Коринфынхидтэ 2-дохи 4 - Библи

Шабар домбо соо байһан баялиг

¹ Бурханай үршөөл хайраар бидэ иимэ ажал хэнэбди, тиихэдээ урмаа хухарнагүйбди.

² Бидэ нюужа байхаар эшхэбтэр хэрэгүүдые хэхэеэ болёобди, хүниие мэхэлхэ хуурахаяа гү, али Бурханай үгэ хазагайруулхаяа оролдоногүйбди. Үнэн зүб тухай айладхажа байһыемнай Бурхан гэршэлхэ. Тиимэһээ маанадта этигэжэ найдажа болохо юм.

³ Хэрбээ манай номножо байһан Һайн Мэдээсэл далда байгаа һаа, тэрэ гансал хосоржо байһан зондо далда байха.

⁴ Һүзэглэдэггүй зоной ухаан бодолыень энэ дэлхэйе захиржа байһан нүгэлтэ бурхан харанхы мунхагаар хушаа, тиимэһээ тэдэ балар һохор зон Бурханай дүрэнь болохо Христоосой алдар тухай һайн мэдээсэлһээ сасарһан гэрэл туяае хараха аргагүй байгаа.

⁵ Бидэ өөһэдыгөө айладханагүйбди, харин Иисүүс Христоосые Эзэн гэжэ, бидэ Иисүүсэй аша туһада танай зарасанарбди гэжэ номнонобди.

⁶ «Гэрэл туяагай харанхыһаа гэрэлтэхэнь болтогой», – гэжэ Бурхан хэлээ. Мүнөө тэрэл Бурхан манай сэдьхэлдэ гэрэлтэжэ, Христоосто оршожо байһан Бурханай алдарай мэдээгээр бидэниие гэгээрүүлээ.

⁷ Бидэ энэ баялиг хадагалһан шабар домбонуудта адли хүмди. Тиимэһээ бодото һүр хүсэн маанадһаа бэшэ, харин Бурханһаа эхи абадаг.

⁸ Бидэ оло дахин хашуулан зобонобди, гэхэтэй сасуу дарагдаагүйбди. Юу хэхэеэ мэдэхэеэшье болёод байхадаа, бидэнэр урмаа хухардаггүйбди.

⁹ Бидэниие мүрдэбэшье, бидэ нүхэдгүй үлэдэггүйбди. Даруулбашье, бидэ үхөөгүйбди.

^10-11 Иисүүсэй амидаралай маанад соо элирхэйлэгдэхын тула бидэ Тэрэнэй түлөө үдэр бүхэн үхэлтэй ушардагбди. Иисүүсэй амидарал манай богони гэнэн амидаралда харагдажа байхын тула бидэ амиды зон Тэрэнэй түлөө үхэлтэй ходо ушардагбди.

¹² Энэнь үхэл маанад соо, харин амидарал таанад соо ажаллана гэһэн удхатай юм.

¹³ «Би хэлээшье һаа, этигэһэн зандааб», – гэжэ Нангин Бэшэг соо бэшээтэй байдаг. Бидэ тэрэл һүзэгэй һүлдэтэй байжа һүзэглэһэндөө хэлэнэбди.

¹⁴ Эзэн Иисүүсые амидыруулһан Бурхан Иисүүстэй хамта бидэниие амидыруулха, тиигээд та бидэниие Өөрынгөө урда байлгаха гэжэ бидэ мэдэнэбди.

¹⁵ Эдэ бүхэн таанадай аша туһада хэгдээ. Тиигэжэл бүри олон зоной Бурханиие магтажа, алдарыень дуудаһан ушарһаань Бурханай үршөөл хайра элбэгжэжэл байха.

Һүзэг этигэлээрээ амидаралга

¹⁶ Иимэһээл бидэ хэзээшье урмаа хухардаггүйбди. Бэемнай хуушаржа байбашье, досоогоо үдэрһөө үдэртэ бидэ шэнэлнэбди.

¹⁷ Тиимэ ойро зуурын бэрхэшээл зоболонгууд маанадта угаа ехэ мүнхын алдар асардаг.

¹⁸ Харагдадаг юумэнүүд саг лэ зуура оршодог, харин харагдадаггүй юумэнүүд хэтын хэтэдэ оршодог. Тиимэһээл бидэ харагдадаг юумэнүүдтэ бэшэ, харин харагдадаггүй юумэнүүдтэ анхаралаа хандуулнабди.