Йырҙар йыры 3 - Башкирский ВЗ (неполный)

Ҡыҙ

¹ Төнө буйы түшәгемдә Йән һөйгәнемде эҙләнем. Эҙләнем, тик таба алманым.

² «Торайым, ҡаланы әйләнәйем, Урамдарҙан, майҙандарҙан йөрөп Йән һөйгәнемде эҙләйем», – тинем. Эҙләнем, тик таба алманым.

³ Ҡала буйлап йөрөгән һаҡсыларҙы осраттым, Һораным: «Күрмәнегеҙме һөйгәнемде?»

⁴ Улар янынан китеүем булды, Йән һөйгәнемде мин таптым. Ҡосаҡлап алдым да ебәрмәнем; Уны әсәйем өйөнә, Мине тапҡан әсәм бүлмәһенә алып ҡайттым.

⁵ Ғәзәлдәр һәм боландар хаҡына Ялбарамын һеҙгә, эй Йәрүсәлим ҡыҙҙары! Беҙҙе был һөйөүҙән уятмағыҙ, ҡуҙғатмағыҙ, Танһығыбыҙ ҡанғанғаса ҡалһын.

Ҡыҙҙың әхирәттәре

⁶ Ни был сүлдән күтәрелгән Төтөн бағанаһы һымаҡ килгән, Сауҙагәрҙең төрлө хушбуйҙары, Мирра-ладан еҫен таратҡан?

⁷ Был – Сөләймәндең тәхет-түшәге! Алтмыш баһадир уратҡан уны, Исраилдың батыр егеттәре.

⁸ Барыһы ла ҡылыс таҡҡан, Оҫта һуғышсылар. Төнгө дәһшәттән һаҡланыу өсөн Һәммәһенең ҡылысы билендә.

⁹ Сөләймән батша тәхет-түшәген Ливан ағастарынан яһатҡан.

¹⁰ Терәүҙәре – көмөш, һөйәнгесе – алтын. Ултырғысы ҡуйы ҡыҙыл туҡыманан. Йәрүсәлимдең ҡыҙҙары уның эсен Мөхәббәт менән биҙәгән.

¹¹ Сион ҡыҙҙары, сығығыҙ, Туй көнөндә, йөрәге шатлыҡҡа тулған көндә, Әсәһе биргән таж кейгән Сөләймәнгә ҡарағыҙ!