1 Reyes 6 - Kashibo-Kakataibo Biblia

Salomónnën anuxun Dios rabiti xubu ꞌamia ñuikë bana

¹ Salomónnën ka anuxun Dios rabiti xubu axa Israel unikaman ꞌapu ꞌikë rabë́ ꞌimainun rabë́ baritia ꞌirukëbëtan, ka Abril ꞌuxë itsi ꞌirukë anun ꞌakëxa, anúan israel unikama Egipto menuax chikíküatsini ukan cuatrocientos ochenta baritia sënë́nkëbëtan ka ꞌakin pëuakëxa.

² Anuxun Dios rabiti xubu Salomónnën ꞌamia ax ka ꞌiakëxa, veintisiete metro aín chaxkë́ ꞌimainun nueve metro aín naxba ꞌianan ka trece metro ꞌimainun medio metro aín manámi okin tupunkë ꞌiakëxa.

³ ꞌImainun ka anuxun Dios rabiti xubu bëtánain anua uni niti ꞌakë ax nueve metro aín chaxkë́ tupunkë ꞌianan, xubun naxbabëtan sënë́nbi ꞌakë, ꞌianan ka ain naxba cuatro metro ꞌimainun medio metro ꞌiakëxa.

⁴ Salomónnën ka xubunuxun isti a manámi ꞌikë ꞌain kata itsi naxba ꞌamianan, aín ëman ꞌikë manën xantsëkakinma anun isti axa xaban xabanbu ꞌitánun ꞌakë anun bëaramiakëxa.

⁵ Usakin ꞌanan ka anuxun Dios rabiti xubu kënëkin buinarakë amibi birukin xubu amo rabë́ ꞌanan ꞌain kaxuribi ꞌakëxa, ꞌakin ka bëtsibëtan sënë́nbi ꞌakin aín kata anua sacerdotekaman mëëkë ñukama bukúnti ꞌamiakëxa.

⁶ Usa ꞌain ka anuxun Dios rabiti xubu amibi bikian ꞌakë xubu ax aín mëu ꞌikë rabë́ metro ꞌimainun veinticinco centímetro aín naxba ꞌianan ka aín nëbëtsin ꞌikë ꞌain manámi ꞌakë ax rabë́ metro setenta centímetro ꞌimainun; aín maskuanuira ꞌikë axribi tres metro quince centímetro aín naxba ꞌiakëxa; usa ꞌain ka anuxun Dios rabiti xubu aín ëman ꞌakëa chaiira ꞌikëbi nëriokin chukúma okëxa, xubu itsi ꞌakin ami aín ꞌirakankë i rakantisamabi ꞌitánun.

⁷ ꞌIanan ka anuxun Dios rabiti xubu ꞌakin an ramënioti unikaman upíokin ramëniokëshi maxax ꞌiakëxa, usa ꞌain ka xubu ꞌakëbëtan uisa martillonënbi ñu mëia kuakëma ꞌianan, manë ruën mëëkëbi kuatima ꞌianan, uisa manë ñunbi ñu mëia kuama ꞌikën.

⁸ Usa ꞌain ka anu ñu bukúnti xubunu men atsínti aín xëkuë ax ka anuxun Dios rabiti xubu mëkeu ꞌakë ꞌiakëxa; ꞌimainun ka aín nëbë́tsin ꞌikë aín kata itsi anu aín maskuannu anun kuaruti aín tapiti tëntuankin uarukin ꞌakë ꞌiakëxa.

⁹ ꞌAmianan ka Salomónnën anuxun Dios rabiti xubu ꞌamikë unikaman i tukapakënën pain, an tupëonti ꞌatankëxun kunxan upíirabu ꞌitánun tukapakë rokë aribi i tukapakë ami bikin ꞌakëxa.

¹⁰ ꞌAnan ka anuxun Dios rabiti xubu kënëkë rapasu anu ñukama bukúnti ꞌakë xubu ain manámi tupunkë ax rabë́ metro ꞌimainun veinticinco centímetro ꞌiakëxa, ax ka xubu cha anun kënëkë amibi nankin kunxan tukakë ꞌirakankë ꞌiakëxa.

