Хэрэгүүд 20 - Библи

Павел Македони болон Ахайя руу ошобо

¹ Үймөөнэй үнгэрһэн хойно Павел шабинараа суглуулжа зоригжуулаад, тэдэнтэйгээ хахасажа, Македони ошобо.

² Македониин газараар ябахадаа, Павел һүзэглэгшэ зонтой оло дахин хөөрэлдэжэ, тэдэниие зоригжуулжа байба. Һүүлэй һүүлдэ тэрэ Эллада хүрэжэ ерээд,

³ тэндэ гурбан һара байба. Элладаһаа Сири тамаран ошохо һанаатай байхадань, еврейнүүд эсэргүү нюуса хэлсээ зохёобо гэжэ мэдэхэдээ, Павел дахин Македонёор ябаад, һөөргөө бусаха гэжэ шиидэбэ.

⁴ Тэрэниие харгыдань Бээрэдэ түрэһэн Пиррэй Сопатр хүбүүн, Фессалоникиин Аристарх ба Секунд хоёр, Дээрбэһээ уг гарбалтай Гай, Тимофей болон Асиһаа уг гарбалтай Тихик, Трофим гэгшэд дахажа ябаа.

⁵ Тэдэнэр урдамнай орожо, бидэниие Троадада хүлеэжэ байгаа.

⁶ Харин бидэ Эһээбэригүй Хилээмэн гэдэг һайндэрэй үнгэрһэн хойно Филиппһээ тамаран гаража, табан үдэрэй удаа Троада хүрөөд, тэндэ долоон хоног байгаабди.

Павел һүүлшынхиеэ Троадада байна

⁷ Субботын хойто үдэр бидэ бултадаа үдэшын хоол барихаяа суглараабди. Хойто үдэрынь ябахаяа түхеэржэ байһан дээрэһээ Павел шабинартайгаа удаан саг соо, һүниин тэн болотор хөөрэлдөө.

⁸ Бидэнэй сугларһан дээдэ дабхарай таһалга соо олон дэн аһаалгаатай байгаа.

⁹ Ээвтих гэжэ залуу хүбүүн сонхын табсан дээрэ һууба. Павелай ехэ удаан номножо байхада тэрэ хүбүүн нойртоо диилдэжэ, гурбадахи дабхарай сонхоһоо унашаба. Шабинарайнь гүйжэ ошоходо, тэрэ үхэшэһэн байгаа.

¹⁰ Гэбэшье Павел доошоо буугаад, дээрэнь тонгойжо, хүбүүе шангаар тэбэрибэ. «Һанаагаа бү зобогты, тэрэ амиды», – гэжэ Павел хэлэбэ.

¹¹ Бусажа дээшээ гараад, хилээмэ хухалжа эдеэд, Павел үүр сайтар номнобо. Тиигээд гаража ябаа һэн.

¹² Харин үнөөхи хүбүүнэй амидырхадань, бултадаа ехэ баяртайнууд гэртэнь абаашаа һэн.

Павел Троадаһаа Милет руу аяншалба

¹³ Бидэ Павелые хүлеэнгүй, корабльда һуужа, Асс тамарбабди. Тэндэ Павелые корабльдаа тодожо абаха ёһотой байгаабди. Павел Асс хүрэтэр ябагаар ошохо гэжэ шиидэһэн байгаа.

¹⁴ Тэрэниие Асста тодожо, корабльдаа һуулгаад, бидэ Мителен тамарбабди.

¹⁵ Мителенһээ гараад, хойто үдэрынь бидэ Хиос тамаржа ерээбди. Тэндэһээ гаража нэгэ хоноод, Самос руу хүрөөбди. Тиигээд Самосһоо гаража нэгэ хоноод, Милет хүрэжэ ерээбди.

¹⁶ Павел Асида удаан болохогүйн тула, Эфес руу зогсонгүй тамарха гэжэ шиидэбэ. Арга байбал, Табидахи үдэрэй һайндэрые Иерусалимда угтаха һанаатай тэрэ ехэл яаралтай ябаба.

Павел Эфесэй бүлгэмэй хүтэлэгшэдтэй хөөрэлдэнэ

¹⁷ Милет хотодо байхадаа, Павел Эфесэй бүлгэмэй хүтэлэгшэдэй хойноһоо хүнүүдые Эфес руу эльгээбэ ха.

¹⁸ Тэдэнэй хүрэжэ ерэхэдэ Павел иигэжэ хэлэбэ: – Асиин газарта ерэһэн түрүүшынгээ үдэрһөө хойшо таанадтай үргэлжэ байһыемни өөһэдөө мэдэнэт.

¹⁹ Даруу зантайгаар, нулимсаа гоожуулан, еврейнүүдһээ, тэдэнэй зохёоһон нюуса хэлсээнүүдһээ боложо, хүндэ хүшэр бэрхэшээлнүүдтэ орожо байгаад, Эзэндэ яажа алба хэжэ байһыемни таанад баһа мэдэнэт.

²⁰ Зонойшье дунда, гэрээршье ябаад һургахадаа, таанадта туһатай юумэ огто нюудаггүй бэлэйб.

²¹ Би еврейнүүдыешье, ондоо яһатанииешье нүгэл хэхэеэ болижо, Бурханда хандахыень, манай Эзэн Иисүүстэ этигэхыень гуйдаг бэлэйб.

²² Харин мүнөө би Арюун Һүлдын захиралта дүүргэн, Иерусалим ошоноб, юун намайе тэндэ хүлеэжэ байһые би мэдэнэгүйб.

²³ Гэбэшье ямаршье хотодо хүрэжэ ерэхэдэмни, хаанашье байхадамни, намайе түрмэ зоболон хоёр хүлеэнэ гэжэ Арюун Һүлдэ хэлэдэг.

²⁴ Харин би ами наһаяа оройдоошье хайрланагүйб. Бурханай үршөөл хайра тухай Һайн Мэдээсэл айладхажа бай гэжэ Эзэнэй намда даалгаһан үүргэ гүйсэдхэн, ябаха ёһотой замаараа ябажа түгэсхэбэлни һайн гээшэ.

²⁵ Бурханай хаан орон тухай номножо байһан намайе таанад дахин харахагүйт гэжэ би мүнөө мэдэнэб.

²⁶ Тиимэһээ хэн нэгэнэйтнай абарагдаагүй һаа, би огто зэмэгүйб гэжэ хэлэнэб.

²⁷ Юундэб гэхэдэ, Бурханай эрхэ хүсэлые таанадта мэдүүлхэдээ, би юушье нюугаагүйб.

²⁸ Арюун Һүлдын харууһалжа байхаар таанадта даалгаһан һүрэгөө, өөһэдыгөө анхаржа байгты. Һүзэглэгшэ хүнүүдһээ бүридэһэн һүрэгөө харууһалжа байгты, юуб гэхэдэ, Бурхан энэ һүрэг хүбүүнэйнгээ шуһанай сэнгээр олоо юм.

²⁹ Минии ябаһан хойно таанадта хэрзэгы шононууд ерэжэ, һүрэгыетнай хайрлахагүй гэжэ би мэдэнэб.

³⁰ Өөһэдынтнайшье дундаһаа буруу номногшод гаража, шабинарыемни дахуулха.

³¹ Тиимэһээ гурбан жэл соо үдэр һүнигүй нулимсаа дуһаан, таанадай хүн бүхэнииетнай һургажа байһыемни һанан, һэргэг байгты.

³² Би таанадые Бурханда, Бурханай үршөөл хайра тухай һургаалда даалганаб. Бурханай үршөөл хайра тухай һургаал таанадые үлүү һайн һургажа магадгүй. Һүзэглэгшэ зондо бэлдээтэй зөөри зөөшэһөө тэрэ һургаал таанадта баһа үгэхэ.

³³ Би алта мүнгэ, хубсаһа хунар өөртөө олзолхоёо огто һанаагүйб.

³⁴ Хара хүлһөөрөө өөрыгөө, замынгаа нүхэдые тэжээдэг байһыемни мэдэнэт.

³⁵ Тиигэжэ би таанадта яажа хүдэлхэб, ядуу һула зондо туһалхаб гэһэн жэшээ харуулааб. «Үгэхэнь абахаһаа бүри жаргалтай», – гэжэ Иисүүсэй хэлэһые һанажа ябагты.

³⁶ Иигэжэ хэлээд, Павел үбдэглэн һуугаад, бусад зоноор хамта зальбарба.

³⁷ Булта айхабтар ехээр уйлалдан, Павелые тэбэрижэ таалабад.

³⁸ Намайе дахин харахагүйт гэжэ хэлэһэн туладань тэдэ ехээр гуниглажа байгаа. Удаань тэдэнэр булта Павелые корабль хүрэтэр үдэшэбэ.