Матвей 17 - Библи

¹ Зургаан хоногой үнгэрхэдэ, Иисүүс Пётрые, Яков Иоанн хоёр аха дүүнэрые абажа, хүнүүдэй нюдэнһөө далда байдаг үндэр хада өөдэ гараба.

² Тэндэ Иисүүс шабинарайнгаа урда эрид хубилба: нюурынь наран шэнгеэр ялараа, хубсаһаниинь туяа мэтэ һаргама сагаан болоо.

³ Гэнтэ тэрээнтэй хөөрэлдэжэ байһан Моисей Элияа хоёр бии болооо.

⁴ Пётр Иисүүстэ: – Эзэн! Эндэ байхадамнай манда ямар һайн гээшэб! Хэрбээ хүсэбэлтнай, эндэ гурбан майхан бодхоохобди: нэгыень Танда, нэгыень Моисейдэ, үшөө нэгыень Элияада, – гэбэ.

⁵ Тиигэжэ хэлэжэ байтарнь ялагар үүлэнэй һүүдэр тэдэниие хушаба, үүлэнһээ: – Энэ Минии инаг хайрата Хүбүүмни юм, сэдьхэлэймни урма охин юм; үгыень дуулажа байгты, – гэһэн абяан дуулдаба.

⁶ Энэ абяае дуулахадаа, шабинарынь ехээр айжа, уруугаа хаража газарта унаба.

⁷ Зүгөөр Иисүүс дүтэлжэ, тэдэниие гараараа хүрөөд: – Бодогты, бү айгты, – гээ.

⁸ Тэдэнэй өөдөө харахадань, Иисүүсһээ ондоо хэншье тэдэндэ харагдабагүй.

⁹ Шабинартаяа хадаһаа буужа ябахадаа, Иисүүс: – Хүн түрэлхитэнэй Хүбүүнэй үхөөд амидыртар, энэ үзэһэнөө хэндэшье бү хөөрэгты, – гэжэ тэдээндээ захирба.

¹⁰ – Хуули заадаг багшанар юундэ Бурханай табисуурта Христоосой ерэхын урда тээ Элияа лүндэншэ ерэхэ ёһотой гэдэг бэ? – гэжэ шабинарынь Иисүүсһээ асууба.

¹¹ Тиихэдэнь Иисүүс: – Үнэхөөрөө Элияа түрүүн ерэжэ, бүхы юумые бэлэн болгохо ёһотой.

¹² Гэбэшье Элияа заларжа ерээ, харин хүнүүд тэрээниие таняагүй, дура зоргоороо тэрээнтэй болоо гэжэ танда хэлэхэ байнаб. Эгээл тиигэжэ тэдэ Хүн түрэлхитэнэй Хүбүүниие зобоохо юм, – гэжэ харюусаа.

¹³ Тиихэдэнь Уһаар Арюудхагша Иоанн тухай Тэрэ хэлэнэ гэжэ шабинарынь ойлгобо.

Ада шүдхэртэ барюулһан хүбүүе эдэгээбэ

¹⁴ Иисүүсэй шабинартайгаа улад зондо бусажа ерэхэдэнь, Тэрээндэ нэгэ хүн ойртоод, урдань үбдэг дээрээ һүгэдэн:

¹⁵ – Эзэн! Минии хүбүүе үршөөжэ хайрлыт. Тэрэмни таталзажа унадаг, ада шүдхэрэй хэрзэгыгээр добтолходо, гал, уһа руу ходо һүрэдэг.

¹⁶ Би тэрэнээ Танай шабинарташье асарааб, теэд тэдэ эдэгээжэ шадаагүй, – гэжэ хэлэбэ.

¹⁷ – Этигэл һүзэггүй, забхай ябадалтай зон аа! Үшөө хэды шэнээн таанадтай байхабиб? Үшөө хэды болотор таанадые тэбшэхэбиб? Хүбүүгээ наашань Намда абаад ерэ, – гэжэ Иисүүс хэлэбэ.

¹⁸ Иисүүсэй ада шүдхэртэ захирхадань, тэрэнь хүбүүнэй бэе сооһоо гараба, хүбүүн тэрэ дары эдэгэшэбэ.

¹⁹ Хожомынь шабинарынь Иисүүстэ гансаараа байхадань дүтэлжэ: – Яахадаа бидэ тэрэ ада шүдхэрые даража шадабагүй гээшэбибди? – гэжэ һурабад.

²⁰ Иисүүс тэдэндэ харюусаба: – Таанарай этигэл багадаһанһаа болоно. Хэрбээ таанад горчицын жэжэхэн үрэһэнэйшье шэнээхэн этигэлтэй байжа, энэ хадада хандан: «Эндэһээ хүдэлжэ тиишээ боло» гээ һаатнай, хада тиишэлхэ юм. Таанар юушье хэжэ шадаха һэнта гэжэ танда баталан хэлэнэб.

Иисүүс дахин үхэхэ тухайгаа хэлэнэ

^22-23 Бүхы шабинарайнгаа Галилейдэ суглараад байхада, Иисүүс тэдээндээ Өөр тухайгаа: – Хүн түрэлхитэнэй Хүбүүн хүнүүдэй гарта тушаагдахань, тиигээд Тэрэ алуулаад, гурбадахи үдэртөө амидырха, – гэжэ хэлэбэ. Шабинарынь бултадаа ехээр гашуудаба.

Бурхан Һүмэдэ алба татабари түлэхэ тухай

²⁴ Иисүүсэй шабинартайгаа Капернаумда ерэхэдэнь, Һүмын алба татабари суглуулагшад Пётрто ойртоод: – Багшатнай Һүмэдэ алба татабари түлэхэ гү? – гэжэ һураба.

²⁵ – Түлэнгүй яахаб, – гэжэ Пётр хэлээ. Тиигээд Пётрой гэртэ ороходонь, Иисүүс түрүүлэн: – Симон, ши юун гэжэ һананабши? Энэ дэлхэйн хаашуул хэнһээ түлөөһэ, алба татабари абадаг бэ? Өөһэдынгөө албатанһаа гү, али хариин зонһоо абадаг гү? – гэжэ һураба.

²⁶ Пётр тэрээндэ: – Хариин зонһоо абадаг, – гэжэ харюусаа. Иисүүс тиигэхэдэнь: – Тиимэһээ албатан зондонь түлэхэ хэрэггүй гэһэн удхатай бэшэ аал?

²⁷ Зүгөөр Бидэ эдэ зониие сухалдуулхагүйбди. Тиимэһээ ши далайн эрьедэ ошожо, загаһа хахуулида. Хахуулидашни ороһон түрүүшын загаһа абаад, амандань мүнгэ олохош. Тэрэниие абаад, алба татагшадта Минии түлөө, өөрынгөөшье түлөө үгөөрэй, – гээ һэн.