1 Samuel 8 - Kashibo-Kakataibo Biblia

Israel unibu ꞌapuñu ꞌiti kuëëan ñuikë bana

¹ Kaniakëkin ka Samuelnën ꞌapu ꞌixun Israelkama ꞌakinti aín bakë bëchikëkama anëakëxa.

² Aín rëkuë́n bakë bëchikë, Joel kakin anëkë ꞌimainun ka aín bëchikë itsi Abías ax Beerseba anu ꞌapu ꞌiakëxa.

³ Usa ꞌaínbi ka aín bakë bëchikëkaman aín papa ꞌakësokin ñu ꞌaíma, ꞌitsaira ñuñu ꞌiti kuëënkin, unikama bëtsibë ꞌatima onankë a mëníoxunkinma a kupíonun kixun ꞌamikin upíokin ñu ꞌama ꞌikën.

⁴ Usa ꞌain ka kamabi Israel kaman ꞌapubu ax timëkiani Ramá kakë anuax Samuelbë mëranax banai rikiankëxa,

⁵ anu rikianxun ka ësakin kakëxa: “Mix kamina kaniakëkë uni xënira ꞌain, usa ꞌaínbi ka min bakë bëchikëkaman min ꞌakësabikin ñu ꞌaima; usa ꞌain kamina achúshi ꞌapu axa nukaman ꞌapu ꞌiti nu anëxunti ꞌain, bëtsi menu tsókë unikaman ꞌakësaribi okin.”

⁶ ꞌAínbi ka Samuelnën atun ꞌapu achúshi anëxunun kixun kakëxunbi atu kuëënxuama ꞌikën, kuëënkinma ka abë banakin Nukën ꞌIbu kakëxa. Israel kamax ka atun ꞌapu achúshiñu ꞌisatania kixun kakëxa;

⁷ kakëxunbi ka Nukën ꞌIbun ësakin kakëxa: “Añu ꞌaxúnun kara Israel kaman mi kaia usakinbi kamina ꞌaxúnti ꞌain, atúan min kakëxun kuaisama tankë ax ka min banama ꞌën bana kuaisama tankë ꞌikën, usai ꞌikin ka atun ꞌëx aín ꞌapu ꞌixun ꞌakinti kuëënkanima.

⁸ Anun Egipto menua ꞌën chikía a nëtën usakin ꞌë ꞌa ꞌixun ka usaribi okin mi bërí ꞌaia, usa ꞌixun ka bëtsi dioskama rabikin ꞌë manuaxa.

⁹ Usa ꞌain kamina, añu ꞌaxúnun kara mi kaia a ꞌaxúnti ꞌain; ꞌaínbi kamina ësokin pain atu kati ꞌain, axa atun ꞌapu ꞌiti uni an kara uisokin atu ꞌanuxun ꞌaia kixun ñukáti ꞌain.”

¹⁰ Usa ꞌain ka Samuelnën atun ꞌapu achúshi kuëënkëbëtan Nukën ꞌIbun usakin ꞌanun kakë a Israel unibu ñuixuankëxa.

¹¹ Ñuixunkin ka ësakin kakëxa: —Axa mitsun ꞌapu ꞌiti an ka ësokin mitsu ꞌati ꞌikën: Mitsun bakë bëchikëkama ka ësakin ꞌati ꞌikën, anuax ꞌakánanti caballonën nikinkë carreta anu rairi ꞌimainun ka, axa suntáru ꞌikësaribiti caballonuax ꞌakánanti raíri ꞌimiti ꞌikën, ꞌimainun ka aín patsan an ꞌapu ꞌikë suntáru ꞌixun a bërúanun ꞌimiti ꞌikën.

¹² ꞌImainun ka raírinëxribi aín ꞌapu ꞌixun an mil suntáru ꞌimainun cincuenta suntárunën kushi ꞌinun ꞌimiti ꞌikën. Usakin ꞌanan ka raíri mikama an me manë paránën tukaxun anu ñu ꞌapákë aín bimi binun bimiti ꞌikën, bimianan ka anun ꞌakanankë ñu caballonën nikinkë anun mëníoti ñukama aribi unionun ꞌamiti ꞌikën.

¹³ ꞌImainun ka mitsun ꞌini bëchikë xanukamaribi ñu mëëxunun ꞌimianan raíri an aín ro sanuira anuan ꞌiti ꞌaxúnti ꞌimianan an ñu ꞌaruxuanan an pán ꞌaxúnti akamaribi xanu ꞌimiti ꞌikën.

¹⁴ Usakin ꞌanan ka aina ꞌinun me aín upíira kaístankëxun ꞌibuati ꞌikën, ꞌimainun ka ñu ꞌapákëkamaribi aín upíbu kaísun ꞌibuati ꞌikën, ꞌibuanan ka mitsun olivos ꞌimainun uvas ꞌapákë kamaribi biti ꞌikën. Bixun akama ꞌain uni an ñu mëëxunkë aín unikama ꞌinánti ꞌikën.

¹⁵ ꞌInánan ka ñu ꞌapáxunmi aín bimi bikë aribi mapai rabë́ okin nankin bikëbi achúshi bixun, aín uni an ñu mëëxunkë a aín suntárunën kushikama a ꞌinánti ꞌikën.

¹⁶ Usakin ꞌanan ka mitsun ñu mëmikë unikama ꞌimainun an mi ñu ꞌaxunkë xanukamaribi mi bikuanan, min burro aín upíbu ꞌimainun vaca bënëkamaribi kaískin ainan ꞌinun biti ꞌikën.

¹⁷ Usakin ꞌanan ka min ꞌarakakë ñuinakama mapai rabë́ ꞌikëbi achúshi ainan ꞌinun biti ꞌikën. ꞌImainun kamina mitsunbi atu tëmërakin ñu mëëxunti ꞌain.

¹⁸ Usokin mitsúnbi kuëënxun anëkëxun ꞌapu an ꞌatima okin tëmëramikëxun, an ꞌakinun ñukákëxunbi ka Nukën ꞌIbun mitsun bana kuatima ꞌikën.

¹⁹ ꞌAínbi ka Israel kaman Samuel an kakëxun kuakinma ësakin kakëxa: —Usama ka. Nuxribi kananuna nun ꞌapuñu ꞌiti kuëënin kixun kakëxa,

²⁰ nuxribi kananuna bëtsi menu ꞌikë unikama ꞌikësai ꞌapuñu ꞌisatanin, an ka nukama axa numi nishkë unikamabë ꞌakanania nu ꞌakinti ꞌikën.

²¹ Ësaia Israelkama kánani kikania kuatankëxun ka Samuelnën a bana kamabi ñuixunkin Nukën Ibu kakëxa,

²² kakëxun ka ësakin Nukën ꞌIbun kakëxa: —Atun mi kakësabiokin kamina atun ꞌapu achúshi anëxunti ꞌain. Usa ꞌain ka Samuelnën anuaxa ukankë atun ëmanubi kuantëkëntanun Israelkama xuakëxa.