Матвей 13 - Библи

¹ Иисүүс тэрэ үдэртөө гэрһээ гараад, далайн эрьедэ ошожо һууба.

² Хажуудань хара мянган зоной суглархада, Иисүүс онгосодо һууха болобо, тиихэдэнь улад зон бүгэдөөрөө далайн эрьедэ зогсобо.

³ Тэрэ һургаалта үгэнүүдые хөөрэн, улад зониие олон юумэндэ һургаба: – Нэгэ таряашан таряа тарихаяа гараба.

⁴ Үрэһэеэ сасахадань, зариманиинь харгын хажууда унаба, тэдэнииень шубууд ерэжэ тоншобо.

⁵ Зарим үрэһэниинь хүрьһэ багатай, шулуутай газарта унаба, тиигээд нимгэн хүрьһэтэй газарһаа түргэн бултайба.

⁶ Харин наранай гарахада, гүнзэгы үндэһэлөөгүй зүлгэ ногоон уршыгаад хаташаба.

⁷ Баһа зарим үрэһэнүүд үүргэнэ соо унажа, хөөгтэ даруулагдаба.

⁸ Зарим үрэһэниинь үрэжэлтэй газарта унажа, һайн ургаса үгэбэ: нэгэ зариманиинь тариһанһаа зуу дахин ехэ, нүгөөдүүлынь жара дахин ехэ, бусадынь гуша дахин ехэ үрэ үгэбэ.

⁹ Шэхэтэй юм һаа, анхарагты!

Һургаалта үгэнүүдэй зорилго

¹⁰ Шабинарынь Иисүүстэ дүтэлжэ: – Та юундэ улад зондо таамаг удхатай һургаалта үгэнүүдые хэлэнэбта? – гэжэ һураба.

¹¹ Тиихэдэнь Иисүүс иигэжэ харюусаба: – Огторгойн хаан түрэ тухай гүн нюусанууд таанадтал тайлбарилагдана.

¹² Ушарынь юуб гэбэл, юумэтэй байһан хүндэ нэмэгдэжэ үгтэхэ, тиимэһээ тэрэ хүн улам арьбажаха. Юумэгүй байһан хүнһөө һүүлшын юумэниинь абтаха.

¹³ Юундэ тэдэндэ таамаг удхатай һургаалта үгэнүүдые хэлэнэбиб гэбэл, тэдэнэр хаража байһанаа обёорногүй, шагнажа байһанаа дууланагүй, юумэ ойлгоногүй.

¹⁴ Тиихэдээ Исай лүндэншын тэдэн тухай уридшалан хэлэһэн ёһоор болоно: «Хэдышье шагнаад, ойлгохогүйт; хэдышье шэртэжэ хараад, юумэ обёорхогүйт.

¹⁵ Энэ арадай сэдьхэлынь мохоороо, шэхэнь таглараа, нюдэнь анигдаа. Тиимэһээ тэдэ нюдөөрөө юумэ харанагүй, шэхээрээ дууланагүй, ухаагаараа юумэ ойлгоногүй, тэдэниие аргалжа эдэгээхымни тула Намда ханданагүй».

¹⁶ Харин таанад аза жаргалтайт: нюдэнтнай харана, шэхэтнай дуулана.

¹⁷ Олон лүндэншэд, Бурханай хүнүүд таанадай хаража байһан юумэ харахые ехээр хүсэбэшье, хараагүй, таанадай дуулажа байһан юумэ дуулаха дуратай байгаад, дуулажа шадаагүй гэжэ таанадта баталан хэлэнэб.

Таряашан тухай һургаалта үгын удхые Иисүүс тайлбарилна

¹⁸ Мүнөө таанар таряашан тухай һургаалта үгын удха ушарые шагнагты.

¹⁹ Бурханай хаан түрэ тухай мэдээсэл шагнаад, юумэ ойлгоогүй хүнүүд – харгын хажууда сасагдаһан үрэһэндэ адли юм. Тэдээндэ шолмос ерээд, сэдьхэл зүрхэндэнь таригдаһые абаад арилдаг.

²⁰ Шулуутай газарта унаһан үрэһэн гээшэнь мэдээсэл шагнаад, тэрэниие гансата баяртайгаар хүлеэн абаһан хүнүүд тухай хэлэгдэнэ.

²¹ Зүгөөр тэрэ мэдээсэл сэдьхэлдэнь гүнзэгы үндэһэлөөгүй ушарһаа удаан тогтодоггүй: мэдээсэлэй түлөө зоболонгой тохёолдоо һаань, али мүрдэжэ намнажа эхилээ һаань, тэрэниие удангүй орхижорхидог.

²² Үүргэнэ соо унаһан үрэһэн гээшэнь иимэ удхатай: хэн нэгэн мэдээсэл дуулажа абабашье, энэ ажамидаралайнгаа түлөө оролдолгонь, эд зөөридэ обтолгонь мэдээсэлые даражархидаг, тиин тэрэ мэдээсэл ямаршье үрэ дүнгүй байдаг.

