Нүүнэй Иисүүс 5 - Библи

Гилгаалда хэгдэһэн отололго

¹ Иорданай энэ тала руу, далай тээшэ һууһан эмооршуудай бүхы хаашуул, далай шадар һууһан ханаһаануудай бүхы хаашуул тэдээнэй гол гаратар Эзэн Израилиин хүбүүдэй урда Иорданай уһа хатаагаа гэжэ дуулахадаа, зүрхэниинь һулараа, Израилиин хүбүүдэй урдаһаа тэдэ һүнэһэгүй болоо.

² Тэрэ үедэ Эзэн Иисүүстэ иигэжэ хэлээ: – Шулуун хутага хээд, Израилиин хүбүүдэй бэлгэ дахяад отолхо болобош.

³ Иисүүс шулуун хутага хээд, «Бэлгэ отололгын добо» гэгдэһэн газарта Израилиин хүбүүдые отолоо.

⁴ Иимэ шалтагаанаар Иисүүс Израилиин хүбүүдэй бэлгэ отолоо: Египедһээ гараһан бүхы эрэ түрэлтэй зон, дайлалдаха шадалтай бүхы зон замдаа элһэн губида хосороо.

⁵ Бүхы гараһан тэдэ зон бэлгэеэ отолуулаа агша һэн. Египедһээ гараһан хойноо элһэн губида түрэһэн зон отолуулаагүй.

⁶ Юуб гэхэдэ, Израилиин хүбүүд дайлалдаха шадалтай бүхы зоной дууһан үхэтэр, дүшэн жэлдэ элһэн губида ябаа. Тэдэ зон Эзэнэй абяа дуулаагүй байгаа. Тиимэһээ эсэгэнэртэнь үгэхэб гэжэ Эзэнэй тангариглаһан һүнэй ба зүгын балай урдажа байдаг газарые тэдэ үзэхэгүй гэжэ Эзэн тангариглаа.

⁷ Тэдээнэй орондо Эзэн хүбүүдынь бодхоо. Иисүүс тэдэнэй бэлгыень отолуулба, юундэб гэхэдэ, замдаа тэдэ отолуулаагүй байгаа.

⁸ Бүхы зон отолуулһан хойноо эдэгэтэрээ хонодог газартаа үлөө.

⁹ «Тиигээд лэ Египедэй эшэгүүритэ ябадал таанарһаа Би арилгааб» гэжэ Эзэн Иисүүстэ хэлээ. Тиимэһээл тэрэ газар мүнөө хүрэтэр Гилгаал гэжэ нэрэтэй.

Түрүүшын Паасха

¹⁰ Израилиин хүбүүд Гилгаалда майхан хүреэгөө түхеэрээд байгаа. Һарын арбан дүрбэнэй үдэр, үдэшэлэн, Ерихооной талада Паасха тэмдэглээ.

¹¹ Найрай үглөөдэрынь энэ газарай эдеэнһээ, тэрэл үдэрөө эһээлтэгүй талха, шараһан орооһо эдибэ.

¹² Тэндэхи газарай гаргаһан эдеэ эдижэ эхилһэнэйнь үглөөдэр жэжэ сагаан будаа унахаа болёо. Израилиин хүбүүд жэжэ сагаан будаагүй болоо, зүгөөр тэдэ тэрэ жэл Ханаһаанай газарай гаргаһан эдеэ эдижэ байгаа.

¹³ Иисүүс Ерихооной хажууда байхадаа, гартаа һэлмэтэй хүнэй урдаа зогсожо байхые хараа. Иисүүс хажуудань ошоод: – Манай гүш, али манай дайсадай гүш? – гэжэ һураа.

¹⁴ – Би Эзэнэй сэрэгшэдэй ударидагшаб, мүнөө эндэ ерээб, – гэжэ тэрэнь хэлээ. Иисүүс урдань һүгэдэн газарта унаад: – Минии эзэн ноён богоолдоо юу хэлэхэб? – гээ.

¹⁵ Эзэнэй сэрэгшэдэй ударидагша Иисүүстэ хэлээ: – Хүлһөө гуталаа тайла, шинии зогсоһон газар нангин. Иисүүс хэлэһэн үгынь дүүргээ.

¹⁶ Ерихоон хотын бартаагаа суургалаа. Израилиин хүбүүдһээ айһандаа суургалагдаа: хэншье гараагүй, хэншье ороогүй.