1 Juan 1 - Kaqchikel Santo Domingo (Xenacoj)

Ri Jun ri ndiqꞌalajrisan runoꞌoj ri Dios nduyaꞌ kꞌaslen

¹ Re wuj re nitzꞌibꞌaj e chiwa, ndichꞌaꞌa pa ruwiꞌ ri Jun ri kin xixkꞌo wi atoq kꞌajani tibꞌan ri kaj y ri rochꞌulew. Y roj ri roj apóstoles kin rikꞌin qawech xqatzꞌet rijaꞌ, rikꞌin qaxikin xqakꞌaxaj ri xubꞌij, y rikꞌin qaqꞌaꞌ xqatzꞌen. Y ri achoq pa ruwiꞌ ngojchꞌaꞌa, ja ri Jun ri ndiqꞌalajrisan runoꞌoj ri Dios y nduyaꞌ kꞌaslen.

² Ri Jun ri ndiyoꞌon kꞌaslen, xuruqꞌalajrisaj riꞌ chochꞌulew y roj rikꞌin qawech xqatzꞌet, y ndiqatzijoj chi qetzij porque xqatzꞌet. Y ri kꞌaslen nduyaꞌ rijaꞌ, ja ri kꞌaslen ma ndikꞌis ta. Y ri ndiyoꞌon ri kꞌaslen riꞌ, kin xixkꞌo wi rikꞌin ri Tataꞌaj Dios, y xuruqꞌalajrisaj riꞌ chiqawech.

³ Ndiqatzijoj chiwa ri xqatzꞌet y ri xqakꞌaxaj, chin keriꞌ ma ndiyaꞌ kan chi xe jun ibꞌanun qikꞌin, achel xe jun qabꞌanun rikꞌin ri Qatataꞌ Dios, y rikꞌin ri Jesucristo ri Rukꞌajol.

⁴ Nojel reꞌ ndiqatzꞌibꞌaj chiwa, chin keriꞌ tzꞌaqet ndikikot qánima roj qonojel.

Ndikꞌatzin ndiqabꞌij chare ri Dios ri mak qabꞌanun

⁵ Y jareꞌ ri tijonik rukꞌutun kan ri Jesucristo chiqawech y ndiqatzijoj chiwa wokami: Ri Dios kin luz wi, y rikꞌin rijaꞌ ma jun qꞌequꞌ kꞌo.

⁶ Si ndiqabꞌij chi xe jun qabꞌanun rikꞌin ri Dios, pero xa qakꞌuan ri qakꞌaslen pa qꞌequꞌ, xa ngojreqꞌon, y ma ndiqabꞌen ta ri qetzij pa qakꞌaslen.

⁷ Pero si ndiqakꞌuaj qakꞌaslen pa luz achel rijaꞌ kꞌo pa luz, riꞌ ndubꞌen chaqe chi xe jun ndiqabꞌen chiqawech kikꞌin ri hermanos, y ri rukikꞌel ri Jesús ri Rukꞌajol, qꞌij-qꞌij ngojruchꞌajchꞌojrisaj chuwech nojel qamak.

⁸ Si ndiqabꞌij chi nixta jun qamak, xa qayon ndiqachꞌakatij qiꞌ, y ri qetzij ma kꞌo ta pa qánima.

⁹ Pero si ndiqayaꞌ chiqij ri mak qabꞌanun, rijaꞌ kin ndukuy ri qamak y ngojruchꞌajchꞌojrisaj chuwech nojel ri itzel teq achike qabꞌanaloꞌon. Rijaꞌ ndukuy qamak, porque kin chojmilej y kin ndubꞌen wi ri ndubꞌij.

¹⁰ Si ndiqabꞌij chi maneq mak qabꞌanun, ndiqabꞌen chare achel xa jun reqꞌóta keriꞌ, y ri rutzij ma kꞌo ta pa qánima.