Псалманууд 116 - Бурятский Библия. Отдельные книги Ветхого Завета

¹ Би Эзэндэ дуратайб. Тэрэ минии дуу хоолой, гуйлтыем дуулана.

² Нам руу шэхээ табин соносодог ушарһаань амиды мэндэ сагтаа би Тэрэниие дуудан байхаб!

³ Үхэлэй уяанууд намайе орёогоо, Үхэлэй ороной гай тодхортой намда хүрөө, зоболон ба уйдхар гашуудалтай ушарааб.

⁴ Тиихэдээ би Эзэнэй нэрэ дуудааб: «Эзэн! Ами наһым абарыт!».

⁵ Эзэн нигүүлэсхы ба зүб шударга, Бурхамнай хайрладаг.

⁶ Юрын гэнэн зониие Эзэн хамгаалдаг, минии зобожо байхада Тэрэ намайе абараа.

⁷ Сэдьхэлни, эрьежэ, амгалан тайбан боло даа, Юуб гэхэдэ, Эзэн шамайе үршөөгөө.

⁸ Юуб гэхэдэ, Та намайе үхэлһөө, нюдыем нулимсаһаа, хүлыем бүдэрхэһөө абараат.

⁹ Би Эзэнэй урда амидын газарта ябахаб!

¹⁰ «Ехээр зобожо һалааб» гэжэ хэлээшье һаа, би этигэһэн зандааб.

¹¹ Тэбдэхэдээ «ямаршье хүн худалша» гэжэ хэлэнэб.

¹² Намда үзүүлһэн бүхы аша туһыень Эзэндэ юугээр харюулхабиб?

¹³ Абаралай хундага үргэжэ, Эзэнэй нэрэ дуудахаб.

¹⁴ Бүхы арад түмэнэйнь урда Эзэндэ тангариглаһанаа бэелүүлхэб!

¹⁵ Өөртэнь үнэн сэхэ зоной үхэл Эзэндэ үнэтэй сэнтэй юм.

¹⁶ Оо, Эзэн! Би Танай богоол, Танай богоол, Танай шэбэгшын хүбүүн мүн. Та намайе гэнжэһээ сүлөөлөөт.

¹⁷ Танда би һайе хүргэһэн үргэл тахижа, нэрыетнай дуудахаб.

¹⁸ Бүхы арад түмэнэйнь урда Эзэндэ тангариглаһанаа бэелүүлхэб.

¹⁹ Иерусалим, шинии тэгэн дунда, Эзэнэй нангин үргөөгэй хашаа дотор тангариглаһанаа бэелүүлхэб. Эзэндэ магтаал үргэгты!