Рүүт 2 - Бурятский Библия. Отдельные книги Ветхого Завета

Рүүт Бооһазай таряалан дээрэ

¹ Наомиидэ үбгэнөөрнь түрэл болохо Бооһаз гэжэ хүн бии һэн. Тэрэ хүндэтэй, баян, Элимээлэхэй угай бэлэй.

² Моһааб Рүүт Наомиидэ: — Таряалан руу ошохыемни намайе табиит. Хэн нэгэнэй зүбшөөбэл, хойноһоонь ябажа, унаһан хоолос түүхэб, — гэхэдэнь, Наомии тэрээндэ: — Басагамни, ошо даа, — гэбэ.

³ Иигэжэ тэрэ ябажа, таряа хадагшадай араһаа унажа үлэһэн хоолос түүбэ. Һанаамсаргүй тэрэ гэнтэ Элимээлэхэй угай Бооһазай таряалангай хуби дээрэ ерэшэһэн байба.

⁴ Тиигэһээр Бооһаз Бэтлэһээмһээ ерэжэ, таряа хадагшадта: — Эзэн таанартай хамта оршохонь болтогой! — гэхэдэ тэдэ: — Эзэн таниие үреэхэнь болтогой! — гэжэ харюусаба.

⁵ Таряа хадагшадай ажал хинагша зарасаһаа Бооһаз: — Энэ хэнэй басаган бэ? — гэжэ асууба.

⁶ Таряа хадагшадай ажалай түлөө харюусалгатай зарасань: — Тэрэ Моһааб нютагһаа Наомиитэй хамта бусажа ерэһэн моһааб залуу эхэнэр юм.

⁷ «Таряа хадагшадай хойноһоо ябажа, боолтонуудай хоорондуур унаһан хоолос түүхыемни зүбшөөгыт», — гэжэ намайе гуйгаад, хара үглөөнһөө мүнөө болотор тэрэ ажаллажа байна, һарабша доро амархань үсөөн, — гэжэ харюусаба.

⁸ Бооһаз Рүүдтэ иигэжэ хэлэбэ: — Басагамни, шагна. Хаягдаһан хоолос түүхэеэ ондоо таряалан руу бү ошо, эндэһээ бү холодо, минии шэбэгшэ эхэнэрнүүдтэй хамта үлэ.

⁹ Тэдэнэй хадаха таряалангые хаража, араһаань ябаарай. Шамайе үлдэжэ болохогүй гэжэ би зарасанартаа захирааб. Ангахадаа, минии зарасанарай удхажа абаад уудаг һаба руу ошожо уугаарай.

¹⁰ Рүүт газарта хүрэтэр доро дохижо, тэрээндэ: — Минии хариин хүн байгаашье һаа, та юундэ намда иимэ энэрхыгээр ханданабта? Би яагаад танай талархалда хүртөө гээшэбиб? — гэбэ.

¹¹ Бооһаз тэрээндэ харюусан: — Үбгэнэйнгөө наһа бараһанай дараа шинии хадам эжыдээ хэһэн бүхы юумые, эхэ, эсэгэеэ, түрэһэн нютагаяа орхижо, урид хэзээшье мэдээгүй арад түмэн руу ерэһэн тухайшни намда зон дуулгаа һэн.

¹² Энэ хэрэгэйшни түлөө Эзэн шагнахань болтогой! Израилиин Эзэн Бурханһаа ерэхэ шагналынь дүүрэн байха болтогой! Тэрэнэй дали доро хоргодохо газар бэдэрэн ерээш, — гэбэ.

¹³ Тиихэдэнь тэрэ: — Эзэмни, та намда угаа энэрхыгээр хандабат. Намтай зохидоор хөөрэлдэжэ, һанаа сэдьхэлыем заһабат. Харин би танай али нэгэн шэбэгшын шэгшыдэшье хүрэхэгүй гээшэлби, — гэбэ.

¹⁴ Эдеэ хоол бариха сагай ерэхэдэ, Бооһаз тэрээндэ: — Наашаа дүтэлөөд, хилээмэнһээ эди, тэрэнээ уксус руу дүрөөд эди, — гэбэ. Тиихэдэнь тэрэ таряа хадагшадай хажууда ерэжэ һууба. Бооһаз тэрээндэ хуураһан орооһо үгэбэ. Рүүт эдижэ садаад, заримыень үлээбэ.

¹⁵ Тиигээд тэрэ бодожо, үлэһэн хоолос суглуулхаяа ошобо. Бооһаз зарасанартаа иигэжэ захирба: — Таряанай боолтонуудай хоорондууршье тэрэ суглуулаг, бү доромжологты тэрэниие.

¹⁶ Таряа бооходоо, хоолос унагаажа, тэрээндэ үлөөгты. Суглуулаг, бү тэрэниие хараагты.

¹⁷ Иигэжэ Рүүт үдэшэ болотор унаһан хоолос түүбэ. Түүһэн таряагаа сохиходонь, нэгэ томо һуулга дүүрэтэр таряан гараба.

¹⁸ Энээнээ абаад, тэрэ хото руу ошожо, хадам эжыдээ харуулба. Тиигээд үнөөхи эдижэ садаһанайнгаа удаа үлөөһэн эдеэгээ гаргажа, хадам эжыдээ үгэбэ.

¹⁹ Хадам эжынь тэрээндэ: — Хаягдаһан хоолосые хаана мүнөөдэр түүбэш? Хаана ажаллабаш? Шам тушаа һанаагаа табиһан хүн юрөөгдэхэнь болтогой! — гэбэ. Иигээд Рүүт хэнтэй ажаллаһан тухайгаа хадам эжыдээ хөөрэжэ: — Минии ажаллаһан таряалангай эзэнэй нэрэнь Бооһаз, — гэжэ хэлэбэ.

²⁰ Наомии бэридээ: — Амиды болон нүгшэһэншье зониие энэрэлээрээ орхидоггүй Эзэн тэрэ хүниие үреэхэнь болтогой! Тэрэ хүн болбол бидэндэ ойрын түрэлэй хүн, бидэниие худалдан абаха эрхэтэнэй нэгэн юм, — гэжэ хэлэбэ.

²¹ Моһааб Рүүт: — Тэрэ хүн үшөө «минии зарасанарай бүхы ургасые хуряажа дүүргэтэр тэдэнэй хажууһаа бү холодоорой» гэжэ намда хэлээ бэлэй, — гэбэ.

²² Наомии Рүүт бэридээ: — Басагамни, тэрэ хүнэй шэбэгшэнэртэй хамта гарахашни һайн, ондоо таряалан дээрэ ябабалшни, шамда үсэрэлдэжэ болохо бшуу, — гэжэ хэлээ һэн.

²³ Иигэжэ Рүүт хаягдаһан хоолос түүхын тула ешмээн болон шэниисэ хуряаха ажалай дүүрэтэр Бооһазай шэбэгшэ эхэнэрнүүдһээ холодобогүй. Тэрэ хадам эжытэеэ хамта ажаһууһан зандаа байгаа.