Исай 64 - Библи

Маанадые зоболондо нэрбүүлхэтнай гү, Эзэн?

¹ Оо, огторгойе хаха татан буугаа гээшэ һаатнай! Хада ууланууд урдатнай доһолхо байгаал!

² Бургааһанай гал дүлэндэ абтадагтал, уһанай гүсэ соо бусалдагтал, үндэһэ яһатад Танай ерэхэдэ доһолхо, шэшэрхэл! Өөрынгөө хүсэ шадал дайсадтаа харуулыт! Үндэһэ яһатадые шэшэрүүлыт!

³ Манай хүлеэгөөгүй үйлэ хэрэгүүдые Та хэзээ нэгэтэ хээ бэлэйт. Уруудан буухадатнай, хада ууланууд энээниие хаража, айн шэшэрээ һэн.

⁴ Этигэн найдаһан зоной аша туһа харан, иимэ үйлэ хэрэгүүдые хэдэг Тандал адли Бурхан тушаа бидэ хэззээшье дуулаагүй бэлэйбди.

⁵ Үнэн зүб хэрэг баяртайгаар үйлэдэгшэ, Танай һургаалаар ажаһуухые оролдогшо зониие Та энхэрэн угтанат. Бидэнэй нүгэл хэжэл байхада, Та уурлабат. Бидэ яажа абарагдахабибди?

⁶ Бидэ бултадаа бузартай зүйлнүүдтэ адли болообди, бидэнэй һайн хэрэгүүд муухай болоһон хубсаһандал адли. Набша мэтэ хатажа байнабди, гэмтэ хэрэгүүднай һалхин мэтэ маанадые тууна.

⁷ Хэншье Танһаа юумэ гуйнагүй, хэншье туһа эринэгүй. Та манай нүгэлнүүдһээ боложо, маанадһаа Өөрыгөө нюужа арсабат.

⁸ Гэбэшье, Эзэн, Та манай Эсэгэт. Бидэ шабар мэтэ, харин Та шабараар амһарта бүтээдэг хүн мэтэт. Бидэ бултадаа – Танай бүтээлнүүд мүн!

⁹ Эзэмнай, дан ехээр бидэндэ бү уурлыт даа, нүгэлыемнай ходо бү дурсыт. Бидэ бүгэдэ Танай арад түмэн гээшэлди.

¹⁰ Танай нангин хотонууд хооһон сүл губи болоо. Сион сүл губи болоо. Иерусалим эзэгүйрөө.

¹¹ Үбгэ эсэгэнэрэймнай Танда магтаал үргэдэг газар – манай нангин үзэсхэлэнтэ үргөө гал дүлэндэ шатаа. Манай дуратай газарнууд һандаргагдаа.

¹² Эзэмнай, энээниие хараад, сэдьхэлтнай үбдэнэгүй гү? Та саашадаашье абяа дуугүй зандаа, тэрэл зангаараа маанадые хэһээһээр лэ байха гүт?!