Хуули дабталга 28 - Библи

Юрөөл тухай

¹ Эзэн Бурханайнгаа үгэ соонь ябажа, минии мүнөөдэр таанадта хэлэһэн Тэрэнэй захяа заабарииень сахин дүүргэжэ байгаа гээшэ һаатнай, Тэрэ таанадые дэлхэйн арадуудһаа дээгүүр үргэхэ.

² Эзэн Бурханайнгаа үгынь дуулажа байгаа һаатнай, иимэ үреэлнүүд таанадта шэнгэжэ хүсэлдэхэ:

³ хото һууринуудыетнай, хүдөө талыетнайшье Эзэн юрөөхэ;

⁴ таанадые үнэр баян болгон, газарайтнай ургаса, малайтнай түл олон болгон Эзэн юрөөхэ;

⁵ орооһо таряаетнай, эдеэ хоолыетнай Эзэн юрөөхэ;

⁶ гэртээ ороходотнай, гэрһээ гарахадатнайшье Эзэн юрөөхэ.

⁷ Таанадта добтолһон дайсадые Эзэн хараһаар байтартнай үгы хэхэ. Тэдэнэр нэгэ харгыгаар ерэжэ добтолһон аад, долоон аян замаар таанадһаа тэрьедэн ошохо.

⁸ Амбаараар дүүрэн таряа талхатай байхыетнай, хэһэн бүхы хэрэгүүдыетнай Эзэн юрөөхэ. Үгэжэ байһан газар дээрээ Тэрэ таанадые юрөөхэ.

⁹ Эзэн Бурханайнгаа захяа заабаринуудые сахин дүүргэжэ, Тэрэнэй захирһанай ёһоор бүхы юумэ хээ гээшэ һаатнай, та бүгэдэндэ тангариглаһанай ёһоор, Эзэн таанадые Өөрын нангин арад болгохол.

¹⁰ Тиихэдэнь Өөрын арад болгон Эзэнэй таанадые шэлэһые дэлхэйн бүхы арадууд хаража, таанадһаа айдаг болохо.

¹¹ Шамда «үгэхэб» гэжэ найдуулһан, үбгэ эсэгэнэртэтнай тангариглаһан газар дайдада Эзэн үхи хүүгэдые таанадта олоор үршөөхэ, хони малыетнай олоор түлжүүлхэ, һайн ургаса бэлэглэхэ.

¹² Эзэн огторгойн баян һан таанадта нээжэ, хэрэгтэй сагта танай газарта бороо хура эльгээжэ байха, хэһэн хэрэгыетнай бултыень юрөөхэ. Тиихэдэнь олон арад яһатанда урьһаар үгэжэ байхат, харин урьһаар абаха ядуу саг өөһэдтэтнай тохёолдохогүй.

¹³ Сахин дүүргэжэ байхыетнай минии мүнөөдэр дамжуулан хэлэжэ байһан Эзэнэй захяа заабаринуудые дүүргэжэ байгаа һаатнай, Тэрэ таанадые дахагшад бэшэ, удамаршад болгохо, тиихэдэнь доройтонгүй, хододоо амжалтатай ябадаг байхат.

¹⁴ Минии мүнөөдэр таанадта хэлэжэ байгааша һургаалые жэншэдгүй дүүргэгты, ондоо бурхадта һүгэдэн мүргэжэ бү байгты.

Эзэнэй үгэ дуулаагүй һаа, хараал шэнгээхэ

¹⁵ Эзэн Бурханайнгаа үгөөр байгаагүй һаа, минии мүнөөдэр дамжуулан хэлэжэ байгша Тэрэнэй захяа заабаринуудые, хуули ёһонуудые сахин дүүргээгүй һаатнай, хараалай ехэ иимэ хараалнууд бултадаа таанадта хүрэхэ:

¹⁶ хото һууринуудтатнай, хүдөө таладатнайшье Эзэн хараал шэнгээхэ;

¹⁷ орооһо таряандатнай, эдеэ хоолдотнай Эзэн хараал шэнгээхэ;

¹⁸ үри хүүгэдтэтнай, газарай ургасада, хони малдатнай Эзэн хараал шэнгээхэ;

¹⁹ гэртээ ороходоо, мүн гэрһээ гарахадаа хараал шэрээлтэй байхат.

