Зәбүр 54 - Башкирский ВЗ (неполный)

¹ Йырсылар етәксеһенә: Ҡыллы уйын ҡоралдарында – Дауыттың уйланыуҙары.

² Эй Алла, доғамды ишет, Йәшенмәсе ялбарыуҙарымдан!

³ Илтифат ит, яуап ҡайтар зинһар. Хәсрәт сорнап алды, ҡайғыларға баттым

⁴ Дошмандарҙың тауышынан, Залимдарҙың иҙеүенән. Сөнки мине ғазапҡа һалдылар, Ажарланып өҫтөмә ябырылдылар.

⁵ Күкрәгемдә йөрәгем дерелдәй, Башыма үлем дәһшәте төштө.

⁶ Ҡурҡыу һәм тетрәнеү биләп алды, Ҡотом осоп ҡалтырауға ҡалдым.

⁷ Шул саҡ үҙ-үҙемә әйттем: «Күгәрсендәй ҡанатлы булһамсы! Осор ҙа тынғылыҡ табыр инем.

⁸ Алыҫ-алыҫтарға ҡасыр инем, Ҡырға барып оя ҡорор инем. Села

⁹ Йәһәтерәк ышыҡланыр инем Был уҫал елдәрҙән, дауылдарҙан.

¹⁰ Эй Хаким, туҙҙыр уларҙы, Ҡуйышҡан һүҙҙәрен тарҡат, Сөнки мин ҡалала йәбер-золом, ыҙғыш күрәм.

¹¹ Улар көн-төн диуарҙар өҫтөндә йөрөй, Ә ҡала эсендә – яуызлыҡ һәм ҡаза.

¹² Ҡаланың уртаһында – һәләкәт, Майҙандарынан юғалмай иҙеү, мәкер.

¹³ Әгәр мине дошман күргән мыҫҡыллаһа, түҙер инем. Күрә алмаған берәү кәмһетһә, ҡасып китә алыр инем.

¹⁴ Әммә быны һин эшләнең, үҙем һымаҡ ишем, Ихлас иптәшем, серҙәш дуҫым.

¹⁵ Һинең менән һөйләшеп һүҙебеҙ бөтмәҫ ине, Күмәкләшеп Алла йортона барыр инек…

¹⁶ Дошмандарға көтмәгәндә үлем килһен, Улар тере килеш үлеләр донъяһына олаҡһын; Сөнки өйҙәре лә, булмышы ла золом тулы.

¹⁷ Мин иһә Аллаға һығынырмын, Һәм Раббы мине ҡотҡарыр.

¹⁸ Кис, иртән һәм төш мәлендә ялынырмын, Инәлермен – Ул тауышымды ишетер.

¹⁹ Иҫәпһеҙ күп булғанда ла һөжүм иткән дошмандарым Уларҙан йәнемде йолоп алыр.

²⁰ Мәңгелектән Үҙ тәхетендә ултырған Алла Ишетер ҙә уларҙы йыуашландырыр. Села Сөнки улар үҙгәрергә теләмәйҙәр, Һис кенә лә Алланан ҡурҡыу белмәйҙәр.

²¹ Юлдашым дуҫтарына ҡаршы ҡул күтәрҙе, Минең менән төҙөгән килешеүгә хыянат итте.

²² Ауыҙынан бал-май тама, Тик күңелендә – дошманлыҡ. Һүҙҙәре зәйтүн майынан йомшаҡ, Ә асылда – яланғас ҡылыстыр.

²³ Ҡайғы йөгөңдө Раббыға тапшыр, Ул һиңә таяныс булыр. Һис ҡасан да тоғро бәндәһенә йығырға ирек бирмәҫ.

²⁴ Эй Алла, яуыздарҙы Һин Үлем соҡорона олаҡтырырһың. Ҡан эскес, мәкерле бәндәләр Ғүмерҙәренең уртаһына ла етмәҫ. Мин иһә Һиңә өмөт бағлайым.