Deuteronomio 31 - Kashibo-Kakataibo Biblia

Moisésnën an ꞌakësaribi okin Israel unikama ꞌakinun Josué anëa bana

¹ Amiribishi ka Moisésnën Israel unikama atubë banakin, ësokin katëkëankëxa:

² ꞌËx kana bërí ciento veinte baritiañu ꞌain, usa ꞌaish kana uni kaniakëti ꞌikësabi kushi kiani me ꞌabiani ꞌurakuani nikin mitsu ꞌakinsama ꞌain. ꞌIanan ka Nukën ꞌIbun ꞌëx isana Jordán kakë baka sikarakëti kuantima ꞌai kixun ꞌë kaxa.

³ Usa aínbi ka Nukën ꞌIbu Diosan kuania mitsu ꞌakinti ꞌikën anu ꞌikë ëmakamanu ꞌikë unimi aín me binuxumi abë ꞌakanankin këñukin ꞌanun ka mitsu ꞌamiti ꞌikën. Josuénën ka ax ꞌapu ꞌixun Nukën ꞌIbun kakësabiokin mitsu buánti ꞌikën.

⁴ Usai mitsux kuankëbëtan ka Nukën ꞌIbun Sihón ꞌimainun Og amorreo kaman ꞌapumi mitsun aín suntárukama këñunbi abë ꞌakanankin ꞌasaribiokin ꞌanun mitsu ꞌamiti ꞌikën.

⁵ ꞌImainun kamina uínsaran kara Nukën ꞌIbun a ëmakama ꞌanun mitsu ꞌamia anun atubë ꞌakanankin ꞌën mitsu kakësabiokin ꞌati ꞌain.

⁶ Mitsux kamina kushi sinánñubu ꞌaish rakuë́ ꞌitima ꞌain; usai ꞌikamina atubë ꞌakanankin ꞌai atumi rakuë́tima ꞌain, usakin ꞌaia ka Diosan ënkinma abi atu ꞌanun mitsu ꞌakinti ꞌikën.

⁷ Usakin pain atu katankëxun ka Moisésnën Josué kuënxun kamabi Israel unibunën kuamainun ësokin kakëxa: Min kamina rakuë́tima kushikin ënë unikama a ꞌinánuxuan sinántëkëntima okin Nukën ꞌIbun nun chaitiokëkama ka me a binun ꞌakinti ꞌain.

⁸ Nukën ꞌIbun ka mi kuania ꞌakinkin ëntima ꞌikën, usa ꞌain kamina rakuë́kin; kana ꞌaíma kixun sinántima ꞌain.

Anun uni ribinkëkama mëníoti bari ꞌikëbëtan ka ax kikësabiokin ꞌati ꞌikë kixun Moisésnën ka bana

⁹ Usa ꞌain ka Moisésnën ax kikësabi ꞌiti bana a kuënëotankëxun sacerdote levita unikama an bunántisa okin ꞌakë kurin ratakakakë anua achúshi ñu ꞌati kikë bana kuënëokë Nukën ꞌIbun kirika anu ꞌarukë an ꞌiaxun buánkëkama a ꞌimainun Israel unikaman kushibu atubëtanbia bërúanun kixun ꞌinánkëxa,

¹⁰ ꞌimainun kana ësokinribia ꞌanun kixun kakën: Mapai achúshi ꞌimainun rabë́ baritia ꞌikëtibi kamina anun mitsun ribin mënioi a nëtë inuti ꞌuta ꞌatankëx anu ꞌikin achúshi fiesta ꞌai ꞌikanti ꞌain,

¹¹ usa ꞌain ka Israelkamaxa xubusa okin ꞌakë anuxun Dios rabiti anu timëkankë ꞌain ka usai ax kikësabi oi ꞌiti bana kuënëokë a kamabi unían kuamainun ñuiti ꞌikën.

¹² Usa ꞌain ka kamabi Israel unikamax anu timë́ti ꞌikën uni, xanu, uniakë ꞌimainun bëtsi menu ꞌikë uni mitsubëa tsókë akamaxbi ka, ax kikësabi ꞌiti bana ꞌaia kuati ꞌikën, kuankin ꞌunánkin ka Nukën ꞌIbu Dios kikësabiokin ꞌanan kamabi aín banakama kuënëokë kikësabiokin ꞌati ꞌikën.

¹³ Usa ꞌain ka mitsun bakë bëchikëkama, an ënë bana kuakëma atúnribi ñuixunkëxun kuankin upíokin ꞌunani Dios kikësabiokin ꞌain upiti xënibua ꞌaínbi Jordán kakë baka shitákiani kuanxua biti me anu tsókin ꞌati ꞌikën.

Ashikian Nukën ꞌIbun Moisés ka bana

¹⁴ Katankëxun ka Nukën ꞌIbun Moisés ësokinribi katëkëankëxa: Ka kuat, anun mi ñuti nëtë ka ꞌurama kuatsinia; usa ꞌain kamina Josué kuënbiani mi rabëtaxbi xubusa okin ꞌakë chukúma anuax ꞌëbë mërananti anu kuanti ꞌain, ꞌën usai ꞌiti banakama mi ñuixunun. Usakian kakëx ka Moisés ꞌimainun Josué xubusa okin ꞌakë anu kuankëxa,

¹⁵ kuankë ꞌain ka anuax Nukën ꞌIbu achúshi nëtë kuinsa anu mërati xubusa okin chupa ꞌakë aín xëkuënubi nirakëakëxa.

