1 Samuel 14 - Kashibo-Kakataibo Biblia

Jonatánnën abë ꞌakanankin filisteo unikama ꞌa ñuikë bana

¹ Bëtsi nëtën ka Saúlnën bakë bëchikë, Jonatánnën aín uni an ꞌakinkë a kakëxa: —Baka shitákiani kuanxun kananuna ꞌukëmanan filisteo unikama ka uaxa abë ꞌakanankin ꞌai kuanti ꞌain. ꞌAínbi ka Jonatánnën ënë ñuikin aín papa usai kana ꞌinuxun ꞌai kixunbi káma ꞌikën,

² anuxua anu tëkë unin trigo tákanan mëníokë, menu nikë in papa chaiira granado kakë a tëmú ka anu uax seiscientos aín suntárukamabë buküakëxa.

³ Siló kakë menu ꞌikë sacerdote Ahías ax ka anbia usakin ꞌakë ꞌixun lino ꞌakë chupa efod kakë a uankë ꞌiakëxa. Ax ka Ahitud aín bakë bëchikë Icabodnën piaka ꞌiakëxa, ꞌimainun ka Fineesnën bakë bëchikë Elí, Nukën ꞌIbun sacerdote Silónu ꞌikë aín baba ꞌiakëxa. Usa ꞌaínbi ka aín unibë ka Jonatán kuanxa kixun unin ꞌunánma ꞌikën.

⁴ Usakian unin ꞌunanima ꞌimainun ka a rabëtax anua filisteo unibunën suntárukama uax bukukë anu bëbakatsi bënëakëxa. Usai bënë́kiani kuani ka anua xaxun papa chaiira rabë́, ꞌikë bëtsi Bosés kanan bëtsiribi Sene kakë anun kuankëxa,

⁵ bëtsix ami baka kuabúkë aín tsipumi Micmás; abu ꞌimainun ka bëtsix amia bari kuabúkë Guibeá bëmánon ami ꞌiakëxa.

⁶ Anuxun ka Jonatánnën abëa kuankë aín uni kakëxa: —ꞌUkëmanan kananuna kuanti ꞌain, uinua karanuna uni ꞌaisama kamanuaxa ukë suntárukama a mërai anuishi kananuna bërúti ꞌain. Nux anun ꞌakamati ñu ka ꞌaíma ꞌikën, usa ꞌain ka Nukën ꞌIbun ꞌitsa unibëtanmabi, ꞌitsamara ꞌixunbi ꞌanun nu ꞌamiti ꞌikën.

⁷ —Ësakin kakëxun ka abëa ꞌikë unin usakin ꞌatimi sinánkë usabi okin kamina ꞌati ꞌain, ꞌëx kana minmi ꞌaia mi ꞌakini uan —kixun ka abëa kuankë aín unin kakëxa.

⁸ Ësakin kakëxun ka Jonatánnën ësaki kakëxa: —Ka kuat, ꞌukëmanan anua unikama ꞌikë anu kananuna kuanti ꞌain. Anu kuanxun kananuna anu ka kixuan nu istánun mëramiti ꞌain.

⁹ Mëramikëxua anuxunbi kamina nux kuamainun kaínti ꞌain, kakëx kananuna anua bukukë anu kuantima ꞌain.

¹⁰ ꞌAínbia atun kuanun nu kakëxpain kananuna atunu kuanti ꞌain, usakin kakëx anu kuanxun nun atu ꞌakëx sapika nua Nukën ꞌIbun atu usakin ꞌanun ꞌamikëxun ꞌakë ꞌiti ꞌikën.

¹¹ Usa ꞌain ka a rabëtax, anua ꞌikë anuxubia filisteo unikaman iskanun usai ꞌiakëxa. ꞌImainun ka usai ꞌia isi filisteo unikama kánani kikankëxa: Ka kuat, hebreos unikama ka numi kuai anua unëkë bashi kini tëmúnuax chikirabatia kiax kiakëxa.

