Псалманууд 104 - Библи

¹ Эзэниие магтан дуулагты, нэрыень дурдан дуудагты. Арадуудта хэрэгүүд тушаань дуулгагты.

² Эзэн тушаа дуулагты, магтаал үргэгты, гайхамшагта үзэгдэлнүүд тушаань зар тунхаг тараагты.

³ Нангин нэрыень магтан дуулагты. Эзэндэ эрмэлзэгшэ зоной зүрхэ сэдьхэл баясан байг лэ!

⁴ Эзэниие болон хүсыень бэдэрэгты, Тэрээн руу хододоо шармайгты.

⁵ Тэрэнэй хэһэн гайхамшагта хэрэгүүдые, бэлгэ тэмдэгүүдые, айладхаһан шиидхэбэринүүдыень һаныт.

⁶ Абраһаамай үри һадаһад, Тэрэнэй зарасанар, Тэрэнэй шэлэн һунгаһан Яковай үхибүүд таанар!

⁷ Тэрэ бол манай Эзэн Бурхан, бүхы дэлхэйгээр Тэрэнэй зарга шүүлгэн.

⁸ Мянгаад үеын туршада үргэлжэлэгшэ Өөрын хэлсээе Тэрэ һанадаг.

⁹ Энэ хадаа Абраһаамтай баталһан хэлсээниинь, Исаагта үгэһэн тангаригынь юм.

¹⁰ Тэрэниие Яковта хуули болгон, Израильда хэтэ мүнхын хэлсээн гэжэ баталһан юм.

¹¹ «Таанадай уг залгамжалан дамжуулха зүйл болгон Ханаһаанай газар дайда үгэхэб» гэжэ Тэрэ айладхаһан бэлэй.

¹² Тиихэдэ тэдэ тоогоор үсөөн, угаа үсөөн болон хариин газарта ерүүл зон байгаа.

¹³ Тэдэ үндэһэтэнһээ нүгөө үндэһэтэн руу, элдэб хан түрэһөө нүгөөдэ руу тэнэжэ-түншэжэ ябаа.

¹⁴ Тэрэ тэдэниие харшалхые хэндэшье зүбшөөгөөгүй, тэдээн тушаа хаашуулдашье зарлиг үгөө:

¹⁵ «Тоһолон шэлэһэн зондомни гар бү хүрэгты, лүндэншэдтэмни муу юумэ бү хэгты!»

¹⁶ Тэрэ нютаг руу үлэсэхэлэн хооһон байдал дуудаба, эдеэ хоолой бүхы зүйл үгы болобо.

¹⁷ Тэдэнэй урда нэгэ хүниие эльгээбэ, иигэжэ Иосиф богоол боложо худалдагдаа бэлэй.

¹⁸ Хүлыень гэнжээр гэнжэлбэ, хоолойень түмэрөөр бахалуурдаба.

¹⁹ Харин саг ерэжэ, айладхалынь бэелбэ! Иигэжэ Эзэнэй үгэ тэрэниие туршаба.

²⁰ Хаан зониие эльгэжэ, тэрэниие сүлөөлбэ, үндэһэтэдэй захирагша тэрэниие табиба;

²¹ Тэрэ тэрэниие гэрэйнгээ эзэн, бүхы зөөриингөө захирагша болгобо.

²² Энэ хадаа ноёдые зонхилон байхын, аха захатанда сэсэн мэргэн ухаа заахын тула бэлэй.

²³ Израиль Египет руу ерэбэ, Яков Хаамай газар нютагта нүүбэ.

²⁴ Бурхан арад түмэнөө угаа үнэр болгобо, дайсадһаань хүсэтэй болгобо.

²⁵ Тиихэдэнь тэдэ арад түмэнииень үзэн ядадаг болобо, зарасанарайнь урдаһаа муу юумэ түсэблэжэ эхилбэ.

²⁶ Харин Тэрэ Өөрын зараса Моисей гэгшые, шэлэн һунгаһан Аһароониие эльгэбэ.

²⁷ Тэдэ бэлгэ тэмдэгыень харуулба, Хаамай газар нютагта гайхамшагта үйлэнүүдые харуулба.

²⁸ Тэрэ харанхые эльгэбэ, тойроод харанхы болобо, тэдэ үгыень дуулаба.

²⁹ Бүхы орон нютагаар уһые шуһан болгобо, голой загаһа усадхаба.

³⁰ Газарынь бахаар дүүрэшэбэ, хаанай унталгын таһаг руушье тэдэ нэбтэрэн ороол.

³¹ Тэрэ захирба, элдэб аляаһан бии болобо, орон нютагай бүхы булангаар бөөһэн дүүрэшэбэ.

³² Бороогой орондо Тэрэ тэдээн руу мүндэр эльгэбэ, газар уһандань дүлэлзэһэн гал шэглүүлбэ.

³³ Уһан үзэмэйнь модо болон инжирые хуха сохибо, орон нютагтань модо унагааба.

³⁴ Тэрэ айладхаба, таршаа шумуул ерэбэ, тоо томшогүй олон таршаа шумуул бии болобо.

³⁵ Тиигээд тэдэнэй бүхы ногооень, таряалангайнь бүхы ургасые эдин һалгааба.

³⁶ Тэрэ орон нютагта ууган хүбүүдые, эрэ хүсэ шадалай түрүүшын үрэнүүдые сохижо унагааба.

³⁷ Удаань Тэрэ Израилиин арад түмэниие алта, мүнгэтэй тэндэһээ гаргаа, обогуудайнь дунда үбдэһэн хэншье байгаагүй.

³⁸ Тэдэнэй гаража ошоходо Египет баярлаа. Юуб гэбэл, тэдээнһээ ехэ айһан байгаа бшуу.

³⁹ Тэрэ үүлые хүшэгэ болгобо, һүниндөө гэрэлтүүлхын тула гал эльгэбэ.

⁴⁰ Тэдэнэй гуйхада, Тэрэ бүднэ шубуу эльгээгээ, тэдэниие тэнгэриин хилээмээр хангаа.

⁴¹ Хабсагай хахалхадань, уһан гараба, сүл губяар гол мүрэн болон урдаба.

⁴² Юуб гэбэл, Тэрэ Өөрын нангин үгые, Өөрын зараса Абраһаамые һанаа бшуу.

⁴³ Иигэжэ Тэрэ арад түмэнөө баяр баясхалантайгаар, шэлэгшэ зоноо хүхюутэйгөөр гаргаба.

⁴⁴ Тэрэ тэдээндэ бусад арадуудай газар уһа үгэбэ, тэдэ тус арадуудай ажалай үрэ дүн өөрын болгобо.

⁴⁵ Энэ хадаа юундэб гэбэл, хуулинуудаа тэдэнээр сахюулхын, һургаалнуудаа тэдэнээр даган сахюулхын тула бэлэй. Эзэниие магтагты!