2 Tesalonicenses 1 - Kashibo-Kakataibo Biblia

Pablonëan abë ꞌicë unicamabëtan Tesalónicanuaxa ax Jesucristomi catamëcë unicama quirica cuënëoxuan

¹ ꞌËx Pablo ꞌixun cana Silvano ꞌimainun Timoteobëtan, Tesalónica ëmanuaxmi Nucën Papa Dios ꞌimainun Nucën ꞌIbu Jesucristonan ꞌicë, mitsu ënë quirica buánmin.

² Nucën Papa Diosbëtan Nucën ꞌIbu Jesucristonën nuibaquin chuámarua ꞌaíshmi bucunun mitsu ꞌaquinti cananuna cuëënin.

I. JESUCRISTO UTËCËNTIA PABLONËN ÑUIA BANA (1.3-2.17) Cristo utëcëncëbëtan Nucën Papa Diosan, ꞌuchañu unicama uisa cara oti ꞌicë quixun isti bana

³ Nucën xucë́antu, mitsu sinánquin cananuna nëtë́quinma —asábi ca —quixun caquin Nucën Papa Dios rabin. Mitsux camina bëráma ꞌicësamairai Jesucristomi catamëanan bëtsibë bëtsibë nuibananin. Usaími mitsux ꞌicëbëtan nun Nucën Papa Dios —asábi ca —caquin rabiti ca asábiira ꞌicën, anbi mitsu upíira oquin sinánmicë cupí.

⁴ A rabianan cananuna camabi ëmanuxun axa Jesucristomi catamëcë unicamaxa timë́cë mitsu ñuiquin ësaquin cain, mitsux camina unían ubíonan bëtsi bëtsi ocëx tëmëraquinbi tanshianan, uisa ñu cara ꞌicëbëtanbi ëníma Jesucristomi catamëti quixun.

⁵ Ainan cupí usai tëmëratancëxmi mitsux aín nëtënu abë ꞌinuan an mëníocë cupí camina ꞌunánti ꞌain, Nucën Papa Dios ax ca asérabi aín sinan upí ꞌicë quixun.

⁶ An mitsumi nishquin mitsu tëmëramicë unicama a usaribi oquin Nucën Papa Diosan tëmëramiti ca asábi ꞌicën.

⁷ Usoquin ꞌanan aín ángelnën cushicamabëtan, tsi rëquirucësa ꞌixuan pëcacë nëbë́tsi, Nucën ꞌIbu Jesús naínuax ucëbëtan, an nucëñun unían tëmëramicë ꞌicëbi mitsu chuámarua ꞌimiti ca asábi ꞌicën.

⁸ Aín ángelnën cushicamabë utancëxun ca Nucën ꞌIbu Jesusan ui unicaman cara ami catamëisama tancë ꞌixun Nucën Papa Dios ꞌunáncëma ꞌicë, acama uisa cara oti ꞌicë usoquin ꞌati ꞌicën.

⁹ Usoquian xënibua ꞌaínbi cëñútimoquin ꞌaisamaira oquin castícancë unicamax ca Nucën Papa Diosan nëtë upí, aín cushían pëcacë, anu Nucën ꞌIbu Jesúsbëma ꞌaish, a ꞌura ꞌianan aín cushin ꞌaquincëma ꞌiti ꞌicën.

¹⁰ Usai ca ꞌiti ꞌicën, a nëtë anúan Nucën ꞌIbu Jesucristo uti, aín unicaman —upíira ca Nucën ꞌIbu Jesucristo ꞌicë —quixun ami sinani cuëënquin a rabinun. Mitsúnribi nun aín bana ñuixuncëxun cuati ami catamëcë ꞌixun camina aín unicamabëtanbi cuëënquin a rabiti ꞌain.

¹¹ Usai ꞌiti cupía ainan ꞌinun caíscë ꞌixun usai ca aín uni ꞌiti ꞌicë quixun an sináncësabi oi ꞌinun mitsu ꞌiminun cananuna Nucën Papa Dios mitsu nëtë camabi ñucáxunin. Ñucáxuanan cananuna ax cuëëncësabi oquinmi mitsun upí ñu ꞌaisa tancë acama ꞌanan ami catamëtia an mitsu sinánmicëxunmi upí oquin ꞌanun aín cushínbi mitsu cushionun quixun a ñucatin.

¹² Usaquinmi mitsun ꞌacëbëtan ca Nucën ꞌIbu Jesucristo, ax asérabi upí ꞌianan cushiira ꞌicë ꞌunánquin unin rabiti ꞌicën. Rabicëbëtan ca mitsúxribi Jesucristosa ꞌicë unin isti ꞌicën. Nucën Papa Dios ꞌimainun Nucën ꞌIbu Jesucristo an mitsu nuibaquin ꞌimicëx camina mitsux usa ꞌiti ꞌain.