¹¹ Usakin ꞌaxun sënë́onkë ꞌain ka Diosan Salomón kakëxa:

¹² Anuxun ꞌë rabiti xubumi ꞌamikë ax ka ꞌëx anu Israel unikamabë ꞌiti ꞌamikë ꞌikën, usa ꞌain kana mi kaisatanin, min ꞌën kakësabiokin ꞌanan ꞌëx usakin ꞌati kuëënkë usakinbi ꞌakëbëtan kana ꞌën min papa David usakin mi ꞌaxunuxun ka usakinbi mi ꞌaxúnti ꞌain;

¹³ ꞌaí kana Israel unikamanu ꞌiti ꞌain; usai ꞌi kana Israel kama ënima anuxun ꞌë rabiti xubunu ꞌiti ꞌain.

¹⁴ Usakin ꞌaxun ka Salomónnën ꞌamikë unikaman anuxun Dios rabiti xubu sënëonkëxa.

¹⁵ Sënë́onkë ka an ꞌakë unikama Salomónnën ꞌain namë ꞌukëmëu ꞌikëa kunxan tukapakënën bëpankin kënënun ꞌamiakëxa. ꞌAmixun ka manámixun meu okin bëpákin ꞌanan, anun niti aín namë́nu ꞌikë aribia pino kakë i tukapakënën ꞌanun ꞌamiakëxa.

¹⁶ ꞌAnan ka manámixun meu okin kunxan tukapakënën anuxun Dios rabiti xubu aín tsipunu nueve metrobëtan sënën bëarakin kënëakëxa, ax ka ain kata upíira ꞌitia ꞌakë ꞌiakëxa.

¹⁷ ꞌImainun ka anuxun Dios rabiti xubu aín mëu kata upíira aín sënë́nkë anuxunbi tupúnkëx ka aín chaxkë́ dieciocho metro në́nkë ꞌiakëxa.

¹⁸ ꞌAtankëxun ka anuxun Dios rabiti xubu aín ꞌukëmëu ꞌikë, kunxan upíokin tukapakë abi ñu uá ꞌimainun ñu bimi tankin anun upí ꞌitánun nabánkë ꞌiakëxa. Akamax ka kunxan ishi ꞌakë ꞌiakëxa.

¹⁹ Usakin ꞌakë ꞌain ka Salomónnën xubu a mëu kata upíira anu ꞌati a mëníokëxa, ax ka anu Diosan bunántisa okin ꞌakë achúshi ñu mëníokë a nanti ꞌiakëxa.

²⁰ Kata upíira a ꞌukëmëu ꞌikë aín chaxkë́ ka nueve metro ꞌianan, aín naxba nueve metroribi ꞌianan ka manámi ꞌikë axribi nueve metro ꞌiakëxa. Upíira kakë a bëtánain ka Salomónnën, ꞌanan anuxun ro xaroti kunxan ꞌamitankëxun upíira ꞌitánun kurin ronun ꞌamiakëxa.

²¹ ꞌAnan ka aín namëkëñun kata upíira aribia kurin ꞌanun ꞌamiakëxa, ꞌatankëxun ka kurin ronkë risi aribi anun atsínti a bëtánain tëkërë kanun ꞌamiakëxa.

²² Usakin ꞌakin ka kamabi anuxun Dios rabiti xubu aín ꞌukëmëu ꞌikë kurin upíokin ꞌanan anuxun ñuina xaroti ꞌakë kata upíira a bëtánain ꞌikë aribi ꞌakëxa.

²³ ꞌAnan ka rabë́ querubin tankin olivos kakë i abi ꞌamitankëxun aín kata upíira anu nitsíankëxa. Usakin ꞌamikë a achúshi achúshinëx ka cuatro metro ꞌimainun medio metro aín chaxkë́ ꞌiakëxa,

²⁴ ꞌianan ka ain pëchi achúshi achúshinëx rabë́ metro ꞌimainun veinticinco centímetro ꞌiakëxa. Usa ꞌain ka bëtsin rëbu ꞌikë anuxunbi bëtsin rëbumiokin tupúnkëx, i ꞌakë ain pëchi cuatro metro ꞌimainun medio metro ꞌakë ꞌaish bëtsibëtan sënë́nbi ꞌiakëxa.

