain aintsikama kuëntankëxun abëtan, anuxun Dios rabikin ñuina xaroti, aín bashi anuxun xaroti ꞌikën; usakian ꞌakëbë ka bëtsi menu aín ñu marui kuanxuan bikë ꞌaisamaira kupíkë ñu ñuribi ꞌiti ꞌikën.

²⁰ Ësairibi ka Gad ñui kiakëxa: ¡Diosan ka Gadnën rëbúnkikama chaiira me ꞌinánti ꞌikën, ꞌinánkëxun ka asábi ka min kamina chaiira me nu ꞌinan kixun a rabiti ꞌikën! ꞌIanan ka paru ꞌinúan aín xanun unëax aín piti binux rakáxun ñuina aia bërúankësa usaribi okin ax ami nishkë unikama abë ꞌakananxun kaínti ꞌikën.

²¹ Usa ꞌain ka ainanbi ꞌinun bëtsi ñaká Israelkama me ꞌinánkin aín kushibunën, Gadnën rëbúnkikama ꞌapunan ꞌiisa me ꞌinánti ꞌikën. Anuxun ka aín ꞌapun kakësokin ꞌanan; Nukën ꞌIbun bana kikësokin Israel unikama ꞌakinti ꞌikë kixun ka Moisésnën kakëxa.

²² Ësairibi ka Dannën rëbúnkikama kai kiakëxa: Dan ax ka achúshi paru ꞌinúanën tuá aín bënësa ꞌiti ꞌikën: Usa ꞌaish ka aín suntárunëx Basán kakë me anuax ami nishkë unikama abë ꞌakanankin ꞌanux tsuákiruti ꞌikën.

²³ Ësairibi ka Neftalí ñui kiakëxa: Nukën ꞌIbun ka Neftalí kakë uni aín aintsikama upíokin ꞌakinti ꞌikën; usa ꞌikë ka Diosan ꞌaisamaira ꞌinun upíokin sinánxunkin, ¡aín rëbumi ꞌianan amiaxa bari urukë amiokin me këñunbi anua ꞌikë baka atunan ꞌinun ꞌinánti ꞌikën!

²⁴ Ësairibi ka Aser ñui kiakëxa: ꞌËn ꞌIbu ꞌëx kana aín xukënkaman ꞌitsaira kuëëinrakë ꞌikë mi min Jacobnën bakë bëchikë Aser ënë upíokin sinánxunti kuëënin, Jacobnën bakë bëchikë raírinën rëbúkikama ꞌakësamaira okin. ꞌAnan kamina atun ꞌapákë olivos kakë i bimi ꞌaisamaira ꞌain, aín xënixribi ꞌitsaira atunu ꞌinun ꞌimiti ꞌain;

²⁵ ꞌimainun ka ain xëputi anúan ain ëmanu atsínti ꞌakë ax manë ꞌakë ꞌiti ꞌikën, usa ꞌain ka anun ax ami nishkë unikama atsintisama okin ꞌakë ꞌain tsóti ꞌikën, usai ꞌi ka Asernën rëbúkikama atux uni aín kushibu ꞌaish tsóti ꞌikën.

²⁶ Usa ꞌain ka anuishi sënë́nkin Moisésnën Israelkama ësokin kakëxa, nun Diosaribi bëtsi dios ka ꞌaíma ꞌikën, nun Dios ax ka kushiira ꞌaish raíri dios kamasamaira ꞌikën, ax ka naínu ꞌikë nëtë kuin mëu kushiira ꞌaish mitsu ꞌakini ꞌuti ꞌikën.

²⁷ Nukën ꞌIbu Dios axa këñutima oi tsókë an ka mitsu ꞌakinti ꞌikën; an ka ax kushiira ꞌixun ënkinma nu ꞌakinia, usa ꞌixun ka an numi nishkë uni abámitankëxun, këñukin ꞌanun nu ꞌamiakëxa.

²⁸ Usa ꞌain kamina mitsux Diosan ꞌakinkëx ami katamëti tsóti ꞌain, ꞌimainun ka mitsun rëbúnkikamaribi uínbi ubíokëma upitax bukui kuëënun ꞌimiti ꞌikën. ꞌImianan aín menu atun ꞌapákëx trigo a piti ꞌaisamaira ꞌianan ka a xëati uvas baka ꞌakë aribi ꞌaisamaira ꞌiti ꞌikën, usai ꞌikëbë ka ꞌuíribi a menu an ñu ꞌapákëkama chabóti ax ꞌibutíma ꞌima ꞌibúti ꞌikën.

²⁹ Israel unikama mitsux kamina Nukën ꞌIbun ka nu ꞌakinia kixun sinani kuëënti ꞌain, ¿uinu ꞌikë ëmakamax kara mitsun ëmabë sënë́nti ꞌik? Nukën ꞌIbu Diosanbi ka mi ië́miaxa usa ꞌixun ka bërúanan mi ꞌakinia; ¡an ka ax numi nishkë unikamabë ꞌakanania nu ꞌakinti ꞌikën! Usakin ꞌakinkëxun ñusmokin mitsun ꞌakëx ka atun rabiakakë a mitsumi rakuë́ti nëtë́ti ꞌikën.