Псалманууд 132 - Бурятский Библия. Отдельные книги Ветхого Завета

1 [Үгсэлгын дуун.]

¹ [Үгсэлгын дуун.] Эзэн, Давид тушаа, бүхы зоболонгыень һаныт.

² Танда, Эзэндэ, яажа тангариглаһыень, Танда, Яковой Хүсэтэ Бурханда, иигэжэ амалһыень:

³ «Нээрээ би гэртээ орохогүйб, орон дээрээшье хэбтэхэгүйб,

⁴ унтахаар нюдээшье анихагүйб, зубхяашье буулгахагүйб,

⁵ Эзэндэ гэжэ газар, Яковой Хүсэн Түгэсэй оршохо газар олотороо!».

⁶ Харыт, бидэ энээн тушаа Эпраатада дуулажа, энээниие Иарай таряалан дээрэ олообди.

⁷ Оршодог газартань ошоё, хүлдэнь һүгэдэе!

⁸ Эзэн, Та хүсэ шадалайнгаа ханзатай хамта Өөрын амарха газарта заларыт!

⁹ Тахилшадтнай хубсаһаар мэтээр зүб шударгаар хубсалаг, Танай үнэн сэхэ зон баясаг!

¹⁰ Зараса Давидайнгаа түлөө шэлэн ёһолһон нэгээ бү буруушаагыт!

¹¹ Эзэн Давидта үнэн зүб ба бусаагдахагүй тангаригаар тангариглахадаа «Шинии хүүгэдые, үри һадаһыеш хан шэрээдэш һуулгахаб!

¹² Хэрбээ тэдэ Намтай хэһэн хэлсээндэ үнэн сэхэ, Минии һургаал заабариие сахин байбалнь, тиигэбэл, үхи хүүгэдынь хэтэһээ хэтэдэ хан шэрээдэш заларан байха!» гээ бэлэй.

¹³ Юуб гэбэл, Эзэн Сиониие шэлээ, Өөрын байра болгоо:

¹⁴ «Эндэ Минии амарха газар мүнхэдөө болохо, Би энээниие шэлээб, эндэ байрлахаб!

¹⁵ Тэрэнэй хоол хүнэһые элбэгээр юрөөхэб, ядуу зонииень эдеэ хоолоор садхаан байхаб.

¹⁶ Тахилшадыень абарлаар хубсалуулхаб, Намда үнэн сэхэ зониинь баясан байг.

¹⁷ Тэндэ Давидай хүсэ шадал ургуулхаб, Өөрын тоһолон шэлэгшын дэнгые унтаруулгахагүйб.

¹⁸ Дайсадынь эшхэбтэр муу байдалда оруулхаб. Толгой дээрэнь титим яларха!».