Нүүнэй Иисүүс 20 - Библи

Зургаан шэбээ хотонууд

¹ Эзэн Иисүүстэ иигэжэ хандаа:

² – Минии Моисейгээр дамжуулжа танда хэлэһэн шэбээ хотонуудые өөһэдтөө баригты гэжэ Израилиин хүбүүдтэ хэлэ.

³ Эндүүржэ, хорото һаналгүйгөөр хүниие алаһан хүн тэндэ хорохо ёһотой. Тэдэ хотонууд шуһанай түлөө үһөө нэхээшэдһээ хоргодохо шэбээ болог.

⁴ Эдэ хотонуудай нэгэн руу зугадаһан хүн хотын ханын үүдэндэ тогтоод, тэрэ хотын ахамадуудай дуулахаар ябадалаа хөөрэг; тэдэ хотодоо оруулаад, дундаа байлгаха.

⁵ Шуһанай түлөө үһөө нэхэгшын мүрдэжэ ерэхэдэ, тэрээнэй гарта тэдэ алагшые үгэхэгүй. Юундэб гэхэдэ, тэрэ мэдэнгүй алаа, алуулагшые үзэн ядажа байгаагүй.

⁶ Олоной урда шүүлгэдэ гаратараа, тэрэ үедэ байһан ахамад санаартын үхэтэр тэрэ хотодо байг. Һүүлдэ алагша өөрынгөө хотодо, гэртээ, зугадан гараһан хотодоо ошуужа.

⁷ Тиигээд Кээдэшые Галилейдэ Напталиигай хада дээрэ, Шэхээмые Эпрааимай хада дээрэ, Кирьяат-Арбаае, ондоогоор Хэброониие, Иудын хада дээрэ илгаа.

⁸ Иорданай саана, Ерихооной эсрэг зүүн тээшэ Бээцэр элһэн губида, тэгшэ талада Рэүбээнэй обогһоо, Галаадта Рамоот Гаадай обогһоо, Башаанда Голаан Мэнашшээгэй обогһоо хотонууд илгагдаа.

⁹ Энэ хотонууд бүхы израильшуудта ба тэдээнэй дунда байһан ерүүл зондо эндүү алдуугаар хүниие алагшын тиишэ зугадахын тула, шуһанай түлөө үһөө нэхэгшын гарһаа олоной шүүлгын урда зогсотороо үхэхэгүйн тула зорюулагдана.