3 Juan 1 - Kaqchikel Santo Domingo (Xenacoj)

Ri Juan nduteq ruxunaqil ruwech ri hermano Gayo

¹ Riyin Juan, jun ukꞌuey bꞌey chikiwech ri hermanos, nitzꞌibꞌaj e re wuj reꞌ chawa rat hermano Gayo ri tzꞌan ngatojowex. Niteq e ruxunaqil awech rat ri qetzij ngatinwojoꞌ.

Ri Juan ndikikot roma ri utz ngerubꞌanalaꞌ ri hermano Gayo

² Riyin ri tzꞌan ngatinwojoꞌ, nirayij chi achel utz bꞌaneq ri akꞌaslen chuwech ri Dios, ke ta riꞌ bꞌaneq nojel chawech y man ta ngayawej.

³ Porque riyin santienta xikikot atoq xetuqaqa jujun hermanos, y xukibꞌij chuwa chi rat kin kꞌo awánima rikꞌin ri qetzij ruqꞌalajrisan ri Dios, y chupan ri qetzij akꞌuan ri akꞌaslen.

⁴ Ri más ndubꞌen chuwa chi ngikikot, jareꞌ: Niwakꞌaxaj chi ri kitaqin ri Jesucristo, ri kin eꞌachel walkꞌuaꞌl, kikꞌuan ri kikꞌaslen chupan ri qetzij.

⁵ Rat ri tzꞌan ngatinwojoꞌ, kin pa ruchojmil wi ngatajin rikꞌin chikitoꞌik ri hermanos, y más keriꞌ ndabꞌen chikitoꞌik ri hermanos aj jukꞌan chik apeꞌ ri ngebꞌeqaqa pa atinamit.

⁶ Rejeꞌ xukibꞌij chaqe roj ri ndiqamal qiꞌ pa rubꞌiꞌ ri Dios chi rat tzꞌan ngatojowan, y utz ndabꞌen chi ndayaꞌ chik e ri ndikꞌatzin chake chin ndikitzꞌen chi e kibꞌey apejeꞌ na ngebꞌa. Pero tabꞌanaꞌ achel kin ta ja ri Dios ndiyoꞌon e chake.

⁷ Porque rejeꞌ kin rusamaj ri Jesucristo ebꞌaneq chubꞌanik, y ma jun kitoꞌik ndikikꞌutuj chake ri wineq ri achoq chake ndikitzijoj rubꞌiꞌ.

⁸ Romariꞌ, ndikꞌatzin chi ja roj ngojtoꞌon kichin, chin keriꞌ, ngojtoꞌon jubꞌaꞌ chin ndibꞌa más rutzijoxik ri qetzij ruqꞌalajrisan ri Dios.

Ri rukꞌaslen ri Diótrefes y ri rukꞌaslen ri Demetrio

⁹ Riyin xintzꞌibꞌaj yan e jun wuj chake ri ndikimal kiꞌ pa rubꞌiꞌ ri Dios chiriꞌ pa atinamit, pero ri Diótrefes ndirajoꞌ chi xe rijaꞌ ri ndinimex rutzij koma ri hermanos ekꞌo chiriꞌ, y romariꞌ ma ndunimaj ta ri nubꞌiꞌin e chupan ri wuj riꞌ.

¹⁰ Romariꞌ, atoq ngibꞌeqaqa iwikꞌin, nechꞌolij, nebꞌij chare chi ma utz ta ri ndubꞌanalaꞌ. Porque rijaꞌ nduqasaj qaqꞌij rikꞌin ri aqꞌ ndubꞌilaꞌ chiqij, y ma xe ta riꞌ, porque ma ndukꞌen ta apu kiwech ri hermanos ri ngebꞌeqaqa, nixta nduyaꞌ qꞌij chake ri hermanos aj chiriꞌ chi ndikikꞌen apu kiwech. Y ri ngekꞌamo apu kiwech, ngerelesaj e chikikajal ri hermanos ri ndikimal kiꞌ pa rubꞌiꞌ ri Ajaw.

¹¹ Rat Gayo ri tzꞌan ngatinwojoꞌ, nibꞌij chawa chi ma tawoqaj ri itzel teq achike ngekibꞌanalaꞌ chꞌaqa chik, rat kin tawoqaj ri utz. Ri ndibꞌanun ri utz, kin chin wi ri Dios, jakꞌa ri ndibꞌanun itzel teq achike, ma retaman ta runoꞌoj ri Dios.

¹² Konojel hermanos ndikibꞌij chi ri hermano Demetrio jun utzulej hermano, porque kin ukꞌuan rukꞌaslen roma ri qetzij. Roj chuqaꞌ utz rutzijol ndiqayaꞌ ri Demetrio, y rat awetaman chi ri ndiqabꞌij kin qetzij wi.

Ri rukꞌisibꞌel ruxunaqil kiwech ri hermanos

¹³ Riyin kꞌa kꞌiy achike ri niwojoꞌ nibꞌij e chawa, pero ma niwojoꞌ ta ngentzꞌibꞌaj e chuwech wuj.

¹⁴ Porque niwojoꞌ ngatentzꞌetaꞌ yan, chin keriꞌ nibꞌij chawa ri kꞌo pa wánima.

¹⁵ Ri uxlanen ri nduyaꞌ ri Ajaw kin ta xtikꞌojeꞌ pa awánima. Ri qachibꞌil waweꞌ ndikiteq e ruxunaqil awech. Rat tayaꞌ chuqaꞌ ruxunaqil kiwech chikijununal ri qachibꞌil ri ekꞌo chiriꞌ.