Efesios 1 - Kaqchikel Santo Domingo (Xenacoj)

Ri Pablo nduteq ruxunaqil kiwech ri hermanos

¹ Riyin Pablo jun apóstol chin ri Cristo Jesús roma jariꞌ rurayibꞌel ri Dios. Nitzꞌibꞌaj e re wuj reꞌ chiwa rix ri loqꞌolej rutinamit ri Dios ri rixkꞌo pa tinamit Éfeso, ri xe jun ibꞌanun rikꞌin ri Cristo Jesús ri itaqin.

² Ri Qatataꞌ Dios y ri Ajaw Jesucristo kin ta xtikiyaꞌ ki-favor pa iwiꞌ y xtikiyaꞌ chuqaꞌ uxlanen pa iwánima.

Tiqayaꞌ ruqꞌij ri Dios roma ri samaj rubꞌanun chiqakolik

³ Kin ta xtiyoꞌox ruqꞌij ri ru-Dios y Rutataꞌ ri Qajaw Jesucristo, roma ruyoꞌon nojel ruwech favores chin chikaj chaqe roma xe jun qabꞌanun rikꞌin ri Cristo.

⁴ Porque ri Dios xojruchaꞌ xe jampeꞌ pa nabꞌey atoq kꞌajani tubꞌen ri rochꞌulew chin xubꞌen chaqe chi xe jun xqabꞌen rikꞌin ri Cristo chin ngojok chꞌajchꞌaj y loqꞌolej chuwech. Y roma santienta roj rojowan pe,

⁵ xubꞌen ruwech xe jampeꞌ pa nabꞌey chi nduyaꞌ rubꞌiꞌ chiqij chin ngojok ralkꞌuaꞌl, kin achel ri rurayibꞌel y achel xqaꞌ chuwech chi xubꞌen, y riꞌ roma ri xubꞌen ri Jesucristo pa qakꞌexel,

⁶ chin ndiqayaꞌ ruqꞌij ri Tataꞌaj Dios, roma ri nimalej ru-favor rusipan chaqe y ruyoꞌon pa qawiꞌ roj ri xe jun qabꞌanun rikꞌin ri Rukꞌajol ri kin tzꞌan ndirajoꞌ.

⁷ Y roma xbꞌiyin ri rukikꞌel ri Rukꞌajol, xojrelesaj pa ruqꞌaꞌ ri tzꞌamayon qichin y xukuy qamak, chin keriꞌ ndiqꞌalajin chi ri favor ruyoꞌon pa qawiꞌ kin nimalej bꞌeyomal.

⁸ Y kin santienta favor ruyoꞌon pa qawiꞌ, roma ruyoꞌon nojel ruwech etamabꞌel y nojibꞌel chaqe,

⁹ chin xqakꞌoxomaj ri rurayibꞌel, ri ma kin ta qꞌalej rubꞌeyal ojer kan y chupan re tiempo reꞌ xuqꞌalajrisaj chiqawech, porque keriꞌ xubꞌen ruwech xe jampeꞌ pa nabꞌey chi ndubꞌen y ja ri Cristo xukusaj chin xubꞌen.

¹⁰ Porque xubꞌen ruwech chi nojel ri achikejeꞌ ekꞌo chochꞌulew y ekꞌo chikaj ngeruyaꞌ chuxeꞌ rutzij ri Cristo atoq nderilaꞌ ri tiempo ri rubꞌanun pe ruwech xe jampeꞌ pa nabꞌey.

¹¹ Y roj ri xe jun qabꞌanun rikꞌin ri Cristo, ri Dios roj ruchaꞌon pe xe jampeꞌ pa nabꞌey chin ngojok rutinamit, porque rubꞌanun pe ruwech chi keriꞌ ndubꞌen chaqe roma ja wi riꞌ ri rurayibꞌel.

¹² Roj ruchaꞌon pe chin ndiyoꞌox ruqꞌij rijaꞌ, roma ndiqꞌalajin ri nimalej ruqꞌij pa qakꞌaslen roj ri más nabꞌey xqataqij ri Cristo.

