Захарияа 12 - Библи

Иерусалимай һэргэлгэ

¹ Үзэл: Израиль тухай Эзэнэй үгэ. Тэнгэри дэлгэжэ, дэлхэйн һуури табиһан, хүнэй һүнэһэ һүлдэ доторынь бии болгоһон Эзэн тунхаглажа байна:

² «Үзэгты, Би Иерусалимые тойронхи арад түмэнэйнь хоротой аяга болгохоб. Иерусалимые бүһэлэн дайлаха сагта энэнь Иудада эсэргүү байха болоно.

³ Тэрэ үдэр Би Иерусалимые шулуун шэнги бэхи бүхэ болгохоб. Тэрэниие дайлан абаха гэһэн хүнүүд хуу бэртэхэ. Дэлхэйн бүхы үндэһэтэн Иерусалимда эсэргүүсэн сугларха.

⁴ Тэрэ үдэр Би хүлэг моридыень, морин сэрэгыень галзуу үбшөөр сохихоб. Бүхы арадуудай моридые нюдэ һохор болгохоб, харин Минии нюдэн нээлтэтэй байха. Би Иудын уг удамые харгалзан хаража байхаб», – гэжэ Эзэн айладана.

⁵ Иудын ахамад тэргүүтэн зоной сэдьхэлдэ дали ургуулха. Иерусалимда оршон һуугшад «Эзэн танай хүсэтэ Бурхан, Түмэн Сэрэгтэ Эзэн бидэндэ хүсэтэ туһа болоо» гэлдэхэ.

⁶ Тэрэ үдэр Би Иудын тэргүүтэниие зэргэлһэн модон соохи галта түүдэг мэтэ болгохоб, тэдэ тойроһон арадуудые таряанай хуурай һолоомо галдаһан шэнги шатааха. Тэдэ баруун зүүн талын арадуудые илажа, Иерусалимда оршон һуугшад амгалан амилха.

⁷ Давидай удамай алдар, Иерусалимда һуугшадай суу алдар Иудаһаа үлүү байхагүйн тулада Эзэн түрүүн Иудын майхануудые абарха.

⁸ Тэрэ үдэр Эзэн Иерусалимда оршон һуугшадые хамгаална. Тэдэнэй дорой нэгэниинь Давид мэтэ боложо, Давидай гэр Бурхан мэтэ, тэдэнэй үмэнэ Эзэнэй тэнгэриин Эльгээмэл мэтэ байха болоно.

⁹ Тэрэ үдэр Би Иерусалимда эсэргүү ерэһэн бүхы арад үндэһэтэниие усадхахаб.

¹⁰ Давидай гэр, Иерусалимай зон сэдьхэл даруу номгон болохо, гэмээ наманшалан, нигүүлсэлтэ бодолоор хамаг зондо хандаха гэжэ оролдохо. Өөһэдөө жадаараа сүм хадхаһан хүнөө, Намайе тэдэ хараха, ууган хүбүүнэйнгөө түлөө гашуудажа байһан мэтэ гашуудаха.

¹¹ Тэрэ үдэр Иерусалимда асари ехэ гашуудал Мэгиддооной талада Һадаад-Риммоон тухай арад зоной уйлаһан мэтэ болохо.

¹² Орон нютаг бүхыдөө, уг угаараа шаналан гашуудаха: Давидай ураг садан амяараа, һамгадтаяа хамта; Натаанай ураг садан амяараа, һамгадтаяа хамта;

¹³ Левиин ураг түрэл гэрээрээ, һамгадтаяа хамта; Шимэйн ураг түрэл амяараа, һамгадтаяа хамта;

¹⁴ үлэһэн бүхы угууд амяараа, һамгадтаяа хамта.