1 Samuel 13 - Kashibo-Kakataibo Biblia

Filisteo suntárukama Israel unibubë ꞌakananux ami ꞌikuaian ñuikë bana

¹ Usa aín ka Saúl uni apan ꞌaish Israel kaman ꞌapu ꞌiakëxa; usa ꞌixun ka ꞌapuira ꞌinun anëtisama pan ꞌaish ꞌitsama bari ꞌapu ꞌixun,

² tres mil suntáru Israel kaisakëxa. Kaístankëxun ka dos mil suntáru Micmás kakë Betel nu ꞌikë aín bashi anu abë bërúmainun, mil suntáru Jonatán Guibeá kakë Benjamínën rëbúnkinën me ꞌikë anu bërúakëxa. Bërumainun ka suntáru raíri aín xubunu kuantanun Saúlnën xuakëxa.

³ Usa ꞌain ka Jonatán ꞌimainun suntáru raírinën filisteo suntárukama Guibeá kakë me anua bukukë anubi bëbakin ꞌakëxa, ꞌakë ka filisteo unikama raírinën kuanmainun Saúlnënribi kuakëxa. Kuati ka Saúl kiakëxa, kamabi israel unikaman ka ꞌunánti ꞌikën ësaia ꞌikë ënë. Usa ꞌain ka aín suntáru raíri uinu ꞌikë menu kara israel unikama tsótaxa abu kuainakëkian aín manë banoti, a kuatia timë́kanun banotanun kixun xuakëxa.

⁴ Usa ꞌain ka Saúlnën bakë bëchikë Jonatán an filisteo suntárukama usakin këñukin ꞌakë a kamabi israel unikaman kuakëxa, usakin ꞌan ka filisteokamax israel unikama istisama tani ami nishakëxa, usa ꞌain ka israel suntárukama Guilgal kakë anu Saúlbë timë́akëxa.

⁵ Usai ꞌimainun ka filisteo suntárukamax, israel unikamabë ꞌakánanti sinanx timëkamë ꞌëokëxa. Anuaxa ꞌakanankë caballonën nirinkë ax treinta mil ꞌimainun ka axa caballonuax ꞌakanankë suntárukamax seis mil ꞌimainun, axa men kuani ꞌakanankë suntárukama masi bëru iskësaira ꞌaish tupuntisamaira ꞌiakëxa. Usa ꞌaish ka Micmás ꞌikë anu atun ꞌiti xubusa okin ꞌai amiaxa bari urukë Bet-avén ꞌikë anu timëkamë ꞌëokëxa.

⁶ Usa ꞌain ka Israelnën suntárukama ꞌaisamaira filisteo suntáru ꞌain, atun ꞌatimi rakuë́ti abátankëx aín bashi kininu unëmainun me nankë́kënu ꞌianan bëtsi bëtsi maparanu ꞌimainun bëtsi bëtsi xëxanu ꞌikë me rënankëkënu ꞌimainun me kininuribi unëkankëxa.

⁷ Usai raíri ꞌimainun ka ain patsan atux Jordán kakë baka sikarakë kiani Gad ꞌimainun Galaad anu kuankëxa. Usaía ꞌimainun ka Saúl Guilgal kakë ëma anubi pain ꞌain, Jonatán aín bakë bëchikë abëa ꞌikë aín suntárukama ꞌitsaira rakuëkankëxa.

⁸ Anuxun ka mapai achúshi ꞌimainun rabë́ nëtën, ꞌati nëtëa kaínun kakësabiokin Samuel kaíankëxa; ꞌaínbi ka bënëti Guilgalnu bëbaima Samuel basikëbë ka suntárukama achúshi achúshi abati kuani pëukuakëxa.

⁹ Usai ꞌikëbëtan ka Saúlnën raíri kakëxa: —ꞌË kamina ñuina ꞌaímai këñutanun xaronan këñutanuma xaronun bëxúnti ꞌain. Kakëxua bëxunkëxun ka anbi ñuina ꞌaímai këñutanun xarokëxa.

¹⁰ Xarokian Saúlnën ñuinakama ꞌaimakin këñumikin sënë́onkëbëshi ka Samuel bëbakëxa. Bëbakëbë ka Saúl aia kuëënkin bitsi chikíakëxa,

¹¹ chikíkin bikin kakëxunbi ka Samuelnën ësakin kakëxa: —¿Uisa kupí kaina ꞌatimakin ñu ꞌan? Kakëxunbi ka Saúlnën kakëxa: —ꞌËn suntárukama abáti kuania iskin ꞌanan kana, mixmi anun ukatsi kikë nëtë ꞌinunmi panákëbëtan ꞌan, ꞌimainun ka filisteo suntárukama ꞌaisamaira Micmás kakë anu timëkamë ꞌëokë ꞌain kana ꞌan,

¹² ꞌën kana sinánkë ꞌian atux ukian Guigal ënuabi, Nukën ꞌIbu ꞌakinun ñukákëmabi nukama ꞌaisa kana sinan; usa ꞌain kana ꞌënbi nua ꞌakinun Dios ꞌaímai këñutanun ñuina xaroxunti sinánxun ꞌaxuan.