¹² Usai ꞌimainun ka usai ꞌia mërakin Jonatán këñun abëa nikë aín uni kuënkëonkin kakëxa: —¡Nuxnu anu ꞌikë ënu kamina uti ꞌain! Ësai kikëbëtan ka Jonatánnën an ꞌakinkë aín uni kakëxa: —ꞌË kamina nuibëtsinti ꞌain, Nukën ꞌIbun ka israel unibu ax numi nishkë unikama ꞌanun nu ꞌamiti ꞌikën.

¹³ Ësai kikiani Jonatán aín taëbëtan aín mëkënan mëxukiani kuankëbë ka aín uni an ꞌakinkë axribi a katíkabiani kuankëxa. Kuankin ka Jonatánnën ꞌamainun ꞌakian tëtsikin ꞌakëxa bamatisa menu rakákë akama an ꞌakinkë unin tënankin tënankin ꞌanan kupitanuma këñukin ꞌakëxa.

¹⁴ Ësai ꞌakanantabati atubë ꞌakanankin ka Jonatánnën an ꞌakinkë unibëtan basikinma bënë́kinshi mapai rabë́këñun mapai rabë́ribi filisteo unikaman suntáru ꞌakëxa.

¹⁵ Usakin ꞌan ka aín xubunu ꞌikë unikama ꞌimainun suntáru ëmanu ꞌikë filisteokama rakuë́akëxa. Rakuë́mainun ka aín patsan axa ꞌakanani mëkó unikama a kamaxribi rakuë́akëxa. ꞌAínbi ka Diosan ꞌimikëx ꞌaisamairai me shaíkikëbë ꞌitsaira unikama rakuëaxa.

¹⁶ Guibeá anuxun an bërúanti Saúlnën, nankë suntárukama an Benjamínën menu ꞌixun filisteo suntárukama, amo amotan upiti kuanima ꞌukëmanan shítarabatia isakëxa.

¹⁷ Usai ꞌia iskëbëtan ka Saúlnën aín suntáru abëa ꞌikë akama kakëxa: —Uikama kara nunu ꞌaíma ꞌikë isti kamina timë́ti ꞌain. Kakëxa timëtia iskinbi ka an ꞌakinkë unibë Jonatán ꞌaíma okëxa.

¹⁸ ꞌImainun ka a nëtën lino ꞌakë chupa efod kakë Diosnan an uankë sacerdote Ahías ax anua Israelnën suntárukama ꞌikë anubi ꞌiakëxa, anu ꞌikë ka Saúlnën kakëxa: —Ënu kamina efod kakë chupa Diosnan a bëti ꞌain kixun kakëxa.

¹⁹ ꞌAínbi ka Saúl sacerdote Ahíasbë banamainun, filisteo suntárukama tsuákiruax ꞌatimonani masákëxa. Usaia filisteo unikama ꞌia iskin ka usai ꞌiashi ꞌakatsi kixun Saúlnën sinánkëxa. Sinánkin ka sacerdote Ahías kakëxa: —Efod kakë chupa a kamina bëtima ꞌain.

²⁰ Usakin kakin ka Saúlnën aín unikama kamabi timë́akëxa, timëbiankin ka anuax ꞌakanantinu buankëxa. Usakin uania isi ratuti ka filisteo suntárukama isima ꞌikësai, atuxi ꞌakanani këñuanankëxa.

²¹ Usai ꞌikëbë rakuë́ti ka, filisteo unikamanu kuanxa atubë basi ꞌia, aín suntárubëtan israel unikama ꞌati filisteonën uankë hebreo unikama ax atu ëni, Saúlbëtan Jonatánnën uankë unikama ꞌurama atubë biranani rikiankëxa.

²² ꞌImainun ka Israel unibu axa Efraínën menu abákë atúnribi filisteo unikama ka abatia kixun ñuia kuakëxa, kuabiani nuibiani kuanxun ka abatiabi nukuxun Israel suntárukaman ꞌakanankiankëxa.

