Исай 38 - Библи

Хэзэкияа хаанай үбдэхэ ба эдэгэхэ ушар

¹ Энэ үедэ Хэзэкияа хаан ехээр үбдэжэ, наһа бараха туйлдаа хүрөөд байба. Амооцой хүбүүн, лүндэншэ Исай тэрээниие эрьежэ ошоходоо, иигэжэ хэлэбэ: – Үхэжэ байна, һайн болохогүй гээд шам тушаа Эзэн айладхана, тиимэһээ гэрээд үгэнүүдээ хэлэг лэ гэжэ Тэрэ захирна.

² Тиихэдэнь Хэзэкияа хана руу хараад, Эзэндэ зальбарба:

³ – Эзэмни! Танай урда үнэн сэхээр, ямаршье гэм зэмэ хэнгүй ажаһууһыемни, Танда таарамжатай үйлэ хэрэгүүдые бүтээдэг байһыемни һаныт даа, – гээд, һугшаран уйлашаба.

⁴ Эзэн Исайда захиржа,

⁵ Хэзэкияада бусаад, иигэжэ хэлэ: – Би, Эзэн, шинии үбгэ эсэгэ Давидай Бурхан, гуйлтыешни соносооб, нулимсыеш харааб. Тиигээд шинии наһые Би арбан табан жэлээр утадханаб.

⁶ Шамайе болон энэ Иерусалим хото Ассириин хаанһаа абархаб, энэ хотые Би хамгаалхаб!

⁷ Исай үшөө иигэжэ хэлэбэ: – Эзэн үгэеэ заабол бэелүүлхэ гэһэнэй дүлгэ тэмдэг хадаа иимэ байха:

⁸ Ахааз хаанай үедэ баригдаһан гэшхүүр дээрэ Эзэн һүүдэрые арбан алхамаар һөөргөө бусахыень баадхаха. Наран һөөргөө сухариба, гэшхүүр дээгүүр үнгэрһэн һүүдэр арбан алхамаар һөөргөө бусаба.

⁹ Иудын хаан Хэзэкияагай элүүр энхэ болоходоо бэшэһэн магтаал дуун гэбэл, иимэ:

¹⁰ Ажабайдалайнгаа түлэг дунда үхэлэй орон руу ошохо заяатай байгааб, наһаяа дүүрэн эдлэхэгүйб гэжэ һанажа байгааша хүн гэбэл, би гээшэб!

¹¹ Энэ дэлхэй дээрэ Эзэниие, амиды мэндэ хүниие бэшэ харахагүйб гэжэ һанажа байгааб.

¹² Байраһаа задалан хуряагдажа байһан нүүдэлшэнэй майхандал адли, бүд нэхэгшын түхеэрэлгэһээ таһалагдаһан утаһандал адли минии ами наһан дүүрэжэ байгаа. Бурхан намайе мэнэ-мэнэ Өөртөө дуудахань гэжэ хүлеэгөөб.

¹³ Бүхэли һүниндөө арсаланай минии бүхы яһые химэлһэндэл, ехэ үбдэжэ, үглөө болотор тэсэжэ байгааб. Наһамни одоол мүнөө дүүрэхэнь гэжэ хүлеэгөөб.

¹⁴ Хоолоймни арай-шамай гаража, гулабхаадал адли абяа гарган ёолооб. Эзэмни, энэ гайһаа намайе абарыт гэжэ огторгой шэртэһээр нюдэдни эсээ.

¹⁵ Юун гэжэ хэлэхэбиб? Эзэн айладхалаа бэелүүлээ. Сэдьхэлэйнгээ гашуудалда дарагдаад, аалин даруу наһаа эдлэхэб.

¹⁶ Эзэмни, гансал Тандаа шүтэн ажаһуухалби, намайе эдэгээгыт, ами наһа үршөөгыт!

¹⁷ Би өөрын жаргалай түлөө ехэ зоболон амасааб. Та намайе бүхы аюулһаа абарнат, нүгэлыем хүлисэнэт.

¹⁸ Үхэлэй орон дотор хэншье Таниие магтахагүй, үхэһэн зон Танда найдан-этигэн байха бэшэ.

¹⁹ Намдал адли амиды зон Таниие магтан байха, эсэгэнэр хүүгэдтээ Танай найдамтай үнэн зүбые тунхаглахал.

²⁰ Эзэмни, иигэжэ одоо намайгаа абарбат, эдэгээбэт! Ятага дээрэ хүгжэмлэн, Танда магтаал дуу үргэн байхабди, амиды мэндэ байгаа сагтаа Танай нангин үргөө соо магтаал дуунуудые дуулахабди!

Хэзэкияа хаанда Исайн үгэһэн зүбшэл

²¹ Исай иигэжэ захирба: – Инжир модоной хатаһан үрэ жэмэс асарагты! Тэрэниие хабдажа эдеэрдэһэн газартань табигты, тиигэбэл Хэзэкияа хаан эдэгэхэ.

²² Эдэгэжэ, Эзэнэй Һүмэдэ ошохымни дүлгэ тэмдэг ямар байхаб гэжэ Хэзэкияа асууба.