Хэрэгүүд 25 - Библи

Павел римэй хаанай зарга шүүбэри шаардана

¹ Албан тушаалда ороһоор гурба хоноод, Фест захирагша Кесариһаа Иерусалим ошобо.

² Түрүү санаартад, хотын нэрэ хүндэтэй зон Павелые Фестын урда гэмнэбэ,

³ тиин тэрэнэй талаһаа һайн хандалга хүлеэжэ, Павелые Иерусалим асарха зүбшөөл гуйба. Юундэ тиигээб гэхэдэ, тэдэнэр Павелые харгыдань алаха гэжэ хэлсэһэн байгаа.

⁴ Гэбэшье Павел Кесарииин түрмэдэ харуул доро үлэхэ, би өөрөөшье мэнэ гэһээр тиишээ ошохо һанаатайб гэжэ Фест харюусаба.

⁵ – Таанадай ахамадууд намтай ябалсаг. Хэрбээ тэрэ хүнэй буруу юумэ хэһэн байбалнь, тэрэниие тэндэ ошоод зэмэлээрэйт, – гэжэ Фест хэлэбэ.

⁶ Иерусалимда арба шахуу үдэр байгаад, Фест Кесари руугаа бусаба. Хойто үдэрынь тэрэ заргашын шэрээдэ һуугаад, Павелые асархыень захирба.

⁷ Павелай ерэхэтэй сасуу Иерусалимһаа ерэһэн еврейнүүд тэрэниие тойрожо, гэршэлэн баталхын аргагүй олон зэмэ тэрээндэ тохобо.

⁸ – Би еврейнүүдэй Хуулиин, Һүмын, римэй хаанайшье урда зэмэгүйб, – гэжэ Павел өөрыгөө үмөөрбэ.

⁹ Фест еврейнүүдэй һайшаалда хүртэхэ һанаатай: – Иерусалим ошожо, тэндэ хэрэгээ намаар шиидхүүлхэеэ хүсэнэ гүш? – гэжэ Павелһаа һураба.

¹⁰ – Би римэй хаанай зарга шүүбэридэ ороод байнаб, тиимэһээ минии хэрэг эндэ шиидхэхэ ёһотой, – гэжэ Павел харюусаба. – Би еврейнүүдтэ ямаршье муу юумэ хээгүйб гэжэ та өөрөө һайн мэдэнэт.

¹¹ Хэрбээ хуули бусын юумэ хэһэн, саазада хүртэмөөр юумэ үйлэдэһэн байбал, би үхэхэдэшье бэлэнби. Хэрбээ эдэнэй намда тохоһон зэмэдэ хабаагүй һаамни, хэншье намайе эдэнэй гарта үгэхэ эрхэгүй. Би римэй хаанай зарга шүүбэри шаарданаб.

¹² Тиихэдэнь Фест зүблэлтэйгөө зүбшөөд: – Ши римэй хаанай зарга шүүбэри шаардаба гүш? Римэй хаанда ошохош, – гэбэ.

Павел Агрииппа хаанай урда

¹³ Хэдэн үдэрэй үнгэрһэн хойно Агрииппа хаан Бэрниикэтэй Фесдтэ айлшаар Кесари ерэбэ.

¹⁴ Тэдэнэй нэгэ хэды хоноһон хойно Фест Агрииппа хаанда Павелай хэрэг тухай хөөрэбэ: – Феликсын хаалтада байлгаһан нэгэ хүн эндэ бии.

¹⁵ Иерусалим ошоходомни түрүү санаартад болон еврейнүүдэй ахамадууд тэрэниие зэмэлжэ, тэрэнэй талаар гэмнэлгын шиидхэбэри гаргахыемни шаардаа.

¹⁶ Тиихэдэ гэмнэгдэһэн хүниие зэмэлһэн хүнүүдтэйнь уулзуулангүй, зэмэлэгдэжэ байһан ушараар өөрыгөө үмэглэхэ арга олгонгүй хэһээхэнь римэй эрхэтэнэй заншал ёһоор бэшэ гэжэ би харюусаа һэм.

¹⁷ Тэдэ зоной намтай иишэ ерэхэдэнь, би хэрэгыень хойшолуулангүй, хойто үдэрынь заргашын шэрээдэ һуугаад, тэрэ зэмэлүүлһэн хүниие асарагты гэжэ захирааб.

¹⁸ Зэмэлэгшэд гэмнэһэн хүнтэйгөө уулзахадаа, тэрээндэ тохохо гэжэ минии һанаһан ямаршье зэмэ тохоогүй.

¹⁹ Харин тэдэ өөһэдынгөө шажанай талаар, Павелай амиды гэжэ баталан хэлэдэг Иисүүс гэдэг үхэһэн хүн тухай асуудалаар арсалдаа.

²⁰ Яажа энэ асуудалаар мүрдэлгэ хэхэб гэжэ гайхан, Иерусалим ошожо, тэндэ намаар хэрэгээ шиидхүүлхэ дуратай гүш гэжэ би Павелһаа һурааб.

²¹ Тиигээд тэрэнэй римэй хаанай зарга шүүбэри шаардахадань, римэй хаанда ябуулха арга олоторни тэрэниие хаалтада байлгагты гэжэ би захирааб.

²² – Би баһа тэрэниие шагнаха һанаатайб, – гэжэ Фестдэ Агрииппа хэлэбэ. – Үглөө та шагнаарайт, – гэжэ нүгөөдынь харюусаба.

²³ Хойто үдэрынь Агрииппа Бэрниикэ хоёр ялалзаһан талалзаһан юумэд суглаанай таһалга руу түмэнэй дарганартай, хотын изагууртантай хамта оробо. Тиигээд Фестын захиралтаар Павелые оруулба.

²⁴ – Агрииппа хаан, эндэ сугларһан бүхы зон! Энэ хүниие амиды ябаха ёһогүй гэжэ Иерусалимайшье, эндэхишье еврейнүүд гэмнэн, олоороо намда хандаа.

²⁵ Өөрынгөө талаһаа энэ хүн саазада хүртэхөөр нэгэшье муу юумэ хээгүй байна гэһэн тобшолол хээб. Тиигээд энэ хүнэй римэй хаанай зарга шүүбэри шаардаһан ушарһаа би тэрэниие римэй хаанда эльгээхэ гэжэ шиидээб.

²⁶ Гэбэшье римэй хаанда юу бэшэхэеэ һайн ойлгожо ядан, мүрдэлгэ хээд, юу бэшэхэеэ ойлгохын тула би энэ хүниие, Агрииппа хаан, урдатнай байлгааб.

²⁷ Юундэ тиигээб гэхэдэ, хаалтада һууһан хүнэй зэмыень заангүйгөөр эльгээхэнь бодолгүй хэрэг гэжэ би һананаб.