¹³ Keriꞌ chuqaꞌ rix ri ma israelitas ta, atoq xiwakꞌaxaj rutzijol ri qetzij, ri utzulej teq tzij ri rukꞌamon pe kolotajik chiwa, xitaqij ri Cristo, y xe jun xibꞌen rikꞌin, romariꞌ ri Dios xuyaꞌ pe ri Espíritu Santo pa iwánima, achel rubꞌiꞌin kan chi nduyaꞌ. Y ri Espíritu Santo, ja rijaꞌ ri etal chi rix richin ri Dios.

¹⁴ Y ri Espíritu Santo yoꞌon pa qánima, jun etal chuqaꞌ chi ri Dios kꞌo más nduyaꞌ chaqe chupan ri qꞌij atoq nditzꞌaqet ri qakolotajik roj ri roj loqꞌon roma rijaꞌ chin ndinimrisex rubꞌiꞌ roma kin nimalej ruqꞌij.

Ri Pablo ndubꞌen orar koma ri kitaqin ri Ajaw

¹⁵ Riyin xinwakꞌaxaj chi kuqul ikꞌuꞌx rikꞌin ri Ajaw Jesús, y tzꞌan ngeꞌiwojoꞌ konojel ri loqꞌolej ralkꞌuaꞌl ri Dios.

¹⁶ Romariꞌ jumul ngimatioxin chare ri Dios iwoma y ngixinkꞌuxlaꞌaj pa teq nu-oración.

¹⁷ Nikꞌutuj chare ri Tataꞌaj Dios ri kin nimalej ruqꞌij, ri ru-Dios ri Qajaw Jesucristo, chi tusipaj nojibꞌel pataneq rikꞌin ri Espíritu Santo chiwa y tuqꞌalajrisaj chiwech ri utzulej runoꞌoj chin ndiwetamaj utz-utz achike rijaꞌ.

¹⁸ Nikꞌutuj chuqaꞌ chare ri Dios chi tuyikꞌaj más ri iwánima, chin ndiwetamaj más chirij ri favor qoyobꞌen ri achoq roma xojroyoj ri Dios, y chi ndiwetamaj chuqaꞌ janipeꞌ reqalen y roruqꞌij ri herencia rusujun chaqe roj ri loqꞌolej rutinamit,

¹⁹ y chin ndiwetamaj chuqaꞌ chi ri ruchuqꞌaꞌ ri Dios ri ndisamej pa qánima roj ri qataqin, kin santienta nim. Y riꞌ ja ri uchuqꞌaꞌ ri xukusaj ri Dios

²⁰ chin xukꞌastajbꞌaꞌ pe ri Cristo chikikajal ri animaꞌiꞌ, y chin chuqaꞌ xubꞌen chare chi xbꞌetzꞌuyeꞌ e chikaj rikꞌin pa rikiqꞌaꞌ.

²¹ Ri Dios xubꞌen chare ri Cristo chi más nim ruqꞌij pa kiwiꞌ konojel ri espíritus ri ngebꞌanun gobernar, ri espíritus kꞌo nimalej uchuqꞌaꞌ pa kiqꞌaꞌ, ri kꞌo ruchuqꞌaꞌ kitzij pa kiwiꞌ chꞌaqa chik, ri kin enimalej teq ajaw, y pa kiwiꞌ konojel ri kin nimalej kibꞌiꞌ. Ri Cristo más nim ruqꞌij ke chikiwech rejeꞌ chupan re tiempo rojkꞌo y ri tiempo más chiqawech apu.

²² Ri Dios xubꞌen chi chuxeꞌ rutzij ri Cristo xkꞌojeꞌ nojel, y xuyaꞌ ri Cristo chi ukꞌuey bꞌey kichin konojel ri loqꞌolej ralkꞌuaꞌl.

²³ Rejeꞌ eꞌokuneq ruqꞌa-raqen ri Cristo, y chupan ri cuerpo riꞌ nditzꞌaqatisex kikꞌaslen roma ri Cristo, ri nditzꞌaqatisan nojel.