Матвей 27 - Библи

¹ Үүр сайха үеэр хамаг түрүү санаартан, улад зоной ахамадууд сугларжа, Иисүүсые үхэлэй саазада хүртөөхэ гэжэ зүбшэн шиидэбэ.

² Иисүүсые тэдэ гэнжээр хүлеэд, Пиладта абаашажа тушааба.

Иудын хосоролго

³ Иисүүстэ урбаһан Иуда Иисүүсые үхэлэй саазада хүртөөхэнь гэжэ дуулахадаа, буруу хэрэг үйлэдэһэнөө мэдэрэн гэмшэжэ, түрүү санаартанда, улад зоной ахамадуудта гушан сагаан мүнгыень бусаажа асараад:

⁴ – Гэм зэмэгүй хүниие барижа үхэлэй саазада хүртүүлхэдээ би нүгэл үйлэдэбэб, – гэбэ. Нүгөөдүүлынь: – Тэрэшни манда ямар хамаатай юм? Шиниил хэрэг ха юм, – гэжэ харюусаа һэн.

⁵ Иуда асарһан мүнгэеэ Һүмэ соо хаяад, газаашаа гаража, боожо үхэбэ.

⁶ Түрүү санаартан хаяһан мүнгыень суглуулаад: – Энэ мүнгые хүнэй ами хороохо зорилготойгоор түлөө, тиимэһээ энээниие Һүмын һанда табиха хэрэггүй, – гэжэ хэлсэбэ.

⁷ Тиигэжэ зүбшэлдэһэн хойноо тэдэнэр мүнгөөрнь шабар амһарта хэдэг нэгэ хүнһөө газар худалдажа абахаар болобо. Тэрэ газар дээрэнь нүгшэһэн хариин зониие хүдөөлүүлжэ байха гэжэ шиидээ бэлэй.

⁸ Тиимэһээ тэрэ газарые хүнүүд мүнөө хүрэтэр «Шуһан талмай» гэжэ нэрлэдэг.

⁹ Тиигэжэ Ерэмияа лүндэншын иигэжэ хэлэһэниинь бүтөө: «Израилиин зоной Тэрэнэй түлөө түлэһэн гушан хэсэг сагаан мүнгэ абаад,

¹⁰ тэрээгээрнь шабар амһарта хэдэг нэгэ хүнһөө газар худалдажа абаа. Тиигэжэ Эзэн намда захираа».

Пилат Иисүүсые мүшхэнэ

¹¹ Иисүүсые Римэй засаглагша Пиладай урда асаржа байлгаба. Тэрэ захирагша Иисүүсһээ: – Ши еврейнүүдэй хаан гүш? – гэжэ һураба. – Ши тиигэжэ хэлэнэш, – гэжэ Иисүүс харюусаба.

¹² Теэд түрүү санаартанай, ахамадуудай Иисүүсые зэмэлхэдэнь, Тэрэ харюу үгэбэгүй.

¹³ Тиихэдэнь Пилат: – Шамайе иимэ олон хэрэгүүдтэ гэмнэжэ байһые Ши дууланагүй гүш? – гэбэ.

¹⁴ Теэд Иисүүс харюудань юушье хэлэбэгүй, тиихэдэнь Пилат аргагүй ехээр гайхаа һэн.

Иисүүсые үхэлэй саазада хүртөөбэ

¹⁵ Паасхын һайндэрэй болоходо, захирагша улад зоной таби гэһэн хаалтада һуугшадай нэгыень сүлөөдэ табидаг заншалтай байгаа.

¹⁶ Тэрэ сагта улад зондо һайн мэдээжэ Иисүүс Бараббаа гэдэг хүн түрмэдэ һуугаа.

¹⁷ Тиин улад зоной суглархадань, Пилат тэдэнһээ: – Таанар ямар хүниие сүлөөдэ табюулха дуратай байнабта: Иисүүс Бараббаае гү, али Бурханай табисуурта Христоос гэжэ алдаршаһан Иисүүсые гү? – гэжэ һураба.

¹⁸ Иисүүстэ атаархажа байһан дээрэһээ еврейнүүдэй захирагшад Тэрээние барижа асараа гэжэ Пилат һайн мэдэжэ байгаа.

¹⁹ Пиладай зарга шүүбэри хэдэг газарта һуухадань, тэрэнэй һамганиинь: – Тэрэ ямаршье гэм зэмэгүй хүндэ муу юумэ бү хэ! Мүнөө һүни Тэрэниие зүүдэндээ харааб, тиин Тэрэнэй түлөө аргагүй һанаагаа зобооб, – гэһэн мэдээсэлтэйгээр хүниие ябуулба.

²⁰ Гэбэшье түрүү санаартан, ахамадууд Бараббаае сүлөөдэ табихыень, харин Иисүүсые үхэлэй саазада хүртөөхыень гуйгты гэжэ улад зониие идхаба.