¹⁶ Usai nirakëan ka anuxun Nukën ꞌIbun Moisés kakëxa: Ënuax ꞌitsama nëtë ꞌikëbë kamina mix ñuti ꞌain, usaími ꞌikëbëtan ka ënë unikaman ꞌën bana kikësabiokin ꞌakima atúan biti me anu ꞌikë unikaman rabikë dios a rabikin ꞌë rabiti ënkin achúshi ñu ꞌën manutima okin atu ꞌaxunkëkama manukin bëtsi ñu ꞌati ꞌikën.

¹⁷ Usai ꞌikëbë xuamati nishkin kana atu ënti ꞌain; ëntankëx kana uisaxbi atumi sinántëkëntima ꞌain, usa aín ka atunu ꞌaisamaira ñu ꞌikëbë atux tëmërai, kananti ꞌikën: ¿Nuxnu ësai tëmërakë ënëx kara mitsun sinánkëx nun Diosnu ënkë kupínnu ꞌikë ꞌik?

¹⁸ ꞌAínbi kana usai atux ꞌiti nëtë ꞌikëbëa tëmërakëbëbi, ꞌëx atian ira atu ꞌura ꞌiti ꞌain, usai kana bëtsi dios rabi ꞌëmi ꞌuchakin ꞌaisamaira ñu ꞌakëbë ꞌiti ꞌain.

¹⁹ Bërí kamina anun kantati bana ënë ꞌën mi kamainun kuënëoti ꞌain, kuënëotankëxun kamina minbi Israel unibu anun ꞌëmi kantanun ꞌunamiti ꞌain, usa ꞌain ka a kanta kantakin uisai kara kia kuankin ꞌën atu kuainsama tania tëmëramikëxun a sinánti ꞌikën.

²⁰ Uínsaran karana aín chaitiokama kásabiokin a menu atsini unun ꞌimi anun ka sinanatëkëntima okin a anua a piti ñu ꞌaisamaira ꞌimainun a xëati buna rëpa ꞌaisamaira ꞌikë, a menuxun puchákin pianan xëai xuakanti ꞌikën, usai ꞌikinbi ꞌë rabiti ënkin bëtsi dios kamaishi rabiti ꞌikën, usakin ꞌai ꞌëmi manukin ꞌëx usai ꞌiti kia banakama manuti ꞌiti ꞌikën.

²¹ Uínsaran kara ꞌën ꞌimikëx ꞌaisamaira masátënëi bënëtia anun ka ënë kanta atun sinánti ꞌikën, usa ꞌain ka atun rëbúnki kamaxribi a kanta sinani anun kantati ꞌikën; ꞌën bërámabi a ꞌinánuxun ka me anu atsínxumabi ꞌatima ñuira ꞌati sinania kana atu ꞌunanin.

²² A nëtënbi kuënëoxun ka Moisésnën Israel unikama a kanta ꞌunánmiakëxa.

²³ Usakian ꞌakë ka Josué Nunnën bëchikë a Nukën ꞌIbun ësokin kakëxa: Josué mix kamina kushi sinanñu ꞌianan rakuë́ ꞌitima ꞌain, mix kamina ꞌën mi ꞌakinmainun an Israel unikama a ꞌinánuxun ꞌën ka me anu buani abë kuanti a ꞌain. Usa ꞌaish kana ꞌëx mibëbi ꞌiti ꞌain.

²⁴ Usa ꞌain ka Moisésnën a tanti banakama kuënëokin sënëonkëxa,

²⁵ ꞌatankëxun ka an bunántisa okin ꞌakë kurin ratakakakë anua achúshi ñu ꞌakë kuënëokë ꞌarukë Nukën ꞌIbunan an nikinkë, Levitas unikama aturibi kakëxa:

²⁶ ꞌËn kuënëokë a tanti bana ënë kamina mitsu ꞌinámainun bunántisa okin ꞌakë kurin ratakakakë rapasu anua Diosan achúshi ñu ꞌakë kikë anu nankanti ꞌain, anu nankë ax ka mitsun usai kananuna ꞌiakën kixun anua ꞌunánti ꞌiti ꞌikën.

²⁷ ꞌËnbi kana upíokin ꞌunan mitsux kamina bana kuati ꞌunánmaira ꞌain; usa ꞌaish kamina ꞌëx mitsubë aínbi Nukën ꞌIbumi ꞌuchakën, ¿Usa ꞌaish karamina ꞌëx ñukëbë uisaira ꞌikanti ꞌain?

²⁸ Usa ꞌain kamina uni an bana ꞌunánkë unikama ꞌimainun kamabi ñaká achúshi achúshi unikama ain ꞌapu ꞌën ësokin mitsu kanun timë́ti ꞌain, naí ꞌimainun men ka unin kuakësa ꞌitánun kuati ꞌikën, usa ꞌain kana ꞌën mitsu ësokin kain.

²⁹ ꞌËn kana ꞌunánin ꞌëx ñukëbëtan kamina bëtsi bëtsi ñu ꞌakin ꞌën usai ꞌiti ñuixunkë banakama mitsun ënxun ꞌain; ꞌimainun kana ꞌunanin mitsun bakë bëchikëkamaxribi ka ꞌatima ñu ꞌai ꞌitsaira tëmëranuxun ꞌaia, usai ꞌikin kamina mitsun Nukën ꞌIbu nishminuxun ꞌain kixun ka Moisésnën atu kakëxa.

Moisés kanta bana

³⁰ Usa ꞌain ka Moisés aín pëukë anuaxbi kantakin pëutankëx kamabi Israel unikaman timëkamë ꞌëoxun kuamainun sënën oi kantakin ꞌunánmiakëxa: