2 Reyes 5 - Kashibo-Kakataibo Biblia

Naamán kakë uni nami chëkimikë ꞌinsínñu ꞌaíshbi pëxkúa ñuikë bana

¹ Anu ka achúshi uni Naamán kakë Sirianu ꞌikë ꞌapun suntárukaman kushi ꞌiakëxa a ka upíokin aín ꞌapun nuibakëxa, a unin ka Diosan ꞌakinkëxun Sirianu ꞌikë unikama axa ami nishkë unikaman ꞌaiabi an ira abámikin aín suntárukamabëtan ꞌakë uni ꞌiakëxa. Usa ꞌaínbi ka a unix an nami chëkimikë ꞌinsínñu ꞌiakëxa.

² Achúshi nëtën ka sirio unikamax israel unikamabë ꞌakanankëxa, ꞌakanankëbë abatia ka achúshi xanun tuá xuma ñatankëxa, ñatanbiankin ka sirianu buánkëxa buánkë ka Naamánnën aín xanun ñu mëëminun ꞌinánkëxa.

³ A xanu xuntakunën ka a ñu mëëxunkë xanu kakëxa: —Min bënën kara Samarianu ꞌikë an Dios kikë bana uni ñuixunkë unin kara an nami chëkimikë aín ꞌinsín pëxkunun ꞌakintima ꞌikë ñukati kuantima ꞌikën.

⁴ Ësakin kakëxua aín xanun kakëx ka Naamán usakian kakë bana aín ꞌapu ñuixuni kuankëxa.

⁵ Kuanxua ñuixunkëxun ka Sirianu ꞌikë ꞌapun kakëxa: —Asabi ka ꞌën kana mi xutin usa ꞌain kana achúshi kirika kuënëokë Israelnu ꞌikë ꞌapu buámiti ꞌain. Usokin kakëx ka Naamán kuankëxa. Kuankin ka treinta mil kuríki manë uxua ꞌakë bianan, seis mil kuríki kuri ꞌakë bianan mapai rabë́ chupa aribi anúan an bana ñuikë uni pëxkukëxun kupíoi kuanti akama biakëxa,

⁶ bibiani kuankin ka Israelnu ꞌikë ꞌapu kuënëoxunkë kirika anua ësai kikë a biakëxa: bixun ka ësai kinun kuënëokë a Israelnu ꞌikë ꞌapu buánxuankëxa: “Ënë kirika bikin kamina sinánti ꞌain ꞌën kana ꞌën suntárukaman kushi Naamán an nami chëkimikë ꞌinsín pëxkúnun xuti ꞌain kixun ꞌunánti ꞌain.”

⁷ Ësokin ꞌaxuan ꞌinánkëx Samarianu bëbax ka anua ꞌapu ꞌikë aín xubunu kuanxun ꞌIsraelnën ꞌapu kirika kuënëokë buánkë a ꞌinánkëxa, ꞌinánkëxun istánkëx ka Israel unikaman ꞌapu aín chupa tukai nishi kiakëxa: —¿ꞌËx karana an uni tsónun ꞌimianan bamanun ꞌimikë a ꞌain, ꞌapu ꞌitsían uni achúshi an nami chëkimikë ꞌinsin ꞌën pëxkunun ꞌënu xunun karana ꞌëx Dios ꞌain? ¡ꞌËn sinánkëxun sapi ka nubë ꞌakánanti barikin ësokin ꞌaia usa ꞌain kananuna upiti bërúankati ꞌain!

⁸ Ësaia ꞌapu an buámikë kirika a istánkëx aín chupa tukai kikë ꞌunánkin ka an Dios kikë bana ñuixunkë uni Eliseonën, ësokin ꞌapu katánun kamiakëxa: “¿ꞌËx Eliseo ꞌixun kana ësokin mi kain uisoti kaina min chupa tukan? A unix ka ꞌë isi uti ꞌikën, uxun ka Israel menu ka an Dios kikë bana uni ñuixunkë ꞌikë kixun ꞌunánti ꞌikën.”

⁹ Usakian kamikëxun ꞌapun xukëx ka Naamán caballonën nikinkë anu ꞌirukiani kuanx, Eliseo anu ꞌikë aín xubu xëkuënubi nirakëakëxa.

¹⁰ Usai anu kuankë ꞌaínbi ka Eliseonën ax kai chikikima an kati uni achúshi xuakëxa: “Xukëx kuanxun istankëxun ka a unin mapai achúshi ꞌimainun rabë́ oi kamina Jordán kakë bakanu nashiti ꞌain, usaími ꞌikëbë ka an nami chëkimikë min naminu ꞌikë ꞌinsin ax pëxkúti ꞌikë kixun kakëxa.”

¹¹ Ësokin kakëxbi ka Naamán ꞌaisamairai nishi ësai kikiani kuankëxa: —ꞌËn kana an bana ñuikë unia uisa kaina ꞌai kai chikíkin ꞌë bisa sinan, ꞌimainun kana ꞌëa aín ꞌIbu Dios ñukaxunkin aín mëkënan ꞌën ꞌinsínkë ramëkin an ꞌën nami chëkimikë pëxkutisa sinánkë ꞌian.

¹² ¿Usa ꞌain kara Damasconu ꞌikë Abaná ꞌimainun Farfar a bakakamax Israel menu ꞌikë bakakamasama upíbu ꞌiti ꞌit? ¿Uisa kupín karana ënu aima ꞌën ꞌinsínkë pëxkúnux anuax nashi kuankëma ꞌain? Usai ki ꞌitsaira nishkiani ka anuax kuankëxa.

¹³ ꞌAínbi ka an ñu mëëxunkë unikaman a ꞌurama okin kakëxa: —ꞌËn ꞌIbu, an Dios kikë bana ñuikë unían, ñu tëira ꞌanun kakëxun kaina, ¿min ꞌakë ꞌitsían? Usa ꞌain kamina an kakësabi oi nashi min ꞌinsínkëkama pëxkúti ꞌain.

¹⁴ Ësokian kakëx kuanx ka Naamán mapai achúshi ꞌimainun rabëti Jordán kakë bakanu an Dios kikë bana ñuikë unin kakësabi oi nashi nanëakëxa. Usaía ꞌikëbëshi ka aín nami bërí kanikë unin nami iskësa upíira ꞌinun pëxküakëxa.

¹⁵ Usai ꞌi pëxkukiani ka abëa kuankë unikamabë an bana ñuikë Eliseo isi anu kuankëxa. Kuanx anu bëbakin ka Naamánnën kakëxa: —¡Bërí kana ꞌën upíokin ꞌunanin kamabi menu ka Dios ꞌaíma ꞌikën, ꞌaínbi ka Israel menushi achúshi Dios ꞌikën! Usa ꞌain kamina an mi ñu ꞌaxúnti uni ënën mi ñu ꞌinaishikaskëxun ꞌëmi pëxkukë kupí bishiti ꞌain.

¹⁶ ꞌAínbi ka Eliseonën kakëxa: —A ꞌën rabikë Dios an ismainunbi kana ꞌën mi kain, usa ꞌain kana min ꞌinánkaskë ñu a bitima ꞌain. Usakin Naamánnën karaishikëxunbi ka Eliseonën kana min ñu bitsima kixun kakëxa.

¹⁷ Usakin kakëxunbi kuëëniama ka Naamánnën katëkëankëxa: —Min kamina ꞌën ꞌinaishikë ñu bisamatanin, usa ꞌain kana mi ñukatin ꞌë karamina caballo rabë́nu ꞌarutibëtan sënën Israel me ënua me chukúma ꞌë ꞌinántima ꞌain; an mi ñu mëëxunti uni ënën ka amiribishi ñuina ꞌaímai këñutanun bëtsi dioskama, xaroxuntëkënkima Dios ashi ñuina xaronxunti ꞌikën.

¹⁸ Usa ꞌaínbi kana Dios achúshi ñu ꞌatima ꞌën ꞌakë ashia ꞌë mëníoxunun ñukatin: ꞌën nëtënuxuan ꞌën ꞌapun anuxun bëtsi dios Rimón kakë rabikë xubunu a rabi kuankin buánkëx abë kuankëbëa ꞌapu rantinpuruni ꞌikëbë ꞌëxribi rantipurunkin rabikë a ka Diosan ꞌë mëníoxunti ꞌikën.