²⁰ Муу муухай хэрэг хэһэнэйтнай – Өөрыень орхиһонойтнай түлөө Тэрэ таанадта удахагүй һалатартнай, үхэтэртнай хараалай муу хараал, үймөөн һандарал, хэһэн хэрэг бүхэндэтнай гай тодхор эльгээхэ.

²¹ Эзэмдэхэеэ ошожо байһан газарайтнай хүрьһэнһөө таанадые үгы болготороо Эзэн таанадта тарбаган тахал үбшэ халдаажал байха.

²² Эзэн таанадые уушханай ханяадан, хумхаа үбшэн, халууралга, хабдараар нэрбүүлэн сохихо, ган гасуур, хуурай һалхи эльгээжэ, ургасыетнай һалгааха. Таанадай хосортор эдэ үбшэнгүүд хойноһоотнай дахан ябаха.

²³ Толгой дээрэхи огторгойтнай бороо хурагүй, зэд мэтэ мэлигэр, хүл дорохи газартнай түмэр мэтэ хатуу, хуурай болохо.

²⁴ Эзэн танай газарта орохо бороо хурые шорой болгон хубилгаха, тиихэдэнь хумхаа тооһон таанадай хосортор огторгойһоо буужал байха.

²⁵ Эзэн дайсадтатнай туһалжа, таанадые диилүүлхэ. Нэгэ харгыгаар тэдэнэй урдаһаа добтолһон аад, долоон аян замаар тэдэнһээ тэрьедэн ошохот. Тиигээд дэлхэйн гүрэн түрэнүүдээр зон таанадай гай тодхор хаража, шэшэрэн һалганан байхал.

²⁶ Таанадай һэенүүд шубуу шонхорой, ан гүрөөлэй хүнэһэн болохо, тэдэниие үргөөхэ хүн байхагүй.

²⁷ Эзэн Египедэй улад зондо эльгээһэн мэтэ эдеэрэнүүдээр, хабдараар, улхангаар, маажуур үбшөөр таанадые дайраха, тэдэниие эмшэлжэ шадахагүйт.

²⁸ Эзэн таанадые уймар, һохор балай болгохо, һолёо үбшэ эльгээхэ.

²⁹ Тиихэдэнь һохор хүнэй тэмтэржэ ябадагтал, гэгээн сагаан үдэр дунда тэмтэрэн ябадаг болохот. Зориһон хэрэгтнай урагшагүй, үдэр бүри зон таанадые хашажа харшалжа, дээрмэшэлжэ байха, таанадые абарха хүн олдохогүй.

³⁰ Басага өөртөө хадамлахаш, теэд ондоо хүн тэрээнтэйш гэрлэхэ. Гэр барихаш, теэд тэрээн соогоо ажаһуухагүйш. Үзэмэй модо тарин һуулгахаш, теэд тэрээнһээ амталхагүйш.

³¹ Хараһаар байтаршни ондоо хүн үхэрыеш үүсэлхэ, харин ши тэрээнһээ эдихэгүйш. Элжэгыешни буляаха, шамда бусаахагүй. Хониншни дайсадта хүртэхэ, теэд шамда туһалха хүн олдохогүй.

³² Хүбүүд, басагадшни богоол болон ондоо арадта үгтэхэ. Үдэр бүри тэдэнэй бусахые хүлеэн хараһандаа нюдэдшни бүрүүлтэхэ, һулархаш.

³³ Хариин улад зон газарайшни хэшэг, ажалайшни бүхы үрэ дүн эдижэ хэрэглэжэ байха. Харин ши наһаараа хашагдажа, үйлөө үзэжэ байхаш.

³⁴ Үзэһэн хараһан юумэнһээ боложо ухааншни балартаха.

³⁵ Эзэн угаа үбшэнтэй яра эдеэрээр шамайе дайран үбдэхөөхэ. Тэрэниие аргалжа шадахагүйш. Үбдэг, шэлбэнүүд дээрэшни, юрэдөө, хүлэйшни улаһаа эхилээд толгойншни зулай хүрэтэр яра гараха юм.

