Псалманууд 72 - Бурятский Библия. Отдельные книги Ветхого Завета

1 [Соломоон тухай.]

¹ [Соломоон тухай.] Бурхан, хаанда зүб шударгаяа, хаанай хүбүүндэ үнэн зүбөө үршөөгыт.

² Арад түмэнииетнай тэрэ зүбөөр сүүдлэн байг, үгытэй зонойтнай зарга хэрэгүүдые зүб шударгаар шиидхэдэг байг.

³ Хадаһаа зондо һайн байдал, гүбээнүүдһээ үнэн зүб ерэг лэ.

⁴ Ядуу зоной зарга хэрэгүүдые шиидхэг, үгытэй хүнэй хүүгэдые абараг, дарлагшые усадхаг лэ.

⁵ Наран мэтэ удаан сагта тэрэ ажаһууг, һарын яларжа байхада үеһөө үөдэ дамжан оршог лэ.

⁶ Тэр хатаһан үбһэ ногоон дээрэ бороодол, газарай хүрьһэ уһалагша аадар мэтэ буужа ерэхэнь болтогой!

⁷ Тэрэнэй үе сагта зүб шударга хүн сэсэг мэтэ һалбаран байг, һарын туяарха сагта аза жаргал дэлгэрэн-билтаран байг.

⁸ Тэрэ далайһаа далай хүрэтэр, мүрэнһөө газар дэлхэйн заха хизаар хүрэтэр захиран зонхилон байхань болтогой!

⁹ Сул губиин амитад урдань һүгэдэн унажа, дайсадынь тооһо шорой долёожо байг лэ.

¹⁰ Таршиишэй болон олтирогуудай хаашуул алба татабари асараг, Шээба болон Севаагай хаашуул бэлэг барин байг.

¹¹ Бүхы хаашуул урдань һүгэдэг лэ, бүхы үндэһэ яһатан тэрээндэ алба хэг.

¹² Туһа эрин дуудажа байгааша үгытэйшүүлые, хэншье тэдээндэ туһалдаггүй — тиимэ ядуунуудые тэрэ абарха.

¹³ Үгытэй ба ядуу хүниие тэрэ хайрлаха, хооһон зондо тэрэ туһалха.

¹⁴ Хүсэрхэлһээ болон дарлалтаһаа тэдэниие тэрэ абарха, наһа бараха ушарыень хараха тэрээндэ хүндэ байха.

¹⁵ Амиды мэндэ байхань болтогой! Шээбын алта тэрээндэ асараг лэ! Тэрэнэй түлөө хододоо зальбаржа, үдэр бүри тэрэниие үреэн байхань болтогой!

¹⁶ Орон нютагта таряа талхан элбэг-дэлбэг болохо, хада уулануудаар, Ливаандал адли, жэмэсэй ургаса найган, баян байха, хотонуудаар зон үбһэ ногоон мэтэ олон болохол.

¹⁷ Нэрэнь хэтэ мүнхэдөө оршохонь болтогой! Нарата дэлхэй дээрэ уг удамынь бү таһалдаг! Бүхы арадуудта тэрэ үршөөл болохо, жаргалтай гээд тэрэниие нэрлэхэл.

¹⁸ Израилиин Эзэн Бурхан үршөөл магтаалтай. Гансал Тэрэ гайхамшигта хэрэгүүдые хэдэг.

¹⁹ Нэрэнь хэтэ мүнхэдөө үршөөл магтаалтай. Алдар солоорнь бүхы дэлхэй дүүрэг лэ! Амен! Амен!

²⁰ [Ишайн хүбүүн Давидай зальбарал түгэсэбэ.]