²¹ Пилат улад зонһоо: – Эдэ хоёрой хэнииень танда табихабиб? – гэжэ дахин асууба. – Бараббаае, – гэжэ зон харюусаба.

²² Пилат тэдэнһээ: – Бурханай табисуурта Христоос гэжэ алдаршаһан Иисүүсые би яаха болонобиб? – гэжэ һураба. – Тэрээниие хэрээһэндэ хада! – гэжэ улад зон бүгэдэ харюусажа байгаа.

²³ – Ямар гэмтэй юумэ Тэрэ хээб? – гэжэ Пиладай һурахадань, улад зон харюудань: – Тэрээниие хэрээһэндэ хада! – гэжэ бүри шангаар гааралдан хашхарба.

²⁴ Юушье хэхэ аргагүй байһанаа хараад, теэдшье буһалгаан үймөөнэй үүсхэгдэхэ гэжэ байһые ойлгоходоо, Пилат уһа абаад, улад зоной урда гараа угаагаад: – Энэ хүнэй үхэлдэ би ямаршье зэмэгүйб; энэ таанадай үйлэдэһэн хэрэг, – гэжэ хэлэбэ.

²⁵ – Тэрээнэй үхэлдэ бидэ, манай үри хүүгэд зэмэтэй байха, – гэжэ улад зон баран харюусаба.

²⁶ Тиихэдэнь Пилат тэдэндэ Бараббаае табиба, харин Иисүүсые сохёод, хэрээһэндэ хадахыень захирба.

Сэрэгшэд Иисүүсые шоолоно

²⁷ Тиихэдэнь Пиладай сэрэгшэд Иисүүсые ордоной хэрэмэй хорёодо абаашаба. Тэндэнь олон сэрэгшэд суглараад байгаа.

²⁸ Тэдэ Иисүүсэй хубсаһа тайлажа хаяад, Тэрээндэ улаан суба үмдэхүүлбэ,

²⁹ тиигээд үүргэнээр гүрлөө гүрэжэ, толгойдонь үмдэхүүлбэ, баруун гартань модон таяга барюулба. Тиин тэдэнэр Иисүүсэй урда үбдэглэн һуугаад: – Еврейнүүдэй хаан мандаха болтогой! – гэхэ мэтээр Тэрээниие шооложо байгаа.

³⁰ Тиигээд Тэрээниие нёлбобо, таягынь абаад, тархи түрүүень сохибо.

³¹ Тиигэжэ Иисүүсые ханатараа баһаад, удаань үнөөхи улаан субыень тайлажа хаяа. Тиигээд Өөрынь хубсаһа үмдэхүүлээд, хэрээһэндэ хадахаяа абаашаа һэн.

Иисүүсые хэрээһэндэ хадаба

³² Замдаа тэдэ Хэрээн нютагай Симон гэдэг хүнтэй тааралдаад, Иисүүсэй хэрээһэ үргэлөөд ябахыень баалаба.

³³ Тэдэнэр «Хохимой» (еврей хэлээр «Голгофо») гэдэг газарта хүрэжэ ерээ.

³⁴ Тэндэ Иисүүстэ гашуун юумэнтэй холиһон үзэмэй дараһан архи уухыень үгэхэдэнь, Иисүүс тэрээнииень амсаад, уубагүй.

³⁵ Сэрэгшэд Иисүүсые хэрээһэндэ хадаад, жээрэб татажа, хубсаһыень дундаа хубаагаа һэн.

³⁶ Тиигээд тэндээ һуугаад, Иисүүсые харууһалжа байгаа.

³⁷ Иисүүсэй толгойн дээрэхэнэ тэдэ «Энэ еврейнүүдэй хаан Иисүүс» гэжэ хэрээһэндэ хадуулһан шалтагаанииень харуулһан модон хабтагай үлгэбэ.

³⁸ Тиихэдэ Иисүүстэй хамта хоёр дээрмэшэдые: нэгыень баруун таладань, нүгөөдыень зүүн тээнь хэрээһэндэ хадаба.

³⁹ Хажуугаарнь үнгэрһэн зон толгойгоо һэжэржэ, Иисүүсые шоглон:

⁴⁰ – Һүмые һандаргаад, гурбан үдэр соо бодхоохоб гээ бэлэйт! Хэрбээ Та Бурханай Хүбүүн юм һаа, Өөрыгөө абарыт! Хэрээһэнһээ буугыт, – гэжэ байба.

⁴¹ Тон тиигэжэл түрүү санаартан, Хуули заадаг багшанар, ахамадууд, фарисейнүүд Иисүүсые шооложо:

⁴² – Бусадые абардаг аад, харин Өөрыгөө абаржа шаданагүйл! Хэрбээ энэ Израилиин Хаан юм һаа, мүнөө хэрээһэнһээ бууг лэ! Тиигэбэлнь бидэ Тэрээндэ этигэхэбди.