³⁶ Эзэн шамайе, хаантайшни хамта танигдаагүй, үбгэ эсэгэнэрэйтнайшье мэдэхэгүй арад зондо ябуулха. Тэндэ ши модоор болон шулуугаар хэһэн бурхадта һүгэдэн мүргэжэ эхилхэш.

³⁷ Эзэнэй эльгээһэн тэрэ арадуудта ши шоо үзүүлжэ, ябаган зугаадань орожо, наада бариха, баһаха зүйлынь болоод байхаш.

³⁸ Үрэһэ хүрэнгэ ехээр поолидо тарихаш, теэд бага ургаса суглуулхаш, юундэб гэхэдэ, тэдэниие таршаа шумуул эдихэ.

³⁹ Үзэмэй жэмэсэй модонуудые һуулгажа харууһалхаш, теэд үрэ жэмэсынь суглуулжа шадахагүйш, үзэмэй дараһан архи уухагүйш, юундэб гэхэдэ, тэдэниие үтэн хорхой эдихэ.

⁴⁰ Оливын модод бүхы газарааршни ургаха, гэбэшье оливын тоһо бэедээ түрхихэгүйш, юундэб гэхэдэ, оливанууд газарта унажа, үжэн илзарха.

⁴¹ Хүбүүд, басагадые түрэхэш, теэд тэдэнээ гээхэш, юундэб гэхэдэ, дайсад тэдэниие олзолон баряанда абаашаха.

⁴² Бүхы мододыешни, бүхы ургасыешни хорхой шумуул эдижэ һалгааха.

⁴³ Таанадай дунда байдаг ерүүл зон һархайн, таанадые зонхилжо, дээгүүртнай гэшхэжэ гаражал байха, тиин таанад доошоо унажал байхат.

⁴⁴ Тэдэнэр таанадта урьһаар үгэхэ мүнгэтэй, харин таанад урьһалха мүнгэгүй байхат. Тииһээр тэдэ танай толгой, таанад һүүлынь болохот.

⁴⁵ Эзэн Бурханайнгаа үгэ дуулаагүй, Тэрэнэй таанадта захирһан захяа заабаринуудыень, хуули ёһонуудыень сахин дүүргээгүй байһанайтнай түлөө таанадта хараал шэрээл шэнгэжэ, үхэтэртнай хойноһоотнай дахан хүрэхэл.

⁴⁶ Энэ хараал шэрээл хадаа таанадта мүн уг удамдатнай хэтэ мүнхын хэһээлтэ амасуулха гэһэн Бурханай дүлгэ тэмдэг, харуулһан юумэниинь болохо.

⁴⁷ Бүхы юумэнэй танда элбэг дэлбэг байхада Эзэн Бурханаа баяртай хүхюутэйгөөр тахяагүй байһанайтнай түлөө

⁴⁸ Эзэн таанадай урдаһаа дайсадые эльгээхэ. Тэдээндэ алба хэхэт. Үлэн хооһон, ехэ ангаһан, нюсэгэн сурба, бүхы юумээр дуталдажа ажаһуухат. Хүзүүндээ хөөмэгшэ углуулһандал, үхэтэрөө хүшэр хүндэ мүлжэлгэ, дарлалта доро байхат.

⁴⁹ Хэлыеньшье танай мэдэхэгүй арад түмэниие дэлхэйн захаһаа Эзэн таанадта эльгээхэ. Бүргэдтэл адли, тэдэ таанадта добтолон орохо.

⁵⁰ Дошхон хэрзэгы зантай һэн тула тэрэ арад наһажаал зонииешье, үхи хүүгэдыешье хайрлахагүй.

⁵¹ Таанадые хооһоруултараа тэдэнэр хони малыетнай, ургасыетнай буляажа абан эдихэ. Орооһо таряа, үзэмэй дараһан архи, оливын тоһо, тугал, хурьгашье таанадта тэдэнэр үлөөхэгүй. Туража үхэтэртнай бүхы юумыетнай абаха.

⁵² Эзэн Бурханайтнай үгэһэн газарта бүхы хотонуудыетнай тэдэ бүһэлхэ, хотын бүһэлүүр хананууд үндэр, бүхэ гээд найдахадатнай, бүхы газар дайдаартнай эдэ ханануудые эбдэхэ.