²⁵ I querubin rabë́ tankin ꞌakë ax ka bëtsibëtan sënë́nbi ꞌianan; bëtsi iskësabi ꞌitánun ꞌakë ꞌiakëxa.

²⁶ ꞌIanan ka aín chaxkë́ribi cuatro metro ꞌimainun medio metro ꞌiakëxa.

²⁷ Usa ꞌikë ka Salomónën aín kata upíira anu nitsínun ꞌamiakëxa. Querubin tankin ꞌakë a ka ain pëchi pëchakin nitsíankëxa, usa ꞌain ka bëtsi pëchia amo ꞌikë anun chikënkëmi pëtíkimainun bëtsíxribi amo ꞌikëmi pëtíkikë ꞌiakëxa, ꞌianan ka amo ꞌikë rabë́ axribi bëtsibë pëtikanankë kata upíira anubi ꞌiakëxa.

²⁸ Usakin nitsintankëxun ka Salomónnën aín unikama kurin querubin tankin ꞌakë a upí ꞌitánun ꞌanun ꞌamiakëxa,

²⁹ ꞌamitankëxun ka anuxun Dios rabiti xubu chikënkëkama aín ëman ꞌikë ꞌimainun ꞌukëmëu ꞌikë anuribi querubin tankin ꞌanan, xëbin ꞌimainun ñu uá tankinribia ꞌanun ꞌamiakëxa.

³⁰ ꞌAnan ka anuxun Dios rabiti xubu ain ꞌukëmëu ꞌimainun aín ëman ꞌikë anu niti aribi kurin upí ꞌitánun ꞌamiakëxa.

³¹ Usakin ꞌanan ka anun kata upíira anu atsínti ain xëkuë anun, xëputi olivos kakë i tukapakë ꞌamiakëxa, ꞌimainun ka ami bikin xëputi nitsínti ax mapai achúshi ꞌitanun upíokin pará ꞌinun tukakë anu ñu tankin ꞌakë ꞌiakëxa.

³² Aín xëputi rabë́ ax ka olivos kakë i tukakë ꞌiakëxa, anu ka querubin tankin rabë́ ꞌanan, xëbinsa okin ꞌanan ñu uasa okin ꞌakëxa; ꞌaxun ka ñukama tankian ꞌakë a upí ꞌitánun kurin ꞌamiakëxa.

³³ ꞌAnan ka anuinra Dios rabiti xubunu atsínti aín xëputi nëbë́tsin ꞌikë, amiokin ꞌaruti a olivos kakë i nitsínkë, ax ka rabë́ ꞌimainun rabë́ okin pará ꞌitánun tukakë ꞌiakëxa.

³⁴ Aín xëputi rabë́ ax ka pino kakë i tukakë ꞌakë ꞌiakëxa, usa ꞌain ka xëputi rabë́ ax xëókakëx abi xëpúakakë ꞌiakëxa.

³⁵ A xëpútinu ka querubin tankin ꞌanan, xëbin këñun ñu uá tankin ꞌakëxa, ꞌaxun ka ñu tankin ꞌakëkama a kuri parókin ꞌakë anun ratakakakëxa.

³⁶ Usokin a kamapain ꞌatankëxun ka ëman anu niti me aribi rabë́ ꞌimainun achúshi okin bëtsimi bëtsimi ꞌarukin maxá ramëniokë puruakëxa, ꞌaxun ka kunxan tukapakë a buinarakin a manámi ꞌakë ꞌiakëxa.

³⁷ Rabë́ ꞌimainun rabë́ baritia ax ꞌapu ꞌikë ꞌain ka Salomónnën Ziv, kakë ꞌuxë ꞌikëbëtan anuxun Dios rabiti xubu ꞌakin ami puruti kamapain ꞌakëxa;

³⁸ usokin ꞌaxun ka axa ꞌapu ꞌikë mapai rabë́ ꞌimainun achúshi bari ꞌikë anua mapai achúshi ꞌimainun rabë́ ꞌimainun achúshi ꞌuxë Bul kakë anun ka xubu ꞌakë a kamabi mëníokin sënëonkëxa. Usakin ꞌakin ka mapai achúshi ꞌimainun rabë́ baritia Salomónnën atu ñu mëëmikin sënëónkin ꞌamiakëxa.