Исай 21 - Библи

Далайн эрьедэхи элһэн сүл губи тухай зүн

¹ Далайн эрьедэхи элһэн сүл губи тухай зүн. Урда зүгэй газараар бурьялагша хуй һалхин мэтэ дайсан элһэн сүл губиһаа, аймшагтай газарһаа ерэжэ байна.

² Аймшагтай үзэгдэл намда харагдаа: урбагша урбана, дээрмэшэн дээрмэдэнэ! «Элаам, добтоло! Миди, бүһэлэ! Бүхы ёолохо ушарнуудые Би болюулхаб».

³ Хэбэл руум хадхаба. Түрэжэ байгша эхэнэртэл, зобожо, үбдэжэ байнаб. Гай зоболонһоо боложо юушье дууланагүйб, айһандаа юушье харанагүйб!

⁴ Һүр һүлдэмни доройтоо, айһандаа шэшэржэ байнаб. Урдандаа дуратай боро хараамни намайе айлгадаг, һүрдүүлдэг болоол.

⁵ Шэрээ бэлдэжэ, хибэсүүдые дэбдин, эдижэ, уужа байна… Ударидагшад, бодогты! Бамбайнуудаа бэлдэн тоһоор түрхигты!

⁶ Эзэн намда иигэжэ айладхаба: «Яба, харуул таби, хараһанаа мэдээсэжэ байг!

⁷ Хоёр-хоёроор мори хүллэһэн дайшалхы тэргэнүүдые, элжэгэ болон тэмээ унаһан зониие харахадаа, тэрэ һэргэг байг, һэргэг байг!»

⁸ Манааша хашхарба: «Өө, Эзэн! Би бүхэлиин үдэр харуулай самхаг дээрэ зогсоноб, һүни бүри манаанда үлэжэ мананаб.

⁹ Харагты! Хоёр хоёроор хүллэһэн моритой дайшалхы тэргэнүүд ерэжэ ябана!» Нэгэниинь «Вавилоон унаа, унаа! Тэрэнэй онгонууд бутархай юумэд газарта хэбтэнэ!» гэжэ дуугарна.

¹⁰ Таряанай тоог дээрэ сохигдоһон таряан мэтэ арад зомни! Түмэн Сэрэгтэ Израилиин Эзэн Бурханһаа дуулаһанаа мүнөө таанадта дуулганаб.

¹¹ Думаа тухай зүн. Сэһиирһээ нэгэ хүн намайе дуудана: «Манааша, һүниин хэды саг бэ? Манааша, һүниин хэды саг бэ?»

¹² Манааша харюусана: «Үглөө боложо байна, гэбэшье һүни хүсэд дууһаагүй! Та дахин асуухаяа һанабал, асуугаарайт. Дахин ерээрэйт».

¹³ Араав тухай зүн. Дэдаанай ашаан хамбышад! Таанад Араавай үрэжэлгүй газарта хонохо ёһотой болонот.

¹⁴ Ангаһан зондо уһа үгыт! Тэмаагай газарай улад зон! Гай тодхорһоо зугадагшадта эдеэ асарыт!

¹⁵ Юуб гэбэл, тэдэ һэлмэһээ, далайһан һэлмэһээ, татаһан һурша номһоо, дайнай аюулһаа зугадан тэрьедээ бшуу.

¹⁶ Эзэн намда иигэжэ айладаа: «Хүлһэншэдые ажалда абахадаа тоолодогтол нэгэ жэл тоолоходо, Кэдаарай нэрэ хүндэ буураха.

¹⁷ Кэдаарай баатар харбаашадһаа үсөөхэниинь лэ амиды үлэхэ». Иигэжэ Израилиин Эзэн Бурхан айладаа юм.