⁵³ Дайсадай сэрэгээр бүһэлүүлжэ, хашуулжа харшалуулжа, Эзэн Бурханайнгаа үршөөһэн үхи хүүгэдээ эдижэ эхилхэт.

^54-55 Таанадай дунда эгээл зөөлэн, һайн сэдьхэлтэйшье эрэ хүн бүһэлэгдэһэн хото соо эдихэ юумэгүй болоходоо, үхи хүүгэдээ эдижэ эхилхэ. Аха дүүдээшье, дуратай һамгандаашье, амиды мэндэ байһан үхибүүндээшье тэрэ мяханһаа хубаалдахагүй.

^56-57 Таанадай дунда эгээл зөөлэн, һайн сэдьхэлтэй, урдань юугээршье дуталдаагүй эхэнэр бүһэлэгдэһэн хото соо эдихэ юумэгүй болоходоо, һая түрэһэн үхибүүгээ, мүн набтаһаа эдихэ. Үбгэнтэеэшье, үхи хүүгэдтэеэшье тэрээнһээ хубаалдахагүй.

⁵⁸ Энэ ном соо бэшэгдэһэн һургаалай бүхы үгэнүүдые сахин дүүргэхэеэ оролдоогүй, Эзэн Бурханайнгаа алдар солото, һүрөөтэ нэрые хүндэлөөгүй гээшэ һаатнай,

⁵⁹ Эзэн таанадта, мүн уг удамдатнай аргалагдахагүй үбшэ, хэзээдэшье сарагдахагүй һүжэг үбшэ, гай тодхор эльгээхэл.

⁶⁰ Египедтэ таанадай хаража һүрдэһэн үбшэнгүүдые Эзэн эльгээхэ. Тэдэнь таанадта халдаад, һалахаяа болихо.

⁶¹ Һургаалай ном соо бэшэгдээшьегүй элдэб үбшэ, элдэб гай тодхор Эзэн таанадай хосорон һалатар эльгээжэл байха юм.

⁶² Огторгойн одо мүшэд мэтэ олон бэлэйт. Теэд Эзэн Бурханайнгаа үгэ дуулаагүйт, тиимэһээ таанадай үсөөхэн лэ хүн амиды мэндэ үлэхэ.

⁶³ Таанадта һайн юумэ хэжэ, таанадые олон болгон, үнэржүүлжэ байхадаа Эзэн хэды ехэ баясажа байгааб даа. Тэрээндэл адляар, таанадые үгы хэжэ, һалгаажа байхадаа Тэрэ баярлан бахархан байхал. Эзэлхэеэ зорин ошожо байһан газар дайдаһаа таанад хамагдан гаргуулхат.

⁶⁴ Дэлхэйн нэгэ захаһаа нүгөөдэ заха болотор ажаһуугша бүхы арадуудаар таанадые Эзэн тарааха. Өөрынгөө танихагүй, үбгэ эсэгэнэрэйнгээшье мэдэхэгүй ондоо бурхадта, модоор, мүн шулуугаар хэгдэһэн бурхадта, тэндэ һүгэдэн, мүргэн байхат.

⁶⁵ Теэд тэрэ арадуудай хоорондо һанаантнай тэгшэ байхагүй, «минии» гэхэ, хүлөөшье амаруулха газар олохогүйт. Зүрхэнтнай айн һалаганан байха, нюдэдтнай шэргэхэ, сэдьхэлтнай сүхэрхэ. Эдэ бүгэдые Эзэн эльгээхэ.

⁶⁶ Ами наһантнай хододоо аюулда орожо байха, үдэр, һүнигүй айжа, һалганажа, үглөө мүнөө амиды мэндэ байхаяа мэдэхэгүй ажаһуухат.

⁶⁷ Хараһан юумэнһээ зүрхэ сэдьхэлтнай айн һалганажа, үглөөгүүр «үдэшэ болоһой!» гээд хүсэхэт, харин үдэшэлэн «үглөө мандаһай!» гээд үгүүлхэт.

⁶⁸ «Энэ харгы замые дахин харахагүйт» гэжэ минии дамжуулан хэлэһэншье һаа, Эзэн таанадые далайн онгосонуудаар Египет руу бусааха. Тэндэ дайсадтаа богоол болохоёо бэеэ худалдажа эхилхэт, теэд таанадые худалдан абаха хүн олдохогүй.