Зәбүр 8 - Башкирский ВЗ (неполный)

¹ Йырсылар етәксеһенә: «Гиттиҫ» көйөнә. Дауыттың мәҙхиәһе.

² Раббы Хакимыбыҙ! Исемең ниндәй ғиззәтле бөтә ер йөҙөндә! Асмандан юғарыраҡ Һинең шөһрәтең!

³ Сабыйҙар, имсәк балаларҙың ауазы менән Дошмандар һәм үслеләргә ҡаршы Һин нығытма ҡорҙоң, уларға ахыр ҡуйҙың.

⁴ Бармаҡтарың әүәләгән күккә баҡтым, Һин урынлаштырған ай менән йондоҙҙарға ҡараным.

⁵ Әҙәм заты нимә инде? Ә Һин уның хаҡында уйлайһың! Бәндә балаһы кем – уны хәстәрләйһең?

⁶ Уны Алланан саҡ ҡына түбән иттең; Шөһрәт һәм хөрмәт тажы кейҙерҙең.

⁷ Ҡулыңдың ижадына уны хаким ҡылдың, Бөтә нәмәне аяғы аҫтына һалдың:

⁸ Эре һәм ваҡ малды, Ҡырағай хайуанды,

⁹ Күктәге ҡош, диңгеҙҙәге балыҡ, Даръяларҙа йөҙгән һәммәһен.

¹⁰ Эй Раббы Хакимыбыҙ, Бөтөн ер йөҙөндә исемең ниндәй ғиззәтле!