²³ ꞌAkëxa kuania ꞌakanankinkin ka Bet-avén, anubi bëbarukin ꞌakëxa, ësakian ꞌanun ꞌamikin ka a nëtëkaman Nukën ꞌIbun, Israelkama atuxia upiti tsónun ꞌimikin ië́miakëxa.

Saúlnën manukinma a sinani usai ꞌiti unikama ká ñuikë bana

²⁴ ꞌAínbi ka israel suntárukama a nëtë́an, añu ñubi pima panankë ꞌaish atun nami kushima ꞌaish bënainsabu ꞌiakëxa, ësakian Saúlnën manukinma a sinánun kikë ꞌain: Uin kara bari xupibukëbëtan ꞌën ꞌëmi nishkë unikama ꞌakin pëukë ꞌaímabi ñu pia ax ka ꞌatima okë ꞌiti ꞌikë, kiaxa Saúl kikë ꞌain ka a nëtën ñu pikëma ꞌaish Israel unikama usai ꞌiakëxa.

²⁵ Usai ꞌika Israelnën suntárukama achúshi ni anua menu buna rëpa ꞌikë anu bëbakëxa.

²⁶ Bëbax ninu atsínkibi ka suntárukaman, aín banua ꞌumpax iskësaira buna rëpa ꞌikë mërakëxa; ꞌaínbi ka uínbi bixun xëakin tainsa ꞌixunbi, ꞌapu Saúlnëa kakë bana a sinánkin bixun xëama ꞌikën.

²⁷ ꞌAínbi ka Jonatánnën atun ꞌakëmabi, manuxunma a sinánua aín papa Saúlnën aín suntárukama kakë bana a kuakëma ꞌixun, tuinxuan buánkë tsati rëbun, aín ba pëánkaxun a buna rëpa xëakëxa, xëaxun ka anunbi upí tani kushiakëkin tankëxa.

²⁸ Usakin ꞌakë ꞌikëbi ka Israel kama suntáru achúshinën kakëxa: —Min papan ka a sinánun suntárukama kaxa uin kara bëtsi ñubi pia ax ka ꞌatima okë ꞌiti ꞌikën. Usa ꞌain ka unikaman ꞌakëñuma panankë ꞌaish atun nami bamabu kuainkë ꞌikën kixun ka kakëxa.

²⁹ Ësakin kakëxun ka Jonatánnën kakëxa: —ꞌËn papan ka nun me ënë ꞌaisama ꞌitánun ꞌatimoxa. Ka kuat, ꞌëx kana buna rëpa chamara uisa kara tankin xëax kushiira ꞌain,

³⁰ abënu ꞌakanankë unikaman piti ꞌimainun ain, ñuinakaman ñu bixun piax kuni kananuna kushibu ꞌitsían. ¡ꞌUsa ꞌixun kananuna kushiirabu ꞌixun filisteo unikama bënë́kinshi këñukin ꞌakë ꞌitsían!

³¹ A nëtën ka Israel suntárukaman, Micmás ëma ꞌikë anuxun abë ꞌakanankin ꞌabianxun Aialón ëma ꞌikë anu bëbakin filisteo unikama ꞌakëxa. ꞌAínbi ka Israelnën suntárukamax ꞌakëñuma ꞌaish pananx atun nami bamax bënainsabu ꞌiakëxa,

³² usa tankin ka kamaxunbi ami nishkë unikamabë ꞌakanankin bikë ain ñukama a piakëxa. ꞌImainun ka usakin ꞌanan oveja, vaca ꞌimainun aín bënábu akama bixun rëxun aín imikëñunbi piakëxa.

³³ ꞌAínbi ka usakin ꞌaia isiani anu kuanxun Israel suntáru raírinën Saúl kakëxa: —Unikama ka nami paxa aín imikëñun pi Diosmi ꞌuchaia, kakëxun ka Saúlnën kakëxa: —¡Mitsux kamina ax kikësabi oí ꞌima ami kuai Nukën ꞌIbu Diosmi ꞌuchakanin! Usa ꞌain kamina xaxun papa taranbëtsinkin ꞌë bëxúnti ꞌain.