¹³ Kakëxunbi ka Samuelnën kakëxa: —¡Usakin mi ꞌakë ax ka ñunshin bakë́kin ꞌakë ꞌikën! ꞌËn kana mi kan, ꞌëx kana basikëbë pain Guilgalnu mibë timë́ti ꞌian, usa ꞌain kamina Nukën ꞌIbun ꞌë kakësokin ꞌanuxun kaínti ꞌian, usa ꞌain ka xënibua ꞌaínbi Diosan mi ꞌimainun min rëbúnkikama Israel kaman ꞌapu ꞌimitsianxa.

¹⁴ Usa ꞌaínbi ka mi ꞌimainun min rëbúnkikama uínsaranbi ꞌapu ꞌinuxuma ꞌaia. Usa ꞌain ka Nukën ꞌIbun achúshi uni an kuëënkësabi okin an ꞌati barixun aín unikama ꞌapu ꞌinun ꞌimiti ꞌikën, min kamina an kakësokin ain bana kuaisama tan.

¹⁵ Ësokin kaxun ëbianishi ka Samuel Guilgalnuax kuani kuankëxa. Kuamainun ka suntáru raíribë Saúl anuaxa ꞌakananux mëníokatinu atúxribi Guilgalnuax kuanx Guibeá Benjamínën ëma kakë anu kuanx bëbakëxa. Anuxun ka Saúlnën aín suntáru abëa ꞌakanani kuankëkama tupuankëxa, ꞌaínbi ka seiscientos mil unibëtan sënë́nsa ꞌiakëxa.

¹⁶ Usa ꞌain ka Saúl ꞌimainun ain bakë bëchikë Jonatán abë kuankë ain suntárukamabë Guibeá Benjamín aín ëma kakë anu bërúakëxa, bërúmainun ka filisteo suntárukama Micmás kakë anu atu ꞌurama obëtsini uakëxa,

¹⁷ ꞌaínbi ka achúshi ꞌimainun rabë́ ñaká filisteo axa ꞌakanankë unikama ax atun ꞌikënuax ñu mëkamati chikíakëxa; usai ꞌi chikiti ka achúshi timë́kë ax Ofrá kakë ëma ꞌikë abu kikiani, Saúlnën me ꞌikë anu kuankankëxa,

¹⁸ kuantamainun ka bëtsix Bet-horón ꞌikë abu kikiani kuankëxa, bëtsix ka anua me sapan ꞌianan ꞌain bashi chairukë Seboím kakin anëkë anu uni ꞌikëma me abu kikiani kuankëxa.

¹⁹ Kamabi Israel unikaman menu ka an manë uniokë uni achúshirabi ꞌaíma ꞌiakëxa, filisteo unikaman ka sinánkëxa, Israel unikaman manë unioti ꞌunánmikëxun ka hebreo unikaman manë xëtokin ꞌanan masibun ꞌati ꞌikë kixun sinánkin ka manë unioti ꞌunánmisama tankëxa.

²⁰ Usa ꞌain ka israel unikama achúshi achúshi, an manë uniokë filisteo uninu kuanxun anúan me tukakë manë parókë aín xëta kuënuanan manë pará ꞌanan aín manë ruë ꞌanan, manë tëntuñu xëtokë akama kuënuakëxa.

²¹ Kuënuia ka filisteo unikaman manë kuríki ꞌakë rabë́ manë parókë kuëënia kupíomianan, manë kuríki achúshi manë ruë ꞌimainun manë sëbía chaxkë́ aín rëbu mëníokin xëtokë aribi kupíonun ꞌamiakëxa.

²² Usa ꞌain ka uinu ꞌikë suntáru axa Saúlbë kuankë achúshibi an manë xëtokë tuinkë ꞌaíma ꞌiakëxa, usa ꞌaínbi ka Saúl ꞌimainun aín bakë bëchikë Jonatán ax kuni ka aín manë xëtokëñu atux ꞌakánanti nëtë ꞌitámainun ꞌiakëxa. A rabëtax kuni ka ꞌain manë xëtokë tuinkë ꞌiakëxa.

²³ Usai atux ꞌimainun ka filisteo suntáru raírikama anua ꞌikë anuax Micmás ꞌikë ami kikiani kuankëxa.