Исай 19 - Библи

Бурхан Египедые хэһээнэ

¹ Энэ болбол Египет тушаа зүн. Эзэн хурдан үүлэ хүлэглэн, Египет руу ерэжэ ябана. Египедэй шүтөөнүүд Тэрэнэй урда шэшэржэ, Египедэй зон айжа-һүрдэжэ байна.

² Эзэн иигэжэ айладхана: «Египедэй зониие өөһэд өөһэдтэйнь мүргэлдүүлэн, урда урдаһаань тухирхаб. Тэдэ аха дүүгэйнгөө урдаһаа, хүршынгөө урдаһаа, хотонь хотын урдаһаа хаанта засаг барихын тула хоорондоо дайлалдаха.

³ Би Египедэй зоной түсэбүүдые һалгаахаб, һүр һүлдыень доройтуулхаб. Тэдэ шүтөөнүүдтэ, үхэһэн зоной һүнэһэ дуудагшадта, үзэл үзөөшэдтэ хандаха.

⁴ Би Египедэй зониие хэрзэгы шэрүүн эзэндэ, дошхон хаанай мэдэлдэ үгэхэб. Энэ болбол Би, Түмэн Сэрэгтэ Эзэн, айладхана мүн!»

⁵ Далайн уһан хатажа, Нил мүрэнэй уһан шэргэхэ.

⁶ Гол мүрэнүүд үмхэй муухай үнэр гарган, Египедэй һубагууд нариихан боло болоһоор шэргэхэ. Хулһан, зэгсэнүүд хатаха.

⁷ Нил мүрэнэй эрьеэр таригдаһан ургамал хатажа, хиидэжэ һалаха.

⁸ Загаһашад уйлалдан, шангаар бархиралдаха. Тэдэнэй губшуурнуудта юуншье баригдахагүй.

⁹ Маалинга бүд нэхэгшэд аргагүйдэхэ, юуб гэхэдэ, гол мүрэнэй хатахада, маалинга ургамал ургахаяа болихо.

¹⁰ Бүд нэхэгшэд тодхорто орохо, хүлһэншэ ажалтан уруу дуруунууд болохо.

¹¹ Нээрээ, Цооһан хотын ударидагшад тэнэг! Фараоной эгээл мэргэн ухаатай гэдэг зон тэнэг зүбшэлнүүдые үгэнэ. «Сэсэн мэргэшүүлэй уг удам, эртэ урдын хаашуулай ухаа халан абаһан зон гээшэбди» гэжэ фараондо яажа хэлэжэ шадахабта?!

¹² Тэрэ сэсэн мэргэн зүбшэгшэдтнай хаанаб? Байгаа һаа, Түмэн Сэрэгтэ Эзэнэй Египет тушаа юу түсэблэһые хэлэжэ үгэг лэ.

¹³ Цооһанай ударидагшад ухаагүй болоо, Ноодой ударидагшад өөһэдыгөө мэхэлнэ! Обогуудайнь түшэг зон Египедые буруу замда оруулба.

¹⁴ Буруу зүбшэл үгэхыень Эзэн тэдэниие баадхаба. Тиихэдэнь тэдэ Египедые бүхы юумэ буруу хүүлэнэ. Египет хадаа һогтуу хүнэй бөөлжэһэндөө худхалдан найгалзадагтал гуйбана.

¹⁵ Иигэжэ хэншье – баян, үгытэйшье, засаг баряаша, юрын хүншье Египедтэ ямаршье туһа хэжэ шадахагүй.

Египедэйхид Эзэндэ мүргэдэг болохо

¹⁶ Египедэй зон эмэ зондол адли аймхай болохо. Түмэн Сэрэгтэ Эзэнэй тэдэниие хэһээхэеэ гараа һунгахые харахадаа, тэдэ айн шэшэржэ байха.

¹⁷ Иудын газар дайда Египедэй зондо айха зүйл болохо. Иудын хан түрэ тушаа Түмэн Сэрэгтэ Эзэнэй тогтооһон шиидхэбэриие һанаха бүридөө тэдэ шэшэрэлдэн айхал.

¹⁸ Тэрэ үе сагай ерэхэдэ, Египедэй табан хото соо зон еврей хэлэн дээрэ дуугаралдадаг болохо, Түмэн Сэрэгтэ Эзэниие дурдан тангаригладаг байха. Эдэ хотонуудай нэгэн «Наранай хото» гээд нэрлэгдэдэг болохо.

¹⁹ Тэрэ сагай тохёолдоходо, Египедэй орон нютагта Эзэндэ үргэлэй шэрээ баригдаха, Египедэй хилэнүүдээр Эзэндэ шулуун бахананууд бодхоогдохо.

²⁰ Энэнь Египедэй орон нютагта Түмэн Сэрэгтэ Эзэнэй байһанай гэршэ тэмдэг болохо. Тэндэ зон дарлагдажа эхилхэдээ, абархыень Эзэн Бурханиие дуудаха. Тиихэдэнь Тэрэ абархыень хэн нэгэниие эльгээхэ.

²¹ Эзэн Өөрыгөө Египедтэ мэдүүлэн харуулжа, тэдэ Бурханиие мэдэдэг боложо, зальбаржа, малаар үргэл, мүн талха таряанай үргэл үргэжэ, шахаа тангаригуудые үгэжэ, саашадаа бэелүүлдэг байха.

²² Эзэн Египедэй зониие хэһээхэ, хэһээгээшье хадаа эдэгээхэ. Тэдэнэй Өөртэнь хандахада, Эзэн гуйлтыень дуулажа, эдэгээхэл.

²³ Тэрэ сагай ерэхэдэ, Египедһээ Ассири хүрэтэр дардам харгы бии боложо, Ассириин зон Египет руу, Египедэй улад Ассири руу ябадаг болохо, тэдэ хамтадаа Эзэндэ мүргэдэг байхал.

²⁴ Тэрэ сагай ерэхэдэ, Израиль Египет ба Ассиритэй хамтаржа, бүхы дэлхэй дотор эдэ орон нютагуудта юрөөл шэнгэхэл.

²⁵ Түмэн Сэрэгтэ Эзэн тэдэниие юрөөжэ, «Минии арад түмэн болохо Египет, Минии бүтээгшэ Ассири, Минии шэлэгдэмэл арад зон Израиль, Би таанадые юрөөнэб!» гэжэ айладхал буулгаха.