²³ Үрэжэлтэй хүрьһэндэ таригдаашань иимэ удхатай: мэдээсэл шагнаад, тэрэниие ойлгоһон хүнүүд аша үрэ ехэтэй юм – тэдэнэй нэгэ зариманиинь тариһанһаа зуу дахин ехэ, нүгөөдүүлынь жара дахин ехэ, баһа бусадынь гуша дахин ехэ үрэжэлтэй байдаг.

Таряан дундуур ургаһан буртаг үбһэн тухай һургаалта үгэ

²⁴ Иисүүс ондоо һургаалта үгэ тэдэндэ хэлэбэ: – Огторгойн хаан түрэ иимэ нэгэ ушартай адлишаажа болохо: Нэгэ хүн таряаландаа һайн үрэһэ тариба гэхэ.

²⁵ Хүнүүдэй унтахада, дайсаниинь ерээд, шэниисынь хоорондуур буртаг үбһэ таряад ябашоо ха.

²⁶ Таряалангайнь ногоорон, эдеэшэжэ эхилхэдэ, буртаг үбһэншье бултайжа харагдаба.

²⁷ Гэрэй эзэндэ зарасанарынь ерээд: «Эзэн аа! Та таряаландаа һайн үрэһэ таряа бэшэ һэн гүт? Теэд хаанаһаа тэндэтнай буртаг үбһэн ургааб?» – гэбэ.

²⁸ «Дайсан хүн тиимэ юумэ хээ», – гэжэ эзэниинь тэдээндээ хэлэбэ. Тиихэдэнь зарасанарынь: «Хүсэбэлтнай, бидэ ошожо буртаг үбһэ түүхэбди», – гэбэ.

²⁹ Зүгөөр гэрэй эзэн иигэжэ харюусаба: «Үгы, буртаг үбһэ түүхэдээ, тэрээнтэй хамта шэниисын таряа түүлсэжэ болохот.

³⁰ Таряа хуряалгын болотор али алинииньшье ургажа байг. Ургаса хуряаха хаһада таряа хуряагшадта түрүүн буртаг үбһыень суглуулжа боогоод, галдахыень захихаб, тиигэһэн хойнонь шэниисэ суглуулжа, амбаартамни хадагалхые захихаб».

Горчицын үрэһэн тухай һургаалта үгэ

³¹ Иисүүс баһа ондоо һургаалта үгэ дурадхан хэлэбэ: – Огторгойн хаан түрэ иимэ ушартай адлишаажа болохо: Нэгэ хүн таряаландаа горчицын үрэһэ тариба гэхэ.

³² Тэрэ үрэһэн бусад хүрэнгэнүүдэй захада эгээн жэжэхэншье һаа, ургахадаа, ямаршье ургамалһаа ехэ модон боложо ургадаг. Тиихэдэнь тэнгэриин шубууд ниидэжэ ерээд, мүшэр соонь уургайгаа түхеэрдэг.

Эһээбэри тухай һургаалта үгэ

³³ Иисүүс тэдэндэ ондоо һургаалта үгэ хэлэбэ: – Огторгойн хаан түрэ эһээбэритэй сасуулжа болохо: нэгэ эхэнэр багахан эһээбэри абажа, гурбан хэмжүүрэй гурилтай худхажа эһэтэрынь эдьхэбэ.

Иисүүсэй һургаалта үгэ хэрэглэһэнэй ушар

³⁴ Иисүүс эдэ бүгэдые улад зондо һургаалта үгэнүүдээр зураглажа байгаа, һургаалта үгэнүүдые хэрэглэнгүй юумэ хөөрэдэггүй бэлэй.

³⁵ «Амаа нээхэдээ һургаалта үгэнүүдые хэлэхэб, юртэмсын бүтээгдэхэһээ нааша нюуса байһан бүхы юумэнүүдые тайлбарилхаб», – гэжэ лүндэншын хэлэһэниинь бүтэжэ байгаа.

Буртаг үбһэн тухай һургаалта үгын удхые тайлбарилна

³⁶ Иисүүсэй улад зониие табяад, гэртэ ороходонь, тэрээндэ шабинарынь дүтэлжэ: – Таряалан дээрэхи буртаг үбһэн тухай һургаалта үгын удха манда тайлбарилжа үгыт, – гэбэ.

³⁷ Тиихэдэнь Иисүүс харюусаба: – Һайн үрэһэ таригшань Хүн түрэлхитэнэй Хүбүүн гээшэ.

³⁸ Таряалан гээшэнь газар дэлхэй мүн. Һайн үрэһэниинь Бурханай хаан ороной хүнүүд, харин буртаг үбһэниинь шолмосой хүнүүд мүн.

³⁹ Буртаг үбһэ тариһан дайсан гээшэнь альбан шолмос гээшэ. Хадалан – хамаг юумэнэй эсэсынь, тиин таряа хадагшад – Бурханай Эльгээмэлнүүд гээшэ.

⁴⁰ Буртаг үбһэ түүжэ галда шатааһантай тон адли юумэн хамаг юумэнэй эсэстэ болохо:

⁴¹ Хүн түрэлхитэнэй Хүбүүн Эльгээмэлнүүдээ ябуулха, тэдэнь хаан орон соонь бүхы буруу ябадалтаниие болон бусад зониие нүгэлдэ оруулагшадые суглуулха,

⁴² тиигээд тэдэниие гал дүлэ руу хаяха. Тэндэ хүнүүд бархиралдаха, шүдөө хабиралдаха.

⁴³ Харин үнэн сэдьхэлтэн Эсэгынгээ хаан түрэ соо нарандал адляар яларха. Шэхэтэй юм һаа, анхарагты!

Далда хадагалагдаһан баялиг тухай һургаалта үгэ

⁴⁴ Огторгойн хаан түрэ баһа иимэ юумэндэ адли: Нэгэ хүн таряалан соо хадагалагдаһан баялиг эрдэни олоод, тэрэнээ һөөргэнь нюуба. Олзодоо аргагүй ехээр баярлаһан хүн бүхы зөөриеэ наймаалаад, үнөөхи таряалан худалдажа абаба.

Үнэтэй субад эрдэни тухай һургаалта үгэ

⁴⁵ Огторгойн хаан түрэ баһа үнэтэй субад эрдэни бэдэрһэн наймаашанай

⁴⁶ дээдэ зэргын субад эрдэни олоод, бүхы зөөриеэ наймаалан, тэрэниие худалдажа абаһантай адли юм.

Губшуур тухай һургаалта үгэ

⁴⁷ Баһа Огторгойн хаан түрэ иимэ юумэндэ адли: Загаһашад губшуураа далайда хаяжа, элдэб түрэлэй загаһа бариба гэе.

⁴⁸ Тиигээд дүүрэшэһэн губшуураа эрьедэ татажа гаргамсаараа загаһа илгажа оробо: һайн загаһыень үлөөгөөд, муунуудыень хаяба.

⁴⁹ Хамаг юумэнэй эсэстэ эгээл тиимэ юумэн болохо: Бурханай Эльгээмэлнүүд ерэжэ, нүгэл хэгшэдые үнэн сэдьхэлтэнэй дундаһаа илгаха,

⁵⁰ тиигээд тэдэ нүгэл хэгшэдые галтай пеэшэн руу хаяха: тэндэ хүнүүд бархиралдаха, шүдөө хабиралдаха.

Шэнэ болон урданай баялиг тухай

⁵¹ Иисүүс шабинарһаа: – Эдэ бүгэдые таанар ойлгобо гүт? – гэжэ һураба. Тиихэдэнь шабинарынь: – Ойлгообди! – гэжэ харюусаба.

⁵² Иисүүс тэдэндэ иигэжэ хэлэбэ: – Огторгойн хаан түрэ дахаһан алишье Хуули заадаг багша эрдэни баялигайнгаа санһаа шэнэшье, мүн урданайшье баялигуудые абажа хэрэглэдэг эзэндэ адли юм.

Нютагтаа лүндэншэ нэрэ хүндэтэй болодоггүй

⁵³ Эдэ һургаалта үгэнүүдээ түгэсхөөд, Иисүүс тэрэ нютагһаа гаража,

⁵⁴ Өөрынгөө түрэл хото ерэбэ. Тиигээд мүргэлэй гэр соо зониие һургаба. – Иимэ сэсэн ухаан, гайхамшагта хэрэгүүдые бүтээхэ хүсэ Тэрэ хаанаһаа абанаб? – гэжэ Тэрэниие шагнаһан зон гайхалсаба.

⁵⁵ – Үгы, энэмнай дарханай хүбүүн бэшэ һэн гү? Эхэнь Мария бэшэ һэн гү? Яков, Иосиф, Симон, Иуда гэгшэд дүүнэрынь бэшэ һэн гү?

⁵⁶ Дүү басагадынь бултадаа эндэ ажамидардаг бэшэ һэн гү? Яажа Тэрэ эдэ бүгэдые бүтээнэ гээшэб?

⁵⁷ Тиигэжэ зон тэрэнэй талаар һэжэглэбэ. Иисүүс тэдэндэ: – Лүндэншэдые нютагынхидһаань, гэр бүлэһөөнь бусад зон булта хүндэлжэ ябадаг юм, – гэжэ хэлэбэ.

⁵⁸ Улад зоной этигэл һүзэггүй байһан туладань, Иисүүс нютагтаа гайхамшагта хэрэгүүдые ехээр бүтээбэгүй.