Hebreos 1 - Kaqchikel Santo Domingo (Xenacoj)

Ri Dios rukusan ri Rukꞌajol chin ndichꞌaꞌa chaqe

¹ Ri Dios santienta mul y jalajaj teq rubꞌeyal xukanoj chin xchꞌaꞌa chake ri ojer teq qatit-qamamaꞌ. Y ja ri profetas xerukusaj chin xuqꞌalajrisaj ri xrajoꞌ xubꞌij.

² Pero wokami chupan re rukꞌisibꞌel tiempo rojkꞌo, ja ri Rukꞌajol xukusaj chin xuqꞌalajrisaj ri ndirajoꞌ ndubꞌij chaqe, y ja chuqaꞌ ri Rukꞌajol xukusaj chin xubꞌen nojel ri ekꞌo chikaj y chochꞌulew, y xubꞌen chi nojel riꞌ xok richin ri Rukꞌajol.

³ Rikꞌin ri Rukꞌajol ndiqꞌalajin ri nimalej ruqꞌij ri Dios, y rikꞌin rijaꞌ nditzꞌetetej achike qitz runoꞌoj ri Dios. Ja ri ruchuqꞌaꞌ ri rutzij ri Rukꞌajol tzꞌamayon kichin nojel ri achike ekꞌo, chin keriꞌ ekꞌo pa kikꞌojlibꞌel y ma ngebꞌojbꞌoꞌ ta. Y atoq ri Rukꞌajol xuqꞌasaj yan ri kamik chin ndichꞌajchꞌojir ri qakꞌaslen roj wineq chuwech ri mak, xbꞌetzꞌuyeꞌ e chikaj pa rikiqꞌaꞌ ri nimalej Rey Dios.

⁴ Y keriꞌ xqꞌalajin chi ri Rukꞌajol más nim ruqꞌij ke chikiwech ri ángeles. Y rikꞌin chuqaꞌ xbꞌix Rukꞌajol ri Dios chare, xqꞌalajin chi rijaꞌ más nim reqalen ke chikiwech ri ángeles.

Ri Rukꞌajol ri Dios más nim ruqꞌij ke chikiwech ri ángeles

⁵ Porque ri Dios ma jumbꞌey rubꞌiꞌin kereꞌ chare jun ángel: Ja rat ri Nukꞌajol, Y wokami niqꞌalajrisaj chi jumul wi rat Nukꞌajol. Y ma jumbꞌey chuqaꞌ ri Dios kereꞌ ta rubꞌiꞌin pa ruwiꞌ jun ángel: Riyin nginok rutataꞌ Y rijaꞌ ndok nukꞌajol.

⁶ Y atoq ri Dios xuteq pe chochꞌulew ri Rukꞌajol ri kin kꞌo más ruqꞌij ke chikiwech konojel, xchꞌaꞌa chik jumbꞌey y kereꞌ xubꞌij: Iwonojel rix nu-ángeles, tiyaꞌ ruqꞌij. Keriꞌ xubꞌij ri Dios.

⁷ Jakꞌa pa kiwiꞌ ri ángeles, ri rutzij ri Dios kereꞌ ndubꞌij: Ri Dios ndubꞌen chake ri ru-ángeles chi ngeꞌok achel kaqiqꞌ Y ndubꞌen chake ri rusamajelaꞌ chi ngeꞌok achel ruxaq teq qꞌaqꞌ.

⁸ Pero pa ruwiꞌ ri Rukꞌajol, ri Dios kereꞌ xubꞌij: Rat Dios, kin richin wi jumul ndabꞌen reinar, Y kin pa ruchojmil ndabꞌen reinar.

⁹ Rat kin ndiqaꞌ chawech ndabꞌen ri utz, y kin itzel ndatzꞌet ri ma utz ta. Romariꞌ riyin ri Dios, ri a-Dios rat, xinqꞌij aceite pa awiꞌ Y rikꞌin riꞌ xinbꞌen chawa chi más santienta ngakikot Ke chikiwech ri awachibꞌil.

¹⁰ Y kereꞌ chuqaꞌ xubꞌij ri Dios chare ri Rukꞌajol: Rat Ajaw, xe jampeꞌ pa nabꞌey xabꞌen ri rochꞌulew, Y ja chuqaꞌ rat xabꞌanun ri kaj.

¹¹ Ri rochꞌulew y ri kaj kin xtikꞌis kiqꞌij, Ngejaratej achel jun tzieq, Pero rat jumul ratkꞌo.

¹² Ndabꞌat ri rochꞌulew y ri kaj achel ndibꞌan chare jun kꞌul, Y achel jun tzieq ndijal e, kin keriꞌ xtabꞌen chake. Jakꞌa rat, ma jumbꞌey ndijalatej awech, Y ri akꞌaslen ma ndikꞌis ta. Keriꞌ xubꞌij ri Dios chare ri Rukꞌajol.

¹³ Pero chare jun ángel ri Dios ma jumbꞌey kereꞌ xubꞌij: Katzꞌuyeꞌ pa wikiqꞌaꞌ, y chireꞌ kakꞌojeꞌ Kꞌa kenyaꞌ na chuxeꞌ awaqen konojel ri itzel ngetzꞌeto awichin. Ri Dios ma jumbꞌey xubꞌij keriꞌ chare jun ángel.

¹⁴ Porque konojel ri ángeles xa erusamajelaꞌ ri Dios y e-espíritus ri ngeruteq chikitoꞌik ri wineq ri achoq chake nduyaꞌ ri kolotajik.