Исай 13 - Библи

Эзэн Вавилоониие хэһээхэ

¹ Энэ болбол Вавилоон тухай зүн табилга. Амооцой хүбүүн Исай иимэ үзэл үзэһэн байна.

² Нюсэгэн толгой дээрэ туг бодхоон намилзуулагты! Сэрэгшэд руу хашхаран захиралта үгэгты! Омог бардам хотын бартаануудта добтолон орохо тухай дохёо тэмдэг үгэн, гараараа зангагты!

³ Эзэн хадаа Өөрын гэгээнүүдтэ захираа. Уур хилэнгынь орьёлжо, илалтануудтань баясадаг баатарнуудаа Тэрэ дуудаа.

⁴ Хада уулануудаар олон зоной хүл үймөөн мэтэ ехэ шууяан дуулдана. Энэ болбол хан түрэнүүд хүнхинэнэ, үндэһэ яһатад хамта сугларна: Түмэн Сэрэгтэ Эзэн сэрэгээ дайнда дуудана!

⁵ Тэрэ сэрэгынь алас холын орон нютагуудһаа, тэнгэриин хирхагһаа ерэнэ. Бүхэли орон нютаг һалгааха гэжэ Эзэн уур хилэнсэглэн ерэжэ байнал.

⁶ Сурхирса уйлыт! Эзэнэй үдэр дүтэлөө! Түгэс Хүсэтэһөө усадхал ерэжэ байна!

⁷ Тиимэһээ хүн бүхэнэй гарынь һуларжа, зүрхэниинь айһандаа шэшэрнэ.

⁸ Тэдэ айжа, гар-хүлынь таталдажа, үбдэжэ эхилхэ. Тэдэ түрэжэ байһан эхэнэртэл зобохо. Бэе бэеэ айжа хараха, нюурынь эшэһэндээ улайха.

⁹ Аймшагтай уур хилэнгээр бадарһан Эзэнэй хилэнсэгтэ үдэр дүтэлжэ байна. Газар хооһон, ханха зайдан болгохо. Нүгэлтэй зонииень усадхаха!

¹⁰ Хаб харанхы болохо, тэнгэриин одод гэрэлтэхэгүй, нараншье мандахаяа болихо, һарашье харагдахагүй.

¹¹ Эзэн иигэжэ айладхана: «Муу муухайнь түлөө Би энэ газар дэлхэйе хэһээхэб, муу зондо гэм зэмэйнь түлөө хэһээлтэ амасуулхаб! Бардам, ехэрхүү һанаатай зоной хамарые сохихоб, Хэрзэгы дошхон зоной бардам зангые болюулхаб!

¹² Хүнүүдые хомор болгохоб, шэжэр алтанһаа хомор, Опиирой алтанһаа хомор.

¹³ Огторгойе шэшэрүүлхэб. Минии, Түмэн Сэрэгтэ Эзэнэй, уур хилэнгээ харуулхада, газар дэлхэй байраһаа хүдэлэн шэшэрхэ.

¹⁴ Ангуушанһаа тэрьедэһэн гүрөөһэндэл, эзэгүй хонидтол адли зон өөрын арад руу эрьежэ, түрэлхи нютаг руугаа зугадаха.

¹⁵ Харин хэн нэгэн баригдаа һаа, жадаар хадхуулан үхэхэ, олзологдоһон хэн нэгэн һэлмээр сабшагдаха.

¹⁶ Хараһаар байтарынь нарай үхи хүүгэдынь үхэтэрөө сохюулха, гэр байрануудынь тоногдохо, һамгадынь хүсөөр эдлүүлэгдэхэ.

¹⁷ Үзөөрэйгты, Би мүнгэ тоодоггүй, алта сэгнэдэггүй Мидиин улад зониие дуудахаб.

¹⁸ Тэдэ һурша номоороо залуу зониие хюдаха, нялхануудыешье хайрлахагүй, хүүгэдые хайрлаха гэжэ тэдээндэ үгы».

¹⁹ Содом болон Гоморрые һалгааһандал, Бурхан хаан түрэнүүдэй шэмэг, халдейшүүдэй омогорхол Вавилоониие унагаан һандаргаха.

²⁰ Тэндэ хэншье хэзээдэшье оршин һуужа амидархагүй. Нүүдэл байдалтай арааб хүн хэзээдэшье тэндэ майхан татажа байхагүй. Хонишод хонин һүрэгөө тэндэ адуулжа, амаржа байхагүй.

²¹ Тэндэ зэлүүд хооһон газарай зэрлиг ан амитад амидардаг байха, гэрнүүдынь шара шубуугаар дүүрэшэхэ. Тэндэ тэмээн хяруулнууд амидарха, һаглагар тэхэнүүд собхоролдохо.

²² Байрануудтань сүүбэн шононууд улилдаха, гоё һайхан ордонгуудтань зольбо нохойнууд хусалдаха. Вавилооной һалаха саг ойртожо байна! Үдэрнүүдынь дүүрээ гэхэдэ болохо.