Матвей 18 - Библи

¹ Тэрэ үедэ шабинарынь ерээд: – Огторгойн хаан түрэдэ хэниинь агууехэб? – гэжэ Иисүүсһээ һураба.

² Тиихэдэнь Иисүүс нэгэ үхибүүе дуудажа, шабинарайнгаа дунда байлгаад,

³ хэлэбэ: – Хэрбээ таанар хубилжа, үхибүүдтэ адли болоогүй һаа, Огторгойн хаан орондо орохогүйт гэжэ баталан хэлэнэб.

⁴ Энэ үхибүүндэ адли хэн номгон даруу болоноб, тэрэ Огторгойн хаан орондо үлэмжэ ехэнь гээшэ.

⁵ Минии нэрээр иимэ нэгэ үхибүүе тогтоожо абаһан хүн Намайе тогтоожо абаһан болоно.

Нүгэл шэбэлдэ түлхилгэ

⁶ Зүгөөр Намда этигэгшэ эдэ юрын зоной нэгыеньшье нүгэл хилэнсэдэ хэн нэгэн түлхибэл, тэрээн дээрэ аймшагтай хэһээлтэ бууха. Тэрэ хүнэй хүзүүндээ тээрмын шулуу уяад, далайн гүн руу орожо шэнгэбэлнь, тэрээндэ өөртэнь дээрэ байха һэн.

⁷ Хүнүүдые нүгэл хилэнсэдэ түлхидэг юумэнүүдһээ боложо, газар дэлхэйдэ уй гашуудал тулгарна. Зүгөөр хүнүүдые нүгэл хилэнсэдэ түлхидэг юумэнүүд ходо олдоод лэ байха, тиигээд нүгэл хилэнсэдэ түлхигшэ аймшагтай уй гашуудал үзэхэ.

⁸ Хэрбээ гарайшни гү, али хүлэйшни нүгэлдэ шамайе оруулаа һаань, тэдэнээ таһа сабшаад хая, хоёр гартайгаа, хоёр хүлтэйгөө залиршагүй галай тамада хаягданхаар, гаргүйгөөр гү, али хүлгүйгөөр хэтэдээ амиды ябабалшни дээрэ.

⁹ Хэрбээ нюдэнэйшни нүгэлдэ шамайе оруулаа һаа, тэрэнээ һуга татаад хая. Хоёр нюдэтэйгөө галай тама руу хаюуланхаар, үрөөһэн нюдэтэйгөө хэтэдээ амиды ябабалшни дээрэ.

Үгы болоһон хонин тухай һургаалта үгэ

¹⁰ Таанад эдэ багашуулай нэгыеньшье доогуур бү харагты, тэдэнэй тэнгэридэ оршогшо һахюуһан – Эльгээмэлнүүдынь – Минии Эсэгын шарайе хододоо тэнгэридэ хаража байдаг юм гэжэ танда хэлэнэб.

¹² Таанар юун гэжэ һананабта? Зуун хонитой нэгэ хүн ганса хонинойгоо төөреэ һаань, ерэн юһэн хонидоо хада дээрэ орхёод, төөриһэн ганса хониёо бэдэржэ ошохогүй аал?

¹³ Тиигээд тэрээнээ олоходоо, үнөөхи хүн төөреэгүй ерэ юһэн хонидойнгоо тушаа бэшэ, харин олоһон ганса хонинойнгоо тушаа аргагүй ехээр баярлаха гэжэ танда үнэниие хэлэнэб.

¹⁴ Энээндэл тон адляар, тэнгэридэ оршогшо танай Эсэгэ эдэ багашуулай нэгыеньшье алдаха дурагүй байна.

Хэн нэгэнэй нүгэлдэ оролго

¹⁵ Хэрбээ һүзэглэгшэ аха дүүнэрэйшни нэгэн шамда харша нүгэлтэ юумэ хээ һаань, тэрээндээ ошожо, гансаарандань буруу байһыень заажа үгэ. Хэрбээ тэрэ хэлэһыешни дуулабал, ши һүзэглэгшэ аха дүүгээ һөөргэнь бусаабаш.

¹⁶ Хэрбээ шагнахаяа арсабалнь, үшөө нэгэ хоёр хүниие абаад ошо: ямаршье гэмнэлгэ хоёр гурбан хүнэй гэршэлгээр баталагдаха.

