Хуули дабталга 33 - Библи

Моисейн һүүлшын юрөөлнүүд

¹ Бурханай хүн Моисейн нүгшэхынгөө урда тээ Израилиин улад зондо үгэһэн үреэлынь иимэ мүн.

² Тэрэ хэлэбэ: Эзэн Синайһаа ерээ, Сэһиир дээгүүр мандаа, Параан хадаһаа толороо. Мэрибаа-Кадээшһээ, ташаланһаа, урда зүгһөө Тэрэ ерээ.

³ Нээрээшье, Тэрэ Өөрынгөө арадта дуратай! Гэгээн зониинь Тэрэнэй гарта! Тэдэнь һургаал абахаяа хүлдэнь һүгэдэн байна.

⁴ Моисей бидэндэ һургаал заабари дамжуулаа, Яковай арад зондо угай баялиг – хуули захин үгөө.

⁵ Израилиин удамаршадай, обогуудай хамта суглараад байха үедэ Хаан Ешүрүүнэй толгойлогшо болоо.

⁶ Моисей Рэүбээнэй обог тушаа иигэжэ хэлээ: «Үсөөншье һаа, Рэүбээнэй уг удам хододоо ажаһууна».

⁷ Иуда тушаа Моисей иигэжэ хэлэбэ: «Эзэн, Иудые анхарыт, арад түмэн руунь асарыт, өөрын гараар тэрэ бэеэ аршална, дайсадаа дарахадань туһалыт!»

⁸ Левиин обог тушаа тэрэ иигэжэ хэлэбэ: «Эзэн, Өөрынгөө шиидхэбэри урим ба туммим гэгшээр элирхэйлнэт. Үнэн сэхэ левидүүд тэдэнииетнай хадагалдаг. Массаада тэдэниие туршаад үзөө һэнта, Мэрибаагай уһанай дэргэдэ шалгаа һэнта.

⁹ Тэдэнэр эхэ, эсэгэеэ харахаяа болинхой, аха, дүүнэрээ танихаа болёо, үхи хүүгэдээ орхинхой, гэбэшье Танай үгэнүүдые сахин хадагална, Тантай баталһан хэлсээгээ дүмэн дүүргэнэ.

¹⁰ Тэдэнэр Яковые ёһо гуримуудтатнай һургана, Израилиин уладта һургаалыетнай дамжуулна, Танай урда хүжэ санзай ууюулна, үргэлэй шэрээ дээрэтнай түгэс шатаалта үргэл үргэнэ.

¹¹ Эзэн, хүсэ шадалыень юрөөгыт, хэһэн хэрэгынь дэмжыт, тэдээндэ үһэрхэн бодоһон зониие хюдыт, үзэн ядагшадыень үндыхэеэ болиторынь һалгаагыт».

¹² Бэньямиинэй обог тушаа тэрэ иигэжэ хэлэбэ: «Эзэнэй дуратай эдэ зон хажуудань һанаа амар ажаһууна, Бурхан тэдэниие хододоо аршална, Бурханай дэбисхэрэй дунда тэдэ хашалгүй байна».

¹³ Иосифой обог тушаа тэрэ иигэжэ хэлэбэ: «Эзэн тэдэнэй газар дайдые бороо хураар, шүүдэрэй дуһалаар, доро байгаа гүн уһаар үреэнэ,

¹⁴ наранай элшэһээ һайн үрэ жэмэс, һарын туяаһаа эрхим ургаса тэдээндэ үршөөнэ,

¹⁵ эртэ урдын хадануудай оройһоо, хэтэ мүнхэ гүбээнүүдэй үндэрһээ эрхим дээжыень бэлэглэнэ,

¹⁶ хүрьһэтэ газарай хэшэгые, дээрэнь байгааша бүхы юумэ Иосифто Тэрэ үгэхэ, дүрэжэ байһан бургааһан соо харагдагша Эзэнэй үреэл аха дүүнэрэй дунда шалгарагша Иосифой обогто хүртэхэ.

¹⁷ Иосиф – бухын түрүүшын түл! Зэрлиг үхэрэй эбэртэл адли эбэртэй, тэдэ эбэрынь гэбэл, Эпрааимай үри һадаһад, Мэнашшээ гэгшын хэдэн мянгаад уг удам юм. Тэдэ эбэрнүүдээрээ ондоо арадуудые мүргэжэ, газарай заха руу түринэл!»

¹⁸ Зэбүлүүнэй болон Иссахаарай обогууд тушаа тэрэ иигэжэ хэлэбэ: «Аян замдаа Зэбүлүүн амжалтатай ябаха, Иссахаар, майхангуудтаа баяртай ажаһуугаарай!

¹⁹ Зониие тэдэ үндэр өөдэ дуудана, тэндэ хэхэ ёһотой үргэлөө үргэнэ. Далайн баялиг тэдэ олзоборилдог, элһэнһээшье ашаг үрэ абадаг байна».

²⁰ Гаадай обог тушаа тэрэ иигэжэ хэлэбэ: «Гаадай газар үргэдхэгшэ юрөөлтэй! Амаржа байтараа, гэнтэ ямар нэгэн амитанда добтолжо, шүрбэһэ шандааһыень, толгой эхииень хайра гамгүй таһалдаг арсаландал адли юм Гаад.

²¹ Газарай эрхимыень тэдэ өөһэдтөө абанхай, арад зоной удамаршад болон тодороо, Израилиин удамаршадай хамта суглараад байхада, Эзэнэй сүүд тэрэ хээ, Израиль тухай Эзэнэй шиидхэбэринүүдые тэрэ дүүргээ».

²² Даанай обог тухай тэрэ иигэжэ хэлэбэ: «Башаанһаа һүрэн гарадаг залуу арсалан мэтэ Даан».

²³ Напталиигай обог тухай тэрэ иигэжэ хэлэбэ: «Напталиида Эзэн хододоо талархай байдаг, Эзэнэй юрөөхэдэнь, газарынь баруун, урда зүгүүдээр нэмжыхэ».

²⁴ Ашээрэй обог тушаа тэрэ иигэжэ хэлээ: «Бусад обогуудта орходоо Ашээр юрөөлтэй ажаһууна, аха, дүүнэрынь тэрээндэ дуратай, оливын тоһондо хүлнүүдынь умбана.

²⁵ Хотонуудынь бүхэ түмэр, зэд бартаануудтай, тэрэ хододоо хүсэ шадалтай амидарха».

²⁶ Израилиин арад зон, Ешүрүүнэй Бурхандал адли ямаршье бурхан байхагүй! Тэрэ һүр жабхалантайгаар үүлэд дээрэ тэнгэреэр соёрон, танда туһалхаяа ерээ.

²⁷ Эртэ урдын Бурхан – амарха газар, Тэрэнэй хэтэ мүнхэ гарнууд таниие дэмжэдэг, Тэрэ хажууһаатнай дайсадыетнай үлдөө, тэдэниие «хюда!» гээд танда айладаа.

²⁸ Израиль аюулгүй амгалан ажаһууна, Яков орооһо таряагаар, жэмэсэй архяар баян, бороо хурын ородог газар дээрэ гансаараа хашалгүй ажаһууна.

²⁹ Буянтайш, Израиль! Эзэнэй хамгаалдаг шамдал адли арад байхагүй! Эзэн – шамайе аршалдаг бамбай, алдар солыншни һэлмэ. Дайсадшни шинии урда дохин байха, нюргыень ши дэбһэхэш.