¹⁹ Ësokin kakëxun ka Eliseonën kakëxa: —Kamina upitax kuankin me chukúma buánti ꞌain. Usakian kakëx ka Naamán anuax kuankëxa. Kuania ꞌurikikiani kuankëbëtan ka

²⁰ Guehazí an Dios kikë bana ñuikë uni, Eliseo ñu mëëxunkë an sinánkëxa: “ꞌËn ñu mëëxunkë uni Eliseonën ka Naamán sirio uni an ñu bëxun ꞌinánkaskëxunbi añu ñubi bisamatanxa. Usa ꞌain kana Diosan ismainunbi ꞌishtuinshi nuibiani kuanxun, añu karana anua biti ꞌai isikuanti ꞌain.”

²¹ Kixun sinánbiani ka Guehazí Naamán kuankëbë a kaxú kuankëxa; kuania kaxú bësukin iskinbi mërai ka, caballonën nirinkë anuax ꞌibúkin ñukákëxa: —¿Uisa ñu ꞌatima kara inuax?

²² —Uisa ñubi ka ꞌikëma ꞌikë —kixun ka Guehazínën kakëxa—. ꞌAínbi ka ꞌën a ñu mëëxunkë uni an ësokin mi kanun ꞌë xuaxa, an Dios kikë bana ñuixunkë uni bëna rabë́ ka bëríbi Efraín menu ꞌikë bashi anuax uax bëbaxa, kixun mi kanun ka ꞌë xuaxa, usa ꞌain mi tres mil kuríki manë uxua ꞌakë ꞌimainun rabë́ ñusuti chupa a rabë́ ꞌinánun buánminun ka kiaxa.

²³ Kixuan kakëxun ka Naamánnën kakëxa: —Usama ka mi ꞌinámainun kamina seis mil kuríki manë uxua ꞌakë ënë timakima min biti ꞌain. Kixun kakin ka Naamánën ñusuti rabë́nu ꞌarukin chupa ió rabë́ aribi ꞌaruakëxa, ꞌarutankëxun ka aín uni rabë́ an Guehazín buánxuntanun kixun xuakëxa.

²⁴ Xukëbë abë kuanx aín xubunu bëbakin ka Guehazínën kuríki ꞌimainun chupa a bitankëxun an buánkë uni rabë́ a xuakëxa, xutankëxun ka aín xubunu kuríki ꞌimainun chupa a unëakëxa.

²⁵ Usokin ꞌatankëx ka an ñu mëëxunkë uni Eliseonu kuankëxa kuankë ka ñukákëxa: —¿Uinuax kaina mix aín Guehazí? —Kixuan ñukákëxun ka ꞌëx kana uinubi kuankëma ꞌai —kixun Guehazínën kakëxa.

²⁶ Kakëxunbi ka Eliseonën munuma banakin kakëxa: —Min kamina ꞌë paránima ꞌën kana Naamán axa mi kuania bitsi aín caballonën nirinkënuax ꞌibútia isan, ꞌën sinanëinshi kana anu mibë ꞌian. Usa ꞌaínbi ka bërí anun kuríki bianan a pañuti chupa bianan anun ñu ꞌapákë naë maruanan, anu uvas ꞌapákë naë bianan oveja, ꞌimainun vaca aín bënëkama bianan an ñu mëëxunti uni bianan xanuribi an ñu ꞌaxúnti biti nëtëma ꞌikën kixun ka kakëxa.

²⁷ Usa ꞌain ka an nami chëkimikë ꞌinsin Naamánnu ꞌikë ax minuribi ꞌiruti ꞌikë ꞌianan ka min rënbunki kamanuribi uínsaranbi nëtë́tima oi ꞌiruti ꞌikën. Usakian kakëx Eliseobë ënanakiani kuanishi ka Guehazí an nami chëkimikë ꞌinsin aín naminu matsi uxua iskësaira ꞌitánun ꞌiruakëxa.