Захарияа 9 - Библи

Найдуулһан шэнэ орон нютаг

¹ Хадраах нютаг ба Дамааск хото тухай Эзэнэй айладхал бууба. Эзэнэй нюдэн хамаг зондо, илангаяа Израилиин обогуудта ханданхай.

² Тиир, Сидоон шэнги Хадраах оронтой хилэ нэгэтэй Хамаат тээшэ Тэрэнэй нюдэн баһал хандана.

³ Тиир бата бэхи хэрэм бодхоогоод, шорой мэтэ ехэ мүнгэ, гудамжын шабар мэтэ алта элбэгээр суглууланхай.

⁴ Гэбэшье Эзэн эд баялигыень абажа, далай руу хаяжа, хотонь галда шатаагдаха.

⁵ Ашхэлоон энээниие хараад һүрдэхэ, Гааза болон Экрооной зон айн шэшэрэлдэхэ, тэдэнэй найдалынь таһарха. Гаазада хааниинь һүнэхэ, Ашхэлоондо хүнүүд байхаяа болихо.

⁶ Ашдоодто эсэгэеэ мэдэхэгүй эрлиизүүд хариһаа ерэжэ һуурижаха. Пилиштүүдэй бардамые усадхахаб.

⁷ Тэдэ шуһатай мяха болон бузартай бусад хоол эдихэеэ болихо. Амиды үлэһэн пилиштүүд Минии арадай хуби, Иудын нэгэ үе залгалаа болохо. Экрооной зон евүүсүүд шэнги Минии арад түмэнэй хуби болохо.

⁸ Орон соогуур сэрэг зон һүндэлхэеэ болихо, ямаршье дарлагшад дээгүүрнь ябахагүй. Би энээниие алдангүй хаража байхаб, үргөөгөө Өөрөө хамгаалхаб.

⁹ Сионой басаган, баярлыш! Иерусалим үхин, илалтын баяр тэмдэглыш! Харыш, номгон даруу шинии хаан эмэ элжэгэ зайдаланхай, тэрэнэй унага – даагыень зайдаланхай, шамда заларжа ерэнэ.

¹⁰ Энэ хаан тунхаглана: «Эпрааимай дайшалхы тэргэнүүдые бута сохихоб, Иерусалимда моритониие таһа татахаб. Дайнай һурша номо усадхагдаха». Энэ хаан энхэ тайбаниие тунхаглажа, Тэрэнэй эзэрхэл далайһаа далай хүрэтэр, Евфрадай заха хүрэтэр оршохо.

Сүлэлгэһөө мултаралга

¹¹ Би шинии арадые уһагүй нүхэнһөө сүлөөлнэб, юундэб гэхэдэ, манай хэрээ хэлсээн шуһаар баталагдаа.

¹² Шорондо һуугшад, гэртээ ябагты! Найдаха найдабари танда бии, Би таанадта бусанам.

¹³ Иудые Би Өөрын номо болгон татажа, Эпрааимые һурша болгохоб. Сионой хүбүүдые илдэ болгон далайжа, грек угсаатанда эсэргүү бодхооноб.

¹⁴ Эзэн тэдэнэй дээрэ үзэгдэн, Тэрэнэй сахилгаан һомон шэнги харбаха. Эзэн бүреэгээ үлеэжэ, хүсэтэ шуурган шэнги дабшаха.

¹⁵ Түмэн Сэрэгтэ Эзэн тэдэниие хамгаална. Сэрэгшэд шулуу шэдэжэ, дайсанаа унагаана. Тахилай тогооной үзэмэй дараһан архяар дүүрэһэн мэтэ шуһан урдаха.

¹⁶ Тэдэ үдэрнүүдтэ малшанай һүрэгөө аршалһандал Эзэн арад түмэнөө абарха. Титимэй эрдэни шулуун мэтэ тэдэ Эзэнэй нютагта ялалзаха.

¹⁷ Үршөөл хайрань ямар ехэб даа. Үрэжэлтэ таряан долгисохо, шэнэ үзэмэй сэсэрлиг салгидаха, хүбүүд басагад баясан хүгжэхэ!