Зәкәрьяһ 5 - Башкирский ВЗ (неполный)

Алтынсы күренмеш: осоп йөрөгән төргәк китап

¹ Күҙҙәремде күтәреп ҡараһам: осоп йөрөгән бер төргәк китап күрҙем.

² Фәрештә минән: – Нимә күрәһең? – тип һораны. – Осоп йөрөгән бер төргәк китап күрәм. Оҙонлоғо егерме терһәк, киңлеге ун терһәк, – тип яуапланым.

³ – Бөтә ер йөҙөнә яуасаҡ ләғнәт был, – тине фәрештә. – Уның бер яғында яҙылғанса, урлашҡан һәр кеше язаһыҙ ҡалмаясаҡ. Икенсе яғында яҙылғанса, ялған ант иткәндәр ҡыуыласаҡ.

⁴ «Был ләғнәтте Мин ебәрҙем, – тип белдерә Күк ғәскәрҙәре Раббыһы. – Ул бурҙың һәм Минең исемем менән ялған ант итеүсенең өйөнә инәсәк. Ул был өйҙә ундағы һәр бер ағас киҫәге, һәр бер таш онталып юҡҡа сыҡҡанға тиклем ҡаласаҡ».

Етенсе күренмеш: үлсәү һауыты эсендәге ҡатын

⁵ Минең менән һөйләшкән фәрештә килеп: – Күтәрелеп ҡара әле, – тине. – Нимә сығып килгәнен күрәһең?

⁶ – Был нимә ул? – тип һораным. – Үлсәм һауыты, – тине һәм: – Ул бөтә ил халҡының ғәйептәре менән тулы, – тип өҫтәне.

⁷ Бына һауыттың ҡурғаш ҡапҡасы ҡалҡытылды. Һауыт эсендә бер ҡатын ултыра ине.

⁸ Фәрештә: – Ә был яманлыҡтың үҙе, – тине лә ҡатынды һауыт эсенә ҡабат тығып, ҡурғаш ҡапҡас менән ҡаплап ҡуйҙы.

⁹ Башымды күтәреп ҡарағайным, ел сығарып төшөп килгән ике ҡатынды күрҙем. Уларҙың ҡауҙыныҡына оҡшаған ҡанаттары бар ине. Улар һауытты ер менән күк араһына күтәрҙе.

¹⁰ Минең менән һөйләшкән фәрештәнән: – Һауытты ҡайҙа алып баралар? – тип һораным.

¹¹ – Шинғар еренә, – тип яуап ҡайтарҙы фәрештә. – Унда һауыт өсөн бер йорт төҙөләсәк һәм ул шунда, үҙ таяуына, ҡуйыласаҡ.