1 Reyes 22 - Kashibo-Kakataibo Biblia

Micaías Ahab kupitanuma ꞌati ñui kia bana

¹ Rabë́ ꞌimainun achúshi bari inúmi ka sirio unikamabë Israelnu ꞌikë ꞌapu ꞌimainun aín suntárukama uisaibi ꞌakananima ꞌiakëxa.

² ꞌAínbi ka rabë́ ꞌimainun achúshi bari ꞌikë ꞌain ka anun Josafat Judánu ꞌikë ꞌapu ax Ahab Israelnën ꞌapu a isi kuankëxa.

³ Kuankë ꞌain abë banakin ka abëa ꞌikë uni aín kushikama Ahabnën kakëxa: —Mikamanbi kamina ꞌunánkanin Ramot ëma Galaad kakë menu ꞌikë ax ka nun me ꞌikën. ¿Usa ꞌain karanuna nukaman Sirionu ꞌikë ꞌapu nun me bikuanti añu ꞌati ꞌain?

⁴ Kixun atu kanan ka Josafat aribi ñukákëxa: —¿Minribi kaina Ramot kakë ëmanu ꞌikë suntárukama an Galaad kakë me bërúankë ꞌanun ꞌë ꞌakintima ꞌain? Kakëxun ka Josafatnën kakëxa: —Asabi ka, usa ꞌain kana ꞌën suntárukama ꞌimainun ꞌën caballonën nikinkëkama min unikamabë timë́nun ꞌimiti ꞌain.

⁵ ꞌAínbi kananuna atu ꞌai kuanxun an bana ñuikë unikama uisai kara Nukën ꞌIbu kia ꞌunánti ñukáti ꞌain.

⁶ Ësakin kakëxun ka Ahab Israel unikaman ꞌapu an Dios kikë bana uni ñuixunkë unikama cuatrocientos ꞌiti ꞌurama a timëtankëxun ñukákëxa: —¿Ramot ëmanu ꞌikë suntárukama an Galaad me bërúankë atubë karana ꞌakánanti ꞌain karana ꞌakanantima ꞌain? Kakëxun ka atun kakëxa kamina ꞌakánanti ꞌain, Nukën ꞌIbun ka mi ꞌaia ꞌakinti ꞌikën.

⁷ Kixuan atun kaiabi ka Josafatnën ñukákëxa: —¿Ënu kara an Dios kikë bana ñuikë uni itsi aribi ñukáti abë banati ꞌaíma ꞌik?

⁸ Kixun kakëxun ka Israel kaman ꞌapun Josafat kakëxa: —Anu ka achúshi aribi uisai kara Nukën ꞌIbu kia ñukátisa ꞌikën. Ax ka Micaías Imlá aín bakë bëchikë ꞌikën. ꞌAínbi kana ꞌën a uni istisama tanin an ka uínsaranbi upí bana kakinma, ꞌatima bana ishi ñuikin ꞌë kaia. Kakëxunbi ka Josafatnën kakëxa: —Usai kamina banatima ꞌain.

⁹ Kakëxunshi ka Israelnu ꞌikë ꞌapun Ahab an aín suntárunën kushi achúshi kuënxun kakëxa: —¡Bënëkuatsinia ꞌishtun Micaías Imlá ain bakë bëchikë unun kamina kai kuanti ꞌain kixun kamikin ka xuakëxa!

¹⁰ Usa ꞌain ka Israelnu ꞌikë ꞌapu ꞌimainun Judánu ꞌikë ꞌapu anun ꞌakánanti ñukama a rapasu nanx anua uni tanti bukuti ꞌakë, aín tsótinu anún uni Samarianu kuani atsínti xëkuënu ꞌakë anu tsóakëxa, tsókë ꞌain ka an Dios kikë bana ñuikë unikaman usai ꞌiti banakama kakëxa.

¹¹ Usa ꞌain ka Sedequías an bana ñuikë Quenaaná ain bëchikë ñuina manchan tankin manë ꞌatankëx kuënkëni munuma banakuatsini ai kiakëxa: “¡Ësai ka Nukën ꞌIbu kiaxa: Ënë mancha tankin ꞌakë ënën kamina sirio unikama këñukin ꞌati ꞌain!”

¹² Ësai kikëbë ka an Dios kikë bana ñuikë ain patsankamaxribi usaribiti kiakëxa. Kikin ka ꞌapu kakëxa: “Ramot Galaad menu ꞌikë a kamina, Nukën ꞌIbu mi ꞌakimainun ꞌakánti ꞌain, ꞌaxun kamina atun ëma biti ꞌain.”

¹³ Kakëbë axribi ukin ka axa Micaías kai kuankë uni an ësakin kakëxa: —Kamabi an Diosan bana ñuikë unikamax ka bëtsix kikësa kikësaribiti banakin ꞌapu upíokin kaxa. Usa ꞌain kamina minribi atun kakësaribiti añu kara ꞌati ꞌikë ꞌapu kai kiti ꞌain.

¹⁴ Kakëxunbi ka Micaíasnën kakëxa: —¡ꞌËx kana asérabi Nukën ꞌIbun ismainunbi kin, usa ꞌain kana uisakin kanun kara an ꞌë kaia usakinshi kati ꞌain!

¹⁵ Usai kitankëx ka Micaías anua ꞌapu ꞌikënu kuankëxa, kuania ka ꞌapun ñukákëxa: —Micaías, ¿Ramot Galaad menu ꞌikë a karana ꞌati ꞌain karana ꞌatima ꞌain? Kixun ñukákëxun ka Micaíasnën kakëxa: —Kamina ꞌati ꞌain, Nukën ꞌIbun mi ꞌakinkëxun ꞌatankëxun kamina atun ëma biti ꞌain.

¹⁶ ꞌAínbi ka ꞌapu Ahabnën kakëxa: —Uiti okinshi karana ꞌën mi kan, asérabi kamina sinántëkënuxuma Nukën ꞌIbun anën usai kamina ꞌiti ꞌai kixun ꞌë kanun mi kan.

¹⁷ Kakëxun ka Micaíasnën kakëxa: “ꞌËn kana Israel suntárukama aín bashinua an bërúanti uni ꞌaíma ꞌain, ovejakama abískësari ꞌia isan. Usa ꞌain ka Nukën ꞌIbun ꞌë kaxa: Ënë unikamax ka ꞌibuñumasa ꞌikën; usa ꞌain kana ꞌëx atun xubunubia achúshi achúshinëx chuámashirua riakianti kuëënin.”

¹⁸ Kikëbëtan ka Israelnu ꞌikë ꞌapu Ahab Josafat kakëxa: —ꞌËn kana mi kan ënë unin ka uínsaranbi upí bana ñuikin kakinma ꞌatima ñu inuti banaishi ñuikin ꞌë kaia.

¹⁹ Kia ka Micaíasnën kakëxa: —Mix kamina usai kian, usa ꞌain kamina ꞌën ꞌIbun iskë ñu ñuikin mi kamainun upíokin kuati ꞌain: ꞌËn kana Nukën ꞌIbu anua tsótinua tsókë isan, isanan kana aín ángel naínua ꞌikë kamaribi a rapasu sëtë́kë aín mëkeu raíri ꞌimainun aín mëmiu sëtë́kë isan.

²⁰ Usa ꞌain ka Nukën ꞌIbun ñukákin, uin kara Ahab paránbiankin aín suntárukamabëa Ramot Galaad me an bërúankë suntárukaman ꞌakëx anuax bamanun buánti ꞌikë kixun ñukákëxa. Ñukákëx ka raírinëx bëtsi kimainun raírinëxribi bëtsioiribi kiakëxa.

²¹ Kikankëbë anu ukin ka ñunshin ꞌatima an Nukën ꞌIbu ꞌën kana paránti ꞌai kixun kaxa. Kakëxun ka Nukën ꞌIbun uisakin kara an paránti ꞌikë kixun ñukákëxa,

²² ñukákëxun ka ñunshin ꞌatimanën kakëxa, ꞌën kana an Dios kikë bana ñuikë unikama këmëkin ꞌapu Ahab paránun sinánmiti ꞌain kixun kaxa. Kakëxun ka Nukën ꞌIbun usakin sapi kamina paránti ꞌain, usakin ꞌai kamina kuanti ꞌain kixun kakëxa.

²³ Usa ꞌain kamina bërí ꞌunánti ꞌain Nukën ꞌIbun ka an Dios kikë bana uni ñuixunkë min unikama an paránti ñunshin ꞌatima atunu xuaxa kixun, usa ꞌain kamina mix ꞌakanankënuax bamati ꞌai kixun ka kakëxa.

²⁴ Kixuan kakëbë a ꞌurama ukin ka Sedequías Quenaaná ain bakë bëchikë an achúshi okin bëtáshkakin Micaías kakëxa: —Min kamina sinántima ꞌain Diosan bëru ñunshinsa mibë banaima ꞌinun ꞌë ëanan mibë banaia kixun.

²⁵ Kakëxun ka Micaíasnën kakëxa: —Min kamina uínsaran nëtën kaina anu unë́ti xubu kata itsi kata itsi anu ꞌuxkë anua bari anun ꞌën kakësabi oi ꞌi kixun ꞌunánti ꞌain.

²⁶ Usakin kaia ka Israelnu ꞌikë ꞌapun Ahab kakëxa: —¡Micaías kamina ñatanbiankin Amón Alcalde Samarianu ꞌikë ꞌimainun ꞌën suntárunën kushi Joás ꞌën bakë bëchikë anu añu kara axa istankëxun mëníonun buánti ꞌain kixun ka kakëxa!

²⁷ Kakin ka ꞌën kana sipunu atsíminun xutin kixun kanan, chukúmaratsushi aín piti pán ꞌinánan ꞌumpaxribi chamaratsushi an xëati ꞌinánun kixun kamiakëxa, ꞌëx ꞌakanan kuatsini ꞌën suntárukamabë uisaibi ꞌikëma utëkëntamainun.

²⁸ Ësakin kaiabi ka Micaíasnën katëkëankëxa: “Mixmi uisaibi ꞌima asábi utëkënkë, ax ka Diosan kamikëxun ꞌën mi kakëma ꞌiti ꞌikën.”

²⁹ Usakin kakëx ka Israel unikaman ꞌapu Ahab ꞌimainun Josafat Judánu ꞌikë ꞌapu ax Ramot kakë ëma Galaad menu ꞌikë suntárukamabë ꞌakanani kuankëxa.

³⁰ ꞌAínbi ka ꞌakanani atsínuxun Israel unikaman ꞌapun Josafat kakëxa: —ꞌËx kana suntáru itsisa ꞌitánun bëtsi chupa pañubiani kuanti ꞌain, usa ꞌain kamina min ꞌën chupa pañuti ꞌain kixun ka kakëxa. Katankëxun bëtsi chupa pañubiani ka Israelnu ꞌikë ꞌapu Ahab ꞌakanani atsínkiani kuankëxa.

³¹ ꞌAínbi ka ꞌakananuxun Sirianu ꞌikë ꞌapun aín treinta y dos suntárunën kushi capitán axa aín caballonën nirinkë carretanu ikë atu kakëxa, ꞌakanankin suntárukama ꞌakinma Israel unikaman ꞌapu Ahab ꞌashi ꞌati ꞌain.

³² Ësokin kakëx ꞌakanani kuania aín autunua caballonën niribiankëxun iskin ka capitánkaman Josafat, ax isa Israelnu ꞌikë ꞌapu a ꞌikë kixun sinánkin anuxun bëara buiankëxa. Bëara buinkëxi ka Josafat aín suntárukama ꞌakinun kuëëni munuma kuënkëankëxa,

³³ usai ꞌia iskinbi ka Israel uni ꞌapu Ahab atun bëarabuinxubi ëankëxa.

³⁴ ꞌAínbi ka sirianun ꞌikë suntárunën aín kanti pia manámiokin nóokin nikinbi, anunbia bamatanun aín xabankë xanpëskabianxun Israelnu ꞌikë ꞌapu ꞌakëxa. ꞌAkëxun ka an caballonën nirinkë carreta an buánkë suntáru kakëxa: —Nirakëti kamina kuainakëti ꞌain, ꞌë kamina ꞌakanankënua chikínti ꞌain ꞌë ka tëtsórutisamaira okin ꞌakania.

³⁵ Usa ꞌain ka a nëtën ain caballonën nirinkënubi ꞌapu niakëxa, siriokamabë ain suntárukama ꞌaisamairai ꞌakanamainun: ꞌAínbi ka bari xupibukëbë aín imi ꞌitsaira ꞌibúkin anua nikë caballonën nikinkë aín carreta namë abi chabópati aín imi ꞌibúkëbë bamakëxa.

³⁶ Usa ꞌaínbi ka bari kuabúkëbëtan Israel suntárukama aín ꞌapukama ësai kia kuakëxa: “¡Mitsun xubunubi rikianan kamina mitsun menubi kuanti ꞌain,

³⁷ ꞌapu ka ꞌakankëx bamaxa, usa ꞌain kananuna ꞌakanantima ꞌain!” Usa ꞌain ka ꞌapu ñukë Samaria ëmanu uanxun maínkankëxa.

³⁸ Usakin ꞌatankëxun ka aín caballonën nikinkë unin ꞌakë ꞌian cha anuaxa bëtsi bëtsi unibë ꞌikë xanukama nashikë Samarianu ꞌikë bakanuxun chukakëxa, usakin chukaia ka kamunan Ahab aín imi biáxkakëxa, usakin ꞌatia Dios kikësabiokin ka usakin ꞌakëxa.

³⁹ Kamabi usaía Ahab ꞌia ꞌimainun usakian xubu marfil kakë ñu uxua ꞌaish iruira ꞌamianan, ëma ꞌá akama ka crónicas kirika anua Israel ꞌapukaman ñu ꞌá kuënëokë anu kuënëokë ꞌikën.

⁴⁰ Usai ꞌia Ahab ñuanka ain bakë bëchikë Ocozías ax ain papa ꞌiásaribiti ꞌapu ꞌiakëxa.