Иоов 30 - Библи

¹ Гэбэшье мүнөө ондоо болоо. Наһаар намһаа залуу хүнүүд намайе наадалжа байна. Тэдэнэй өөдэгүй муу эсэгэнэрые хони адуулдаг нохойн һургагшааршье хүлһэлдэггүй һэмби.

² Тэнхээ тамираа алдаһан тэдэ залуушуулые ажалда абахань ашаггүй.

³ Үлэн хооһон тэдэ үхэдэл мэтэ

⁴ эзэгүй губи талаар һүниндөө тэнэжэ, үбһэ ногоо таһалжа, гашуун арсын жэмэсээр хоол залгана.

⁵ Хүнүүд тэдэниие харабал, хулгайшаниие намнаһандал хашхаран хотоһоо холо зайлуулдаг.

⁶ Тиин тэдэ зэрлиг амитад мэтэ голой хатаһан һаба соо,

⁷ хээрын һөөг бургааһанай дунда бархиралдан, адаалхай бог үбһэн соо шууялдан сугларжа хононо.

⁸ Нэрэ хүндэгүй тэдэниие хүн бүхэн үлдэжэ гаргадаг.

⁹ Гэбэшье эдэ мэтын өөдэгүй амитад нам тухай шоглон ярижа, дуу зохёохо жэшээтэй.

¹⁰ Тэдэ намһаа бэшүүрхэжэ, нюур руумни нёлбохоһоо наана болоно.

¹¹ Номымни хүбшэргэйе таһа татажа, Тэрэнэй намайе зобоохые хараад, тэдэ юунһээшье гайхахаяа болинхой.

^12-13 Хото хүреэлһэн сэрэгэй хэниишье табидаггүй мэтэ эдэ этэгээдүүд замдамни һаад ушаруулжа, намайе алаха туйлдаа хүрэнхэй. Хэншье тэдэниие хориглохогүй байна.

¹⁴ Тиин тэдэ хотын хэрэмэй сүмэрхэйгөөр зүдхэн ороһон сэрэгтэ адляар сугларан намайе дайрана.

¹⁵ Минии жэхыдэһэн хүрэжэ, алдар нэрэм һалхинда хиидэһэн мэтэ замхажа, ажана тэгшэ байдал, хүгжэлни үүлэндэл дэгдэн ошоо.

¹⁶ Удаан зоболондоо шаналан, удахагүй иигээд үхэхэ саг ерээ.

^17-19 Һүни бүри яһамни янгинан үбдэнэ. Хүсэтэ Эзэн шэлэ хүзүүнһээмни барижа, шабар шабхада хаян, үнэһэ шорой мэтэ болгоо.

²⁰ Эзэн минии! Туһа эрижэ хандахадам, харюу үгөөгүйт. Үндын бодоод хэлэхэдэм, үгэ дуугүйл шэртэхэ юмта.

^21-22 Намда хатуу шэрүүнээр хандажа, бүхы шадалаараа хашан, һалхи шуурганда хиидхэн, иишэ тиишэ шэдэлэн байнат.

²³ Мэдэнэм, хүн бүхэнэй ородог үхэлэй хара нүхэндэ намайе Та оруулхат.

²⁴ Дорой амитан би хайрлал гуйхаһаа бэшэ яахабиб. Иимэ хүниие хашан хабшахадаа яана гээшэбта?

²⁵ Хүнэй зоболон үзөөд, би адлихан уйлажа, хооһон ядууе үнэн сэдьхэлһээ хайрладаг байгаа бэшэ аалби?

²⁶ Би Танһаа аза жаргалай гэрэл абанаб гэжэ хүлеэгөөшье һаа, гуниг зоболоной харанхыда оробоб.

²⁷ Махабадымни хёморһон үбшэнүүд диилэжэ, зоболоной үдэрнүүд ерэнхэй.

²⁸ Наранай халуун элшэһээ бэшэ, үбшэнэй баршадһаа арһамни харлан хатаба.

²⁹ Олонһоо туһаламжа гуйбашье, харюу соносоогүй би сүл губиин сүүбэн шоно, талада хашхарһан тэмээн шубуунда адли болооб.

³⁰ Харлаһан арһамни гуужан унажа, яһамни хатажа байна.

³¹ Урданай һайхан сагта ятага лимбын жаргалтай аялгаар дүүрэн байһан байдалнай мүнөө гашуудалай аялгаар тоглоно.