Filemón 1 - Kaqchikel Santo Domingo (Xenacoj)

Ri Pablo nduteq ruxunaqil ruwech ri Filemón

¹ Riyin Pablo, yin tzꞌapel pa cheꞌ roma nitzijoj ri rutzij ri Cristo Jesús. Wachibꞌilan ri hermano Timoteo nitzꞌibꞌaj e re wuj reꞌ chawa rat Filemón ri tzꞌan ngatiqajoꞌ y rat qachibꞌil chupan ri rusamaj ri Dios.

² Ndiqateq e ruxunaqil ruwech ri hermana Apia. Y ndiqateq e chuqaꞌ ruxunaqil ruwech ri hermano Arquipo ri qachibꞌil chupan ri rusamaj ri Dios, y chake chuqaꞌ ri kitaqin ri Jesucristo ri ndikimal kiꞌ pa awachoch.

³ Ri Qatataꞌ Dios y ri Ajaw Jesucristo kin ta xtikiyaꞌ ki-favor pa iwiꞌ y xtikiyaꞌ chuqaꞌ uxlanen pa iwánima.

Ri Pablo ndimatioxin chare ri Dios roma ri Filemón

⁴ Kin nimatioxij chare ri nu-Dios awoma rat Filemón, y jumul ngatinkꞌuxlaꞌaj pa teq nu-oración,

⁵ porque yin wakꞌaxan chi rat kin kuqul akꞌuꞌx rikꞌin ri Ajaw Jesús y kin ndawojoꞌ, y keriꞌ chuqaꞌ ngaꞌawojoꞌ konojel ri loqꞌolej teq ralkꞌuaꞌl ri Dios.

⁶ Yin nikꞌutuj chare ri Dios chi roma kuqul akꞌuꞌx rikꞌin ri Ajaw Jesús, ngojatoꞌ y keriꞌ qachibꞌil qiꞌ pa rusamaj ri Dios. Kꞌo nimalej teq achike ngojtiker ndiqabꞌen y kin xtiqabꞌen wi rikꞌin ndawetamaj nojel ri favor yoꞌon chaqe qonojel, chin ndiyoꞌox ruqꞌij ri Cristo.

⁷ Porque riyin santienta ngikikot y kꞌo ruchuqꞌaꞌ wánima, roma wakꞌaxan chi rat kin ngaꞌawojoꞌ ri loqꞌolej teq ralkꞌuaꞌl ri Dios y kin ayoꞌon ruchuqꞌaꞌ kánima.

Ri Pablo ndukꞌutuj kamelal chare ri Filemón

⁸ Roma kꞌa riꞌ, maske yin jun rusamajel ri Cristo, y kꞌo uchuqꞌaꞌ pa nuqꞌaꞌ chin nibꞌij chawa ri ndikꞌatzin chi ndabꞌen,

⁹ pero ma niwojoꞌ ta nibꞌen mandar chawa. Xa más utz nikꞌutuj kamelal chawa roma ri ajowabꞌel chin ri Ajaw kꞌo pa qánima. Takꞌuxlaꞌaj chi yin rijilej chik achi, y pa ruwiꞌ riꞌ, wokami chuqaꞌ yin tzꞌapel pa cheꞌ roma nitzijoj ri rutzij ri Cristo Jesús.

¹⁰ Yin nikꞌutuj kamelal chawa roma ri Onésimo. Porque rijaꞌ xutaqij ri Jesucristo chireꞌ apeꞌ yin tzꞌapel pa cheꞌ, y romariꞌ xok achel walkꞌuaꞌl.

¹¹ Jumbꞌey kan, rijaꞌ jun loqꞌon asamajel ri ma kin ta xarutoꞌ. Pero wokami yalan toꞌonik nduyaꞌ chuwa, y keriꞌ nderubꞌanaꞌ awikꞌin rat chuqaꞌ.

¹² Y chin ngabꞌerutoꞌ, niteq e ri Onésimo ri tzꞌan niwojoꞌ.

¹³ Yin niwojoꞌ chi rijaꞌ ndikꞌojeꞌ ta waweꞌ chin ngirutoꞌ pa akꞌexel rat ri janipeꞌ qꞌij xkitzꞌapeꞌ pa cheꞌ roma nitzijoj ri utzulej teq tzij chin kolotajik.

¹⁴ Pero ma jun achike xinwojoꞌ xinbꞌen ri man ta xatinkꞌulubꞌej rat, chin keriꞌ ri kamelal ri nikꞌutuj chawa, kin rikꞌin nojel awánima ndabꞌen, y ma roma ta chi jariꞌ niwojoꞌ riyin.

¹⁵ Porque kolopeꞌ kꞌo utz ndukꞌen pe chawa chi ri Onésimo xbꞌa chik jukꞌan y ma xarutoꞌ ta chik, porque wokami ri nditzolij apu awikꞌin, jumul yan chik ngarutoꞌ.

¹⁶ Pero ma achel chi ta jun relik loqꞌon asamajel, porque wokami más reqalen ke chuwech jun loqꞌon samajel, roma rijaꞌ jun hermano ri tzꞌan ndiqajoꞌ. Riyin santienta niwojoꞌ, y rat ndikꞌatzin chi más ndawojoꞌ, porque rijaꞌ wokami ma xe ta jun asamajel, chuqaꞌ jun hermano ri achoq pa ránima kꞌo ri Ajaw.

¹⁷ Y keriꞌ, si rat ndanaꞌ chi junan qánima awikꞌin, takꞌamaꞌ apu ruwech ri Onésimo, achel kin ta ja yin ri ndakꞌen apu nuwech keriꞌ.

¹⁸ Y si kꞌo jun chꞌaꞌoj rubꞌanun kan chawa, o si kꞌo rukꞌas awikꞌin, tabꞌij chuwa, y yin xkitojo richin.

¹⁹ Riyin Pablo, rikꞌin nuqꞌaꞌ nitzꞌibꞌaj e chawa chi kin nitaj wi ri rukꞌas. Pero nikꞌuxlaꞌaj apu chawa chi rat kꞌo akꞌas chuqaꞌ wikꞌin, porque xawil kꞌakꞌakꞌ akꞌaslen roma xintzijoj ri rutzij ri Dios chawa.

²⁰ Rat hermano Filemón, niwojoꞌ chi ndabꞌen ri kamelal ri nikꞌutuj chawa, y chi ndabꞌen chuwa chi ngikikot awoma, roma xe jun qabꞌanun rikꞌin ri Cristo.

²¹ Yin xintzꞌibꞌaj e re wuj reꞌ chawa roma wetaman chi kin nganiman wi, y chi xtabꞌen más ke chuwech ri nikꞌutuj chawa.

²² Tabꞌanaꞌ apu chuqaꞌ rukꞌojlen jun apeꞌ ngikꞌojeꞌ, porque yin kuqul nukꞌuꞌx chi roma ri oración ri ndibꞌen rix woma, ri Dios kin xtubꞌen chi ngixbꞌentzꞌetaꞌ.

Ri rukꞌisibꞌel teq ruxunaqil ruwech ri Filemón

²³ Ri hermano Epafras ri junan roj tzꞌapel rikꞌin pa cheꞌ roma ndiqatzijoj ri rutzij ri Cristo Jesús, nduteq e ruxunaqil awech.

²⁴ Y ri Marcos, ri Aristarco, ri Demas y ri Lucas ri ewachibꞌil pa samaj ndikiteq e chuqaꞌ ruxunaqil awech.

²⁵ Ri favor ri nduyaꞌ ri Ajaw Jesucristo kin ta xtikꞌojeꞌ pa iwánima.