Исай 62 - Библи

Сионой шэнэ нэрэ

¹ Иерусалимай абарагдатар, харанхыда носожо байгша зула мэтэ илалтынь мандатар би дуугаржал, хашхаржал байхаб.

² Иерусалим, үндэһэ яһатад шинии илалта хараха. Тэдэнэй хаашуул алдар солыншни мандахые обёорхо. Тиигээд Эзэнэй үгэһэн нэрээр шамайе нэрлэхэ.

³ Эзэнэй гарта алдар солын титим, Бурханайнгаа гарта хаанай титим болохош.

⁴ Энээнһээ хойшо шамайе «орхигдоһон», газарыешни «Хооһон, һубай» гэжэ нэрлэхэгүй. Харин шамайе «Бурханай баяр» гэжэ, газарыешни «гэрлэһэн» гэжэ нэрлэхэ. Юуб гэхэдэ, Эзэн шамда баясана, газарыешни һамга абаһан хүндэл адли болохо.

⁵ Залуу хүнэй эдир басагантай гэрлэдэг шэнги, шамайе Бүтээгшэ шамтай гэрлэнэ. Һамга абажа байгша хүбүүнэй хадамлажа байгша басагандаа баясадаг мэтэ Бурханшни шамдаа баясана.

⁶ Иерусалим, шинии хананууд дээрэ Би харуулшадые табибаб. Тэдэ үдэр, һүнигүй зальбарал уншажа, дуугаа хуряахагүй. Тэдэ Эзэндэ найдуулганууд тушаань һануулдаг байха, хэзээдэшье дуугаа таһалдуулхагүй.

⁷ Иерусалимые һэргээн бодхооторынь, бүхы дэлхэйн магтаал болготорынь тэдэ Эзэндэ амар заяа үгэхэгүйл.

⁸ Эзэн иимэ шанга шахаа тангариг үргөө бэлэй: «Шинии таряа талхан бэшэ хэзээдэшье дайсадайш хоол хүнэһэн болохогүй, хариин зон шинии үзэмэй дараһан архи уухагүй.

⁹ Харин таанад, орооһо таряа тарин хуряагшад, өөһэдөө хилээмэеэ эдижэ, Намайе, Эзэниие, магтан байхат. Үзэмэй жэмэс суглуулагшад, таанад Минии нангин үргөөгэй хашаа дотор өөһэдөө үзэмэй дараһан архи уухат».

¹⁰ Иерусалимай улад зон, хотоһоо гаража, баряанһаа бусажа байһан арад зондоо харгы зам баригты! Зам жэгдэлэгты, шулуунуудһаа сэбэрлэгты! Арадуудай ойлгохын тула дээшэнь туг үргэгты!

¹¹ Эзэн бүхы дэлхэйдэ иигэжэ соносхоно: «Сионой хотодо Минии тэдэниие абархаяа ерэжэ байһан тушаа дуулгаарайгты. Тэдээндэ шагнал хүртөөхэ тухайм хэлээрэйгты».

¹² Таанад «Эзэнэй абарһан нангин арад түмэн» гэжэ нэрлэгдэхэт. Иерусалим хадаа «Эзэнэй орхёогүй хото, Бурханай дуратай хото» гэжэ нэрлэгдэхэ.