Псалманууд 106 - Бурятский Библия. Отдельные книги Ветхого Завета

¹ Эзэниие магтагты! Эзэндэ магтаал үргэгты, юуб гэбэл, Тэрэ һайн, энэрэл хайрань хэтэ мүнхэдөө!

² Эзэнэй баатар хүсые хэн хэлэхэб, магтаалынь дуулгахаб?

³ Шударга ёһые хадагалагшад, ямаршье сагта зүб шударга хэрэг хэгшэд юрөөлтэйл!

⁴ Арад түмэндөө һайе хэхэдээ нам тушаа һаныт, Эзэн! Абаралаа абаад нам руу ерыт!

⁵ Танай шэлэһэн зоной жаргалые харахым тула, Танай арад түмэнтэй хүхилдэхын, Танай уг залгамжатай хамта Таниие магтахын тула!

⁶ Бидэ үбгэ эсэгэнэртээ адли нүгэл үйлэдөөбди, гэм хээбди, хорото муу хэрэг ябуулаабди.

⁷ Үбгэ эсэгэнэрнай Египедтэ Танай гайхамшагта хэрэгүүдые ойлгоогүй, Танай хэгшэ угаа олон сайн юумэ һанаагүй, Улаан далайн хажууда буһалгаалан байгаа.

⁸ Харин Эзэн Өөрын нэрын түлөө, Өөрын хүсэ шадал харуулхын түлөө тэдэниие абараа.

⁹ Иигэжэ Тэрэ Улаан далайда занаба — тэрэ шэргэбэ, хуурай газараар мэтэ тэдэниие гүн далайгаар хүтэлэн гаргаа,

¹⁰ үзэн ядагшадһаа абараа, дайсадһаа зайлуулаа.

¹¹ Дайсадынь уһанда абтаба, нэгэньшье амиды үлөөгүй.

¹² Тиихэдэл тэдэ үгэнүүдтэнь этигэжэ эхилээ, Тэрээндэ магтаал үргэн дуулаа.

¹³ Гэбэшье юу хэһыень удалгүй мартаа, зүбшэлынь хүлеэгээгүй.

¹⁴ Сүл губида угаа шунахайраа, хоосон газарта Бурханиие туршаа.

¹⁵ Тиимэһээ Тэрэ гуйлтынь дүүргээшье хадаа Тэдээн руу үбшэ эльгээгээ.

¹⁶ Хотон хүреэндэ байхадаа тэдэ Моисейдэ болон Эзэнэй гэгээн хүн Аһароондо атаархаа.

¹⁷ Газар хахаржа, Датааные залгяа, Абираамай бүлэгые дараа.

¹⁸ Бүлэгтэнь гал дүрэлзэжэ, гал дүлэн хорото муу зониие шатаагаа.

¹⁹ Тэдэ Хорээбтэ онгон бүтээжэ, шудхаһан хүрэгтэ мүргэжэ эхилээ.

²⁰ Иигэжэ тэдэ алдараа — Бурханаа ногоо зулгаагша үхэрэй дүрсөөр андалдаа болоно.

²¹ Египедтэ агууехэ үйлэ хэрэг хэгшэ Абарагша Бурханаа тэдэ мартаа.

²² Бурхан Хаамай газар нютагта гайхамшагта хэрэгүүдые, Улаан далайн хажууда аймшагуудые харуулаа бэлэй.

²³ Тэрэ «Тэдэниие усадхахам!» гэжэ айладхаа, гэбэшье Өөрынь шэлэгшэ Моисей бодожо, уур хилэнгэйнь адхарха нүхые бүглэн зогсоо.

²⁴ Тэдэ хүсэмөөр һайхан газарые буруушааба, үгэдэнь этигэбэгүй.

²⁵ Тэдэ майхан соогоо дурагүйлхэн гэмэрэлдэбэ, Эзэниие дуулабагүй.

²⁶ Сүл губида хосорхынь тула Тэрэ гараа далайгаа —

²⁷ уг удамынь хариин газарта унажа, арадуудай дунда шэнгэжэ үгы болохын тула.

²⁸ Тэдэ Бааһал-Пэһоортой ниилэжэ, үхэгшэдтэ үргэгшэ тахилнуудые эдеэ.

²⁹ Бурханиие хэрэгүүдээрээ уурлуулба, иигэжэ дундань тахал үбшэн тараба.

³⁰ Тиихэдэ Пинэһаас бодожо, сүүд хэбэ, тахал үбшэн тогтобо.

³¹ Энэ хадаа үеһөө үөдэ тэрэниие магтаха хэтэ мүнхын габяань болоо бэлэй.

³² Тэдэ Мэрибаагай уһанай дэргэдэ Бурханиие уурлуулаа, тэдээнһээ боложо Моисей хохидоо.

³³ Тэдэ тэрэниие угаа зобоогоо, тиимэһээ тэрэ һайса бодонгүй үгэ хэлээ бэлэй.

³⁴ Эзэнэй захирһанай ёһоор тэдэ арадуудые усадхаха байгаа, гэбэшье энээниие дүүргэбэгүй.

³⁵ Бусад үндэһэтэдтэй холилдон гэрлэжэ, тэдэнэй хэрэгүүдые хэжэ һураба.

³⁶ Тэдэнэй онгонуудта мүргэжэ һураба, тэдэ онгонууд урьхань болобо.

³⁷ Тэдэ хүбүүд, басагадаа шүдхэрнүүдтэ үргэл болгон үргэдэг байгаа.

³⁸ Ямаршье гэмгүй зоной шуһа урсахуулжа, хүбүүд, басагадайнгаа шуһа урасхуулжа, Ханаһаанай онгонуудта тахил болгон үргэдэг байгаа. Иигэжэ газарай хүрьһэн тэрэ шуһанһаа боложо бузартаба.

³⁹ Тэдэ хэрэгүүдээрээ өөрыгөө бузарлаба, бүхы хэрэг ябадалынь — зальхай ябадал бэлэй.

⁴⁰ Эзэн арад түмэндөө уурлаба, уг залгамжалан дамжуулха Өөрын юумэнһөө жигшэжэ эхилбэ.

⁴¹ Тэдэниие үндэһэтэдэй гарта дамжуулба, дайсадынь тэдэниие зонхилжо эхилбэ.

⁴² Дайсадынь тэдэниие дарлан-даран байгаа, тэдээндэ тэдэ захирагдадаг һэн.

⁴³ Эзэн оло дахин тэдэниие абараа юумэл! Харин тэдэ урдаһаань һөөргэдэхые шэлээ, гэм зэмынгээ түлөө даромжолуулагдан байгаа.

⁴⁴ Харин Тэрэ гай гасалангынь харахадаа. Хашхарааень дуулахадаа,

⁴⁵ тэдээнтэй хэһэн хэлсээгээ һанажа, энэрэл хайраар баян Тэрэ хайрлажа эхилдэг бэлэй.

⁴⁶ Олзолһон дайсадыеньшье тэдэниие хайрлахыень баадхадаг һэн.

⁴⁷ Эзэн Бурхамнай, маанадые абарыт, хариин арадуудһаа бидэниие суглуулыт, Танай нангин нэрые магтаха боломжо бидэндэ үгыт, Таниие алдаршуулһандаа магтагдахыемнай!

⁴⁸ Израилиин Эзэн Бурхан хэтэһээ хэтэдэ магтагдахань болтогой! Бүхы зон «Этигэнэбди!» гэжэ хэлээ! Эзэниие магтаа!