⁴³ Тэрэ Бурханда найдадаг байгаа, Өөрыгөө Бурханай Хүбүүнби гэжэ нэрлээ. Зай, тиигэбэл, Бурханда хэрэгтэй юм һаань, Бурхан Тэрээниие абараг лэ! – гэлдэбэ.

⁴⁴ Мүн Иисүүстэй хамта хэрээһэндэ хадуулһан дээрмэшэдшье Тэрээниие шоглон баһажа байгаа.

Иисүүс амяа табиба

⁴⁵ Хахад үдэрһөө гурбан саг хүрэтэр бүхы газар дэлхэй шэб харанхыда хушагдаба.

⁴⁶ Гурбан сагай багта Иисүүс: – Элии, Элии! Лема сабахтани? (Бурхамни, Бурхамни! Юундэ Намайе орхибот?) – гэжэ шангаар хашхарба.

⁴⁷ Тэндэ зогсожо байһан зарим зон хэлэһыень дуулаад: – Тэрэ Элияае дуудана, – гэлсэбэ.

⁴⁸ Тэдэнэй нэгэниинь дары гүйжэ ошомсоороо, бамбагар юумэ абажа, дээрэнь уксус нэбтэртэрынь адхаад, тэрэнээ тулуурай үзүүртэ табяад, Иисүүстэ уухыень үгэбэ.

⁴⁹ Харин бусад зон: – Байза, Элияа Тэрээниие абархаяа ерэгшэ аа гү, харая, – гэлдэбэ.

⁵⁰ Иисүүс дахин шангаар хашхараад, амяа табиба.

⁵¹ Тиихэдэнь Һүмэдэ Хамагай Нангин газарта ороходо үлгөөтэй байһан хүшэгэ дээрэһээ доошоо шууража, хоёр боложо хахарба, газар хүдэлбэ, шулуунууд хамхарба,

⁵² мүн агы нүхэн хуурсагууд нээгдэжэ, наһа бараһан хутагтанууд олоороо амидырба.

⁵³ Иисүүсэй амидырһан хойно тэдэнэр агы нүхэн хуурсагуудһаа гаража, нангин Иерусалим хото ороо, тэндэ тэдэниие олон хүн хараһан байгаа.

⁵⁴ Тиихэдэ зуунай дарга, мүн тэрээнтэй хамта Иисүүсые һахилсагша сэрэгшэд газарай хүдэлхые, мүн бусадшье болоһон үзэгдэлнүүдые хараад, ехэ айн һүрдэжэ: – Тэрэ үнэхөөрөө Бурханай Хүбүүн байгаа, – гэлсэбэ.

⁵⁵ Галилейһээ Иисүүсые дахажа ерэһэн, Тэрээндэ туһалжа байһан олон эхэнэр баһа тээ холохоно зогсоод хаража байгаа.

⁵⁶ Тэдэнэй дунда Магдалай Мария, мүн Яков Ёшияа хоёрой эхэ Мария, баһа Зэбэдэйн хүбүүдэй эжынь байлсаа.

Иисүүсые хүдөөлүүлгэ

⁵⁷ Үдэшэ болоходо Иисүүсэй шабинь байһан Иосиф гэдэг баян хүн Аримафейһээ хүрэжэ ерээ.

⁵⁸ Тэрэ хүн Пиладта ерээд, Иисүүсэй шарилые үгэхыень гуйба. Тиихэдэнь Пилат Иисүүсэй шарилые Иосифто үгэхыень захираа һэн.

⁵⁹ Иосиф шарилыень абаад, сэбэр бүдөөр орёогоод,

⁶⁰ хабсагайда түнхинэжэ бэлдэһэн шэнэ агы нүхэн соо Тэрээниие хадагалба, агы нүхэнэй амһар томо шулуугаар хаагаад ябаба.

⁶¹ Тэрэ сагта Магдалай Мария нүгөө Мариятай хамта агы нүхэн хуурсагайн тушаа һуугаа бэлэй.

⁶² Хойто үдэрынь, субботодо түрүү санаартан, фарисейнүүд Пиладтай уулзажа:

⁶³ – Ноён аа! Тэрэ мэхэшэнэй үшөө амиды байхадаа: «Гурбан үдэрһөө амидырхаб», – гэжэ хэлэһые һанабабди.

⁶⁴ Тиимэһээ гурбан хоног үнгэртэр агы нүхыень һахиха захиралта үгыт. Тиигээгүй һаатнай, Тэрэнэй шабинар һүниндөө ошожо, бэеынь хулуужа магадгүй, харин улад зондо «Тэрэ амидыраа» гэжэ хэлэхэдээ болохо. Тиигэбэлнь, энэ һүүлшын мэхэ түрүүшынхиһээ аймшагтай байха, – гэбэд.

⁶⁵ – Харуулшадые абагты. Ошожо, өөһэдынгөө мэдэхээр һахижа харуулжа байгты, – гэжэ Пилат тэдэндэ хэлэбэ.

⁶⁶ Тиимэһээ тэдэ агы нүхэ таглаһан шулууе тамгалаад, хажуудань харуул табиба.