¹⁷ Тэдэнииешье дуулахаяа арсабалнь, һүзэглэгшэдэй бүлгэмдэ дуулга. Хэрбээ һүзэглэгшэдэй бүлгэмые дуулахаяа арсабалнь, ши тэрэ хүндэ ондоо яһатанай хүндэ гү, али алба татаашада хандаһандал адляар хандажа бай.

Зүбшөөлгэ ба хорилго

¹⁸ Газар дээрэ хориһон юумэнтнай огторгой дээрэ хоригдохо; газар дээрэ зүбшөөһэн юумэнтнай огторгой дээрэ зүбшөөгдэхэ гэжэ таанарта үнэниие хэлэнэб.

¹⁹ Тэрээнһээ гадна, хэрбээ таанадай хоёртнай газар дэлхэй дээрэ үгэеэ ойлголсоод, ямаршье юумэ эреэ һаатнай, эреэшыетнай Огторгойдо оршодог Минии Эсэгэ танда үгэхэ гэжэ хэлэхэ байнаб.

²⁰ Ушарынь юуб гэхэдэ, хоёр гү, али гурбан хүн Минии нэрээр хаана сугларнаб, тэндэнь Би хоорондонь байхаб.

Хайрагүй зараса тухай һургаалта үгэ

²¹ Тиихэдэнь Пётр Иисүүстэ ойртоод: – Эзэн! Намда харша нүгэл үйлэдэгшэ аха дүүгээ би хэды дахин хүлисэхэ ёһотой болонобиб? Долоо дахин гү? – гэжэ һураба.

²² Иисүүс тэрээндэ иигэжэ харюусаба: – Долоо дахин бэшэ, харин долоон удаа дала дахин гэнэб.

²³ Ушарынь хэлэбэл, Огторгойн хаан түрэ өөрынгөө зарасанартай тоосоо хэхэеэ һанаһан хаанда адлишуу юм.

²⁴ Тоосожо эхилхэдэнь, тэрээндэ арба мянган талаант мүнгэ үритэй хүниие абажа ерэбэ.

²⁵ Үриеэ түлэхэ юумэгүй байхадань, эзэн хаан тэрэниие, тэрэнэй һамгыень, үхибүүдыень, мүн эдлэжэ байһан бүхы зөөрииень худалдаад, үриень түлүүлхые захирба.

²⁶ Тиихэдэнь барлаг хаанай хүлдэнь унажа, «Эзэн хаан! Намайе хүлеэжэ хайрлыт, би үриеэ танда дууһыень түлэхэлби», – гэжэ гуйба.

²⁷ Эзэн хаан барлагые хайрлажа, үриень хүлисөөд, гэртэнь табиба.

²⁸ Тэрэ зараса газаашаа гаража ябатараа, өөртэнь зуун динари үритэй нэгэ нүхэртэйгөө уулзаба. Тиигээд тэрэнээ һабардажа баряад: «Үриеэ намда түлэ» гэжэ байгаад, хоолойень бахалуурдаба.

²⁹ Тиихэдэнь нүхэрынь хүлдэнь унан: «Намайе хүлеэжэ хайрлыт, би танда үриеэ дууһыень түлэхэлби», – гэжэ ехэтэ гуйба.

³⁰ Теэд түрүүшын зараса хүлеэхэеэ арсаба. Тэрээнһээ гадна, үриеэ түлэтэрынь нүхэрөө түрмэдэ һуулгаба.

³¹ Энэниие бусад зарасанарынь хараад, урмаа хухаржа, эзэн хаандаа ерэжэ хөөрэбэ.

³² Тиихэдэнь эзэн хаан түрүүшын зарасаа дуудуулжа асараад: «Хэрэггүй нобшын зараса! Намайе гуйхадашни, би үриешни дууһан хүлисөө бэлэйб.

³³ Шамайе минии хайрлаһандал адляар, шишье нүхэрөө хайрлаха ёһотой байгаа бэшэ гүш?» – гэжэ сухалтайгаар хэлэбэ.

³⁴ Тиигээд уурлаһан эзэн хаан бүхы үриеэ түлэтэрнь тэрэниие түрмын тамалагшадта тушааба.

³⁵ Хэрбээ һүзэглэгшэ аха дүүгээ үнэн зүрхэнһөө хүлисөөгүй һаатнай, Огторгойдо оршогшо Эсэгэмни танда баһал тиигэжэ хандаха, – гэбэ Иисүүс.