2 Tesalonicenses 3 - Kashibo-Kakataibo Biblia

II. PABLONËN ꞌËSËA BANA (3) Nucën Papa Dios camina nu ñucáxunti ꞌai quixuan Pablonën ca

¹ Nucën xucë́antu, ësaquinribishi cananuna mitsu cain, camabi menu ꞌicë unicaman nun Jesucristo ñuiquin bana ñuixunia cuanun camina Nucën Papa Dios nu ñucáxunti ꞌain, nun mitsu bana ñuixuncëxun cuaquinmi —a banax ca upíira ꞌicë —quixun caquin mitsun ꞌacësaribi oquian atunribi sinánun.

² ꞌImainun camina an ꞌatima ñu ꞌacë ꞌaisama unicaman nu ubíoxunma ꞌanun Nucën Papa Dios nu ñucáxunti ꞌain. Camabi uníxira ca Jesucristomi catamëcëma ꞌicën,

³ usa ꞌaínbi ca Nucën ꞌIbu Jesusan aín quicësabi oquin mitsu ami catamënun cushioquin, ñu ꞌatima ꞌaxunma ꞌanun bërúanti ꞌicën.

⁴ Cananuna ꞌunanin, Nucën ꞌIbu Jesucristonën ꞌaquincëxun camina mitsúnmi nun cacëxun bërí ꞌacësabi oquin ënquinma ꞌati ꞌai quixun.

⁵ Nucën ꞌIbu Jesucristonëan —Nucën Papa Diosan ca asérabi mitsu nuibatia —quixun upí oquin ꞌunánan, ax ꞌicësaribiti uisa ñu cara ꞌicëbëbi bënë́quinma tanshiti ꞌunánun mitsu ꞌaquinti cananuna cuëënin.

Axa Jesucristomi catamëcë unicaman ca ñu mëëti ꞌicë quixun Pablonën ca

⁶ Nucën xucë́antu, Nucën ꞌIbu Jesucristonën nu sinánmicësabi oquin cananuna mitsu cain, ui unin cara Jesucristomi catamëcë ꞌixunbi nun mitsu ꞌunánmicësabi oi ꞌiisama tanan ñu mëëtisama tania, abë camina ënananti ꞌain.

⁷ Mitsúnbi camina ꞌunanin, uisai caramina nux ꞌicësaribiti ꞌiti ꞌai quixun. Mitsubë ꞌaish cananuna ñu mëëima ꞌicëma ꞌain.

⁸ Cupíoquinma cananuna unin piti picëma ꞌain. Nun mitsun piti ꞌimainun mitsun curíqui cëñuti rabanan cananuna nëtën ꞌanan imë́ribi tëmërai atsánquinbi ñu mëëan.

⁹ Mitsúnmi nu cupíoquin mitsun piti ꞌimainun mitsun curíqui ꞌináncëxun nun biti ca asábi ꞌitsíanxa. Usa ꞌaínbi cananuna, mitsúnribimi nun ꞌacësaribi oquin ꞌanun, nun cuëëncë ñu binuxun nunbi ñu mëëan.

¹⁰ Mitsubë ꞌixun cananuna ësoquin mitsu can, an ñu mëëtisama tancë uni an ca pitima ꞌicë quixun.

¹¹ Ësaquian mitsu ñuicania cananuna cuan, micama raírinëx ismina ñu mëëimabi bana ñuibëquinishi nitsi quixun.

¹² Usa unicama cananuna Nucën ꞌIbu Jesucristonën nu sinánmicësabi oquin ꞌësëquin cain, atun cuëëncë ñu binuxun ca uni itsi ubíoquinma atúnbi ñu mëëti ꞌicë quixun.

¹³ Nucën xucë́antu, camina unicamaxa chuámarua bucunun ñu upí ꞌati, a ꞌaisama tanquin ëntima ꞌain.

¹⁴ Ui unin cara nun cuënëocë bana ënë ënxun nux quicësabi oquin ꞌaisama tania, a unibë camina nitima ꞌain, axa rabíntanun.

¹⁵ ꞌAíshbi camina abë nishanantima ꞌain. Nishananquinma camina nun bana quicësaribi oquin ꞌanun ꞌësëti ꞌain, nun xucë́nu ꞌacësaribi oquin.

Upí oquin sinánxunquian ashiquin Pablonën bërúanxa ꞌinun ca

¹⁶ Nucën ꞌIbu Jesucristo, an aín unicama bënëtima chuámarua ꞌinun ꞌimicë, anbia mitsúxribimi uisa ñu cara ꞌicëbëbi camabi nëtë chuámarua ꞌinun mitsu ꞌimiti cana cuëënin, axbi mitsubë ꞌiquin mitsu bërúanti cana cuëënin.

¹⁷ ꞌËx Pablo ꞌixun cana ꞌën mëcënanbi cuënëoquin bërúanxmi ꞌicanun quixun mitsu cain. Ënë isquin camina ꞌunánti ꞌain, ënëx ca Pablonëan cuënëocë ꞌicë quixun. Ësoquinshi cana cuënëoin.

¹⁸ Nucën ꞌIbu Jesucristonën nuibaquin ꞌaquincëxmi mitsux upitax bucuti cana cuëënin. Ashi, Pablo.