Коринфынхидтэ 2-дохи 1 - Библи

¹ Коринф хотын һүзэглэгшэдэй бүлгэм, Ахайяын нютагта байһан Бурханай бүхы хүнүүд, таанадые Бурханай эрхэ мэдэлээр Христоос Иисүүсэй элшэн болохоор дуудуулагдаһан Павел болон һүзэглэгшэ Тимофей мэндэшэлнэ.

² Манай Эсэгэ Бурхан ба Эзэн Иисүүс Христоос таанадта үршөөл хайра, амгалан тайбаниие хайрлаг лэ!

³ Үршөөл буян хайрладаг Эсэгэ, элдэб янзын ушарта һанаа заһадаг Бурхан, манай Эзэн Иисүүс Христоосой Эсэгэ Бурхан үреэл магтаалда хүртэжэ байг лэ.

⁴ Элдэб янзын бэрхэшээлнүүдэй тудабал, Тэрэ манай һанаа заһадаг, тиимэһээ ондоо зоной элдэб янзын бэрхэшээлнүүдтэ ороходонь, Бурханай маанадай һанаа заһадагтал адляар бидэшье тэдэ зоной һанаа заһаха аргатай байдагбди.

⁵ Христоосой олон зоболонгуудые хубаалсаха тума бидэ Христоосой ашаар Бурханай туһаламжа бүри ехээр абанабди.

⁶ Зоболон эдлэжэ байхадаа, бидэ таанадай аша туһада, таанадыел абархын тула зобонобди, Бурхан маанадай һанаа амаруулһандал адляар таанадай һанаа амаруулна, тиихэдээ маанадай дабажа байһан зоболонгуудые тэсэжэ гарахынтнай тула таанадай һанаа амаруулна.

⁷ Тиимэһээ бидэ таанадта бата найданабди, зоболонгуудыемнай хубаалсахадаа, таанад маанадтал адли һанаагаа амарнат гэжэ мэдэнэбди.

⁸ Аха дүүнэр, Асиин можодо бидэнтэй ушарһан бэрхэшээл зоболонгууд тухай таанадта һануулха һанаатайбди. Тиихэдэ бидэ һанаагаараа аргагүй ехээр унажа, доройтожо, амиды үлэхэбди гэжэ найдахаяашье болёод байгаабди.

⁹ Һалаабди гэжэ һанаабди. Тэрэ ушарһаа бидэ өөһэдтөө найдангүй, харин үхэһэн хүнүүдые амидыруулдаг Бурхандал ганса найдаха хэрэгтэй гэжэ ойлгообди.

¹⁰ Тиимэһээл Тэрэ бидэниие тиимэ аюул үхэлһөө абараа, абаржашье байха. Тэрээндэл ганса найданабди, ерээдүйдэ дахин абархал,

¹¹ бидэнэй түлөө уншажа байһан зальбаралнуудтнай туһалнал. Тиимэһээ маанадта аша туһатай байһанайнь түлөө олон зон Бурханда баяр баясхалан хүргэхэл.

Павелай түсэбүүдынь хубилна

¹² Энэ дэлхэйдэ байхадаа, илангаяа таанадтай харилсахадаа, бидэ Бурханһаа үгтэһэн үнэн сэхэ, арюун сэбэр ажамидаралтай байгаабди, һэшхэл бодолнайшье тэрэниие батална, тиимэһээл бидэ ехэл бахархадагбди. Бидэ хүнэй сэсэн ухаагаар бэшэ, харин Бурханай үршөөлөөр тиигэжэ ажамидараабди.

^13-14 Таанадай уншаха, ойлгохо аргатай юумэнүүдыел бидэ бэшэнэбди. Мүнөө бидэниие бага зэргээр ойлгожо байгаашье һаатнай, хожомынь гүйсэд ойлгодог болохот гэһэн найдалтай байнаб, тиин Эзэн Иисүүсэй ерэхэ Үдэр таанад маанадаар бахархахат, харин бидэ таанадаар бахархахабди.

¹⁵ Эдэ бүхы юумэнүүдтэ хатуу этигэлтэй байһан хадаа хоёрдохиёо буян хэшэгтэ хүртэхынтнай тула би түрүүн таанадта ошохые түсэблэжэ байгааб.

¹⁶ Таанадта дайраад Македони ошохо, тиигээд тэндэһээ бусаха замдаа дахин таанадтай уулзаха һанаатай һэм. Тиигэхэдэмни саашаа Иудей руу ябаха замдамни намайе бэлдэжэ үгэхэт гэжэ найдааб.

¹⁷ Энэ түсэбүүдни һэбхи ябадал болоо гээшэ гү? Нэгэ хэлэхэдээ «тиимэ», нүгөө хэлэхэдээ «үгы» гэжэ хэлэдэг найдабаригүй хүн гээшэ гүб?

¹⁸ Бурханай бата найдабаритай байдагтал адляар минии «тиимэ» гэһэмни «үгы» бэшэ, харин тиимэ байдаг.

¹⁹ Ушарынь юуб гэхэдэ, Силуан, Тимофей бидэ гурбанай таанадта номноһон Бурханай Хүбүүн Иисүүс Христоос «тиимэ» гэхэдээ, «үгы» гэһэн удхатайгаар хэлэдэггүй. Тэрэ Өөрөө Бурханай «тиимэ» мүн.

²⁰ Тэрэ Бурханай бүхы найдуулгануудайнь «тиимэ» гээшэ. Тиимэһээл Христоосоор дамжуулан бидэ «Болтогой» гэжэ Бурханай алдарта айладхаабди.

²¹ Бурхан Өөрөө Христоосые та бидэнэй бата һуури болгожо табяа, бидэниие илган шэлэжэ абаа,

²² бидэн дээрэ тамгаа дараа, бидэндэ үгэхэ бүхы юумэнүүдэйнгээ бэлгэ тэмдэг болгон Арюун Һүлдые хайрлаа.

²³ Би Бурханиие гэршэ болгожо дууданаб, Тэрэ минии һанал бодолые мэдэхэ. Таанадые хайрлаһандаа би таанадта Коринф ошохогүй гэжэ шиидээ һэнби.

²⁴ Юундэ һүзэглэжэ байхыетнай зааха гэжэ оролдоогүйбди, хатуу һүзэгтэй байһыетнай бидэ мэдэнэбди. Жаргалтай байхынтнайл түлөө бидэ таанадаар хамта хүдэлнэбди.