³⁴ Bëtankëxun kamina abë banakin achúshi achúshi unían ꞌë atun vacakama, bënë achúshi bëisama ꞌain, ain ovejakama achúshi ënu ꞌë bëxunun kati ꞌain, a kamina mikaman aín imi këñun pimi Nukën ꞌIbumi ꞌuchakë ꞌitima kupín, aín imi ꞌibúmikin ënuxun ꞌati ꞌain. A ꞌimë́bi ka achúshi achúshixun uankë vaca bënë a kamaxunbi anuxun rëakëxa.

³⁵ Usakin atun ꞌamainun ka Saúlnën suntárukaman ꞌitánun, abi ꞌatabakin anuxun Nukën ꞌIbu rabiti ꞌakëxa.

³⁶ Usakin ꞌatankëx ka Saúl ësai kiakëxa: —Ënë imë́ kananuna filisteo unikama pëkarakuatsintamainun, achúshirabi bërutanuma ꞌai kuanti ꞌain. Kia ka kamaxunbi kakankëxa: —Uisakin kaina ꞌaisatani usakin kamina ꞌati ꞌain. ꞌAínbi ka usai kiabi sacerdote Ahíasnën atu kakëxa: —Añu karanuna ꞌaisatani a ꞌanux kananuna Diosbëpan banati ꞌain.

³⁷ Usakin kai sënë́ntankëx ka Saúl Diosbë banakëxa: —¿Filisteo suntárukama karana ꞌakanankinti ꞌain? ¿israel suntárukaman ꞌaia kaina na ꞌanun ꞌamiti ꞌain? ꞌAínbi ka Nukën ꞌIbun a nëtën ësakian ñukákëxunbi kuakëmasa okin káma ꞌikën.

³⁸ Usa ꞌain ka Saúl ësakin aín suntárukama kai kiakëxa: —Ënu kamina kamabi suntáru ꞌapukamax uti ꞌain, uxun kamina uix kara bërí ꞌuchaxa isti ꞌain kixun kakëxa.

³⁹ ¡ꞌËx kana manutima okin sinánun an ira Israelkama ꞌikë nukama ië́mikë Nukën ꞌIbun kuamainunbi kin, ꞌën bakë bëchikë Jonatánnëx ꞌuchakë ꞌain ka ax ꞌakë ꞌiti ꞌikën! Ësai kia kuakin ka suntárukaman uisa bananbi káma ꞌikën;

⁴⁰ usakin kakëxuma ka kamabi Israel unikama Saúlnën kakëxa: —Nëkëmanan ꞌikë raíri ꞌimainun, raíri ꞌukëmanan ꞌikë mikamax kamina ꞌën bakë bëchikë Jonatánnën mitsu uamainun kuanti ꞌain. —Kia ka uisakin kaina nu ꞌaisatani usakin ꞌati ꞌai —kixun unikaman kakëxa.

⁴¹ Ësakin kakëxun ka Saúlnën kuënkëni kushin banakin Dios kakëxa: —Israel kaman Dios, ¿Uisa ꞌixun kaina bërí min uni ꞌikëbi ꞌë kaisama tan? ꞌËx ꞌuchakëma ꞌain, kara ꞌën bakë bëchikë Jonatán ꞌuchakë ꞌiti ꞌikën, usa ꞌain ka ñuratsukun tankëxa axa ꞌuchakë mërakëbëtan Urim bëti ꞌikën; ꞌaínbi ka bëtsi Israel ñuratsukun tankëx ꞌuchakë mërakëbëtan Tumim a bëti ꞌikën. Usakin kakëxun tankëxbia Saúl ꞌimainun aín bakë bëchikë Jonatán ꞌuchakë ꞌain ka Israel kama ꞌuchakëma upí ꞌiakëxa.

⁴² Usakin ꞌakë ꞌaínbi ka Saúl kiakëxa: —ꞌË këñunbi kamina ꞌën bakë bëchikë tanti ꞌain. Kikëbëtan tankinbi ka Jonatán ꞌuchakë mërakëxa,

⁴³ mëran ka a ñuikin Saúlnën Jonatán kakëxa: —ꞌËmi kamina min ꞌakë ñu a chikínati ꞌain. Kixuan kakëxun ka Jonatánnën aín ꞌuchakë a ñuixunkin kakëxa: —ꞌAtsínxumabi kana buna rëpa chamara ꞌën tuinbiankë tsati rëbun aín ba pëánkakin bixun ꞌan. Usa ꞌain kana ꞌëx, ꞌakë ꞌiti ꞌain.

⁴⁴ Usakian ñuixunkëx ka Saúl ratuti kuënkëni kushin banai kiakëxa: —¡Diosan ka uisakin kara ꞌaisatania usakin ꞌaisamaira okin Jonatán bamakëbëtan ꞌë tëmëramiti ꞌikën!

⁴⁵ ꞌAínbi ka usai kiabi kamabi uni kaman Saúl kakëxa: —¡Uisai ꞌiax kara Jonatán bamati ꞌikën, an ka Israel kama nunnu filisteo unibu ꞌanun nu ꞌamiaxa! ¡Usakin ꞌakë a kupíma! ¡Nukën ꞌIbu ka ax ñukëma ꞌaish tsóxun isia, usa ꞌain ka Jonatán menu pakëanan. Aín bu achúshirabi nipakëtima ꞌikën! Usakian bërí ꞌakë ax ka Diosan ꞌakinkëxun ꞌakë ꞌiaxa. Ësakin ꞌakin ka Israel kama raírinën Jonatán ꞌakë ꞌiti ꞌikëbi ië́miakëxa.

⁴⁶ Ësakin ꞌaxun ka Saúlnën, atubë ꞌakanantëkënkinma aín menubia rikiantanun filisteo, unikama ëankëxa.

⁴⁷ Ësakin pain ꞌatankëx ka, Saúl Israel kaman ꞌapu ꞌiakëxa. ꞌImainun ka ꞌapu ꞌi anëtankëxun kamabi menu ꞌikë ami nishkë unikama atubë ꞌakanankin ꞌakëxa, akamax ka, Moab, Amón, Edom, Sobá ëmanu ꞌikë ꞌapu, a ꞌimainun filisteo uni akamaishi ꞌiakëxa. ꞌImainun ka uinu kara kuania anuabi atubë, ꞌakanankin uni ꞌakëxa.

⁴⁸ Usa ꞌixun ka aín suntárukama timëxun atubëtan Amalec unibu kupitanuma ꞌakëxa, usakin ꞌaxun ka Israel kaman ñu an mëkamakë unikama abámiakëxa.

⁴⁹ Saúlnën bakë bëchikëkama ka ꞌiakëxa: Jonatán, Isví, ꞌimainun Malquisúa akama. ꞌImainun ka aín ꞌini xanukama ꞌiakëxa: Merab, aín apan ꞌimainun Mical, aín ꞌanáka ashi.

⁵⁰ ꞌImainun ka Saúlnën xanun anë ꞌiakëxa Ahinóam kakë, usa ꞌain ka Ahimaasnën bëchikë xanu ꞌiakëxa. Saúlnën suntárukaman ꞌapu general aín anë ka ꞌiakëxa Abner Nernën bakë bëchikë, Nernëx ka ꞌiakëxa Saúlnën paitsi.

⁵¹ Quisnëx, ka ꞌiakëxa, Saúlnën papa ꞌimainun ka Ner ꞌiakëxa, Abnernën papa. Quis ꞌimainun Ner a rabë́ ka ꞌiakëxa, Abielnën bakë bëchikë.

⁵² Anua filisteo unikamabë ꞌakanankë a bari kaman ka Saúlnën tëira tankëxa; usa ꞌain ka Saúlnën aín suntáru ꞌinun timëkin uni kushibukëñun ax ꞌakanainsa aín sinan kushibu kamaishi